ލޮނުފެނުން މަސް ފިނިކުރާ ނިޒާމުގެ ލޯނު 13 ފަރާތަކަށް ދީފި

ލޮނުފެނުން މަސް ފިނިކުރާ ނިޒާމު މަސް ދޯނިތަކުގައި ހަރުކުރުމަށް ހުޅުވާލި ލޯން ސްކީމުގެ ދަށުން 13 ފަރާތަކަށް ލޯނު ދޫކުރުމަށް ނިންމައިފިއެވެ. މި ފަރާތްތަކަށް ލޯނު ލިބުނުކަމުގެ ލިއުން ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއެވެ.

މަސްވެރިކަމާއި ކަނޑުގެ މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގުޅިގެން ހުޅުވާ ލެވިފައިވާ މި ލޯނަށް އެދުމަށް ހުޅުވާލީ ނިމިދިޔަ ސެޕްޓެމްބަރު މަހުގެ 22 ވަނަ ދުވަހުއެވެ.

މިގޮތުން މި ފެސިލިޓީގެ ދަށުން މިހާތަނަށް 13 ފަރާތަކަށް ލޯނު ދޭން ނިންމާފައިވާއިރު، އެ ފަރާތްތަކަށް ލޯނު ލިބުނު ކަމުގެ ލިޔުން ޙަވާލުކޮށްފައިވަނީ ރައީސުލްޖުމްހޫރިއްޔާގެ އޮފީހުގައި މިކަމަށްޓަކައި ބޭއްވި ޚާއްސަ ރަސްމީއްޔާތެއްގައެވެ.

މަސްވެރިކަމާ ބެހޭ ވުޒާރާއިން ވިދާޅުވީ، މީގެކުރިންވެސް ލޮނުފެނުން މަސް ފިނިކުރާ ނިޒާމު ދޯނިތަކުގައި ޤާއިމް ކުރުމަށް މަސްވެރިންނަށް ހުޅުވާލާފައިވާ ކަމަށެވެ، ނަމަވެސް މި ސަރުކާރުން މި ލޯނަށް އަލުން ހުޅުވާލީ މީގެ ކުރިން ނެތް ގިނަ ލުއިތަކާއެކުގައި ކަމަށެވެ.

މި ރަސްމިއްޔާތުގައި ވާހަކަފުޅުދައްކަވަމުން މަސްވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވީ، ލޯނަށް ކުރިމަތިލާ އޮޑިވެރިންނަށް ސަރުކާރުން ލޯނުގެ ޖުމްލަ އަގުގެ %35 އިންސައްތަ ދައްކައިދޭނެ ކަމަށެވެ.

"މީގެ ކުރިންވެސް މި ފެސިލިޓީގެ ފުރުސަތު އޮޑިވެރިންނަށް އޮތް. ނަމަވެސް އަތް ނުލެވޭ. ނަމަވެސް ވަރަށް ލުއިކޮށް މި ފެސިލިޓީ ދެނީ. އޭގެ މާނައަކީ 1 މިލިޔަން ލޯނުގެ ގޮތުގައި ދެންޏާ، 350،000 ރުފިޔާ ސަރުކާރުން ދޭނެ. " ވަޒީރު ޝީޔާމް ވިދާޅުވިއެވެ.

މި މަޝްރޫޢަށް ޖުމްލަ 148 މިލިޔަން ރުފިޔާ ކަނޑައެޅިފައިވާ ކަމަށް މަސްވެރިކަމާ ބެހޭ ވުޒާރާއިން ވިދާޅުވެއެވެ. އަދި އެސްޑީއެފްސީ މެދުވެރިކޮށް ދޫކުރާ މި ފެސިލިޓީގެ ދަށުން، ރަހުނަކާއި ނުލާ 100،000 ރުފިޔާއިން ފެށިގެން 2،000،000 ރުފިޔާއަށް ހަމައަށް އެހީ ދޭނެއެވެ.

މީގެ ކުރިން ހުޅުވާލި ފުރުސަތުތަކާއި ހިލާފަށް އަލުން ހުޅުވާލި ފެސިލިޓީގެ ދަށުން، ދޯނިތަކުގައި އަވިން ހަކަތަ އުފެއްދޭ ސޯލާ ނިޒާމާއި ޖެނެރޭޓަރު ގަތުމަށް ފުރުސަތު ދޭނެއެވެ. މިއާއެކު ލޯނު އަނބުރާ ދެއްކުމަށް 6 މަސް ދުވަހުގެ ގްރޭސް ޕީރިއޭޑަކާއެކު، 10 އަހަރު މި ސްކީމުގެ ދަށުން ލިބޭނެއެވެ.

ސަރުކާރުން ވިދާޅުވީ، އޮޑިވެރިންގެ މެދުގައި މި ސްކީމަކީ މަޤުބޫލު ސްކީމަކަށްވާއިރު މިހާތަނަށް 31 އެޕްލިކޭޝަނެއް ލިބި 21 އެޕްލިކޭޝަނެއް ޕްރޮސެސް ކުރަމުންދާކަމަށެވެ.

ސަރުކާރުން ވަނީ މި މަސައްކަތާއެކު އައިސް ހޯދުމަށް މަސްވެރިން ކުރާ ދަތުރުތަކަށް ލުއި ލިބޭނެކަމަށް ވިދާޅުވެފައެވެ. އެގޮތުން މިހާރުވެސް ދެކުނުގެ ގިނަ ދޯނިތަކެއްގައި މި ނިޒާމު ހަރުކުރެވިފައިވާއިރު، ސަރުކާރުގެ އަމާޒަކީ ހުރިހާ މަސްދޯންޏެއްގައިވެސް މި ނިޒާމު ހަރުކުރުން ކަމަށް ސަރުކާރުން ވިދާޅުވެއެވެ.