އައިފެކްގެ މެންބަރަކަށްވުމަކީ ރާއްޖޭގެ މުޅި އެކައުންޓިންގ ދާއިރާއަށް ލިބުނު ތާރީޚީ ކާމިޔާބީއެއް: ސީއޭ މޯލްޑިވްސް

އިންޓަނޭޝަނަލް ފެޑެރޭޝަން އޮފް އެކައުންޓެންޓްސް (އައިފެކް)ގެ މެންބަރަކަށް ރާއްޖޭވުމަކީ މުޅި އެކައުންޓިންގ ދާއިރާއަށް ލިބުނު ތާރީޚީ ކާމިޔާބީއެއްކަމަށް ޗާޓަރޑް އެކައުންޓެންޓްސް އޮފް ދަ މޯލްޑިވްސް، ސީއޭ މޯލްޑިވްސްގެ ރައީސް މުޙައްމަދު ޙަލީމް ޢަބްދުﷲ ވިދާޅުވެއްޖެއެވެ.

އައިފެކްގެ މެމްބަރުންކަން ރާއްޖެއަށް ލިބުމާއި ގުޅިގެން އެކަމުގެ ލިޔުން ސީއޭ މޯލްޑިވްސްއަށް އެރުވީ ފްރާންސްގެ ވެރިރަށް ޕެރިހުގައި ކުރިއަށްދިޔަ އައިފެކް ކައުންސިލްގެ 2024 ވަނަ އަހަރުގެ ޢާއްމު ބައްދަލުވުމުގައެވެ.

ސީއޭ މޯލްޑިވްސްގެ ފަރާތުން އައިފެކްގެ މެންބަރުކަމުގެ ލިޔުމާ ޙަވާލުވެވަޑައިގަތީ އެ އިންސްޓިޓިއުޓްގެ ރައީސް މުޙައްމަދު ޙަލީމް ޢަބްދުﷲ އާއި އެ އިންސްޓިޓިއުޓްގެ އޮޑިޓަރ ޖެނެރަލް އަދި އިންސްޓިޓިއުޓްގެ ކުރީގެ ރައީސް ޙުސެއިން ނިޔާޒީއެވެ.

މިކަމާ ގުޅިގެން ސީއޭ މޯލްޑިވްސްގެ ރައީސް މުޙައްމަދު ޙަލީމް ޢަބްދުﷲ ވިދާޅުވީ، އައިފެކްގެ މެންބަރުކަން ލިބުމުން އަންގައިދެނީ އެ އިންސްޓިޓިއުޓުން ކުރަމުންދާ ފުރިހަމަ މަސައްކަތްތަކާއި، ހަރުދަނާ މާލީ ނިޒާމެއް ބިނާކުރުމަށް ކެނޑިނޭޅި ކުރަމުންދާ މަސައްކަތް ކަމަށެވެ.

"މި ފަޚުރުވެރި ކާމިޔާބީއަށް ވާޞިލްވުމަށް އަޅުގަނޑުމެންގެ ސްޕޮންސަރ، ސީއޭ އިންޑިއާއާއި، އަޅުގަނޑުމެންގެ މެންބަރުންނާއި، އިންތިގާލީ ކައުންސިލް އަދި މިހާރުގެ ކައުންސިލް މެންބަރުންނާއި، އަދި މެނޭޖްމަންޓްގެ ބޭފުޅުންގެ މިންނެތް މަސައްކަތާއި އެއްބާރުލުން އުފަލާއެކު ފާހަގަކޮށް، އަޅުގަނޑުގެ ހިތުގެ އަޑިން މި ހުރިހާ ފަރާތްތަކަށް ޝުކުރު އަދާކުރަން" ސީއޭ މޯލްޑިވްސްގެ ރައީސް ވިދާޅުވިއެވެ.

ސީއޭ މޯލްޑިވްސް އުފެދުނުތާ އެންމެ 4 އަހަރު ތެރޭގައި މި ތާރީޚީ ކާމިޔާބީއާ ހަމައަށް ވާޞިލުވުމަކީ ދިވެހިރާއްޖޭގެ އެކައުންޓިންގ ދާއިރާ ކުރިއަރަމުންދާކަމުގެ ސާފު ހެއްކެކެވެ. މިއާއެކު، ބައިނަލްއަޤްވާމީ އެކައުންޓިންގ ދާއިރާގައި މިހާރަށްވުރެ އިތުރަށް ދިވެހިރާއްޖެ ތަމްސީލްކުރެވިގެން ދާނެއެވެ.

1997 ވަނަ އަހަރު އުފެދުނު އައިފެކް އަކީ ބައިނަލްއަޤްވާމީ އެކައުންޓަންސީ ދާއިރާގެ ކަންކަން ބަލަހައްޓާ މައި ފަރާތެވެ. ދުނިޔޭގެ އެކި ހިސާބުތަކުން 3 މިލިއަނަށްވުރެ ގިނަ އެކައުންޓެންޓުން ތަމްސީލުކުރާ އައިފެކްގެ މައިގަނޑު މަސްޢޫލިއްޔަތަކީ ބައިނަލްއަޤްވާމީ އެކައުންޓިންގ މިންގަނޑުތައް ތަރައްޤީކޮށް، އެޑޮޕްޓްކޮށް، ތަންފީޒުކުރުމުގެ ތެރެއިން މި ދާއިރާ އިތުރަށް ހަރުދަނާކުރުމެވެ.

މީގެ އިތުރުން، އާންމު މަސްލަހަތު އިސްކުރުމުގެ ގޮތުން ފައިނޭންޝަލް ރިޕޯޓިންގގައި ހާމަކަން ބޮޑުކަމާއި ޖަވާބުދާރީވުމާއި ދެމެހެއްޓެނިވި ގޮތެއްގައި ކަންކަން ކުރިއަށް ގެންދިޔުމަށް އައިފެކުން އަންނަނީ ބާރުއަޅަމުންނެވެ.

މި ލިބުނު ކާމިޔާބީއާއެކު، ދިވެހިރާއްޖޭގައި އެކައުންޓިންގ ދާއިރާ އިތުރަށް ހަރުދަނާކޮށް ކުރިއެރުވުމަށް ކުރަންޖެހޭ މަސައްކަތްތަކުގެ އިތުރުން، ބައިނަލްއަޤްވާމީ ފެންވަރުގައި ފައިތިލަ ހަމަކުރެވޭ ބަޔަކަށް ސީއޭ މޯލްޑިވްސްގެ މެންބަރުން ހެދުމަށް ކުރަންޖެހޭ އެންމެހާ މަސައްކަތްތައް ކުރަމުންގެންދާނެކަމުގެ ޔަޤީންކަން އެ އިންސްޓިޓިއުޓުން ވަނީ ދީފައެވެ.