ޤައުމީ ތަރައްޤީގެ ތަޞައްވުރު އެކުލަވާލުމުގެ މަޝްވަރާތައް ފައްޓަވައިފި

ކުރިއަށް އޮތް 20 އަހަރުގެ ޤައުމީ ތަރައްޤީގެ ޕްލޭން ނުވަތަ ޖީލުގެ ޤައުމީ ތަރައްޤީގެ ތަޞައްވަރު އެކުލަވާލުމުގެ މަޝްވަރާތައް ފައްޓަވައިފިއެވެ. މިކަމަށްޓަކާ ބޭއްވި ޚާއްސަ ރައްމިއްޔާތުގައި މަޝްވަރާ ފައްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ވަޒީރުންގެ މަޖިލީހުން ފާސްކޮށް ޤައުމީ ތަރައްޤީގެ ޕްލޭން އެކުލަވާލުމުގެ މަސައްކަތް ފައްޓަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރެއްވީ ސެޕްޓްމްބަރު މަހުގެ 17 ވަނަ ދުވަހުއެވެ. މި ޕްލޭނަކީ ކުރިއަށް އޮތް 20 އަހަރު، ރާއްޖެ ތަރައްޤީވެގެން އަންނާނެ ގޮތް ހިމެނޭގޮތަށް، ޤާނޫނީ ބާރުވެރިކަން ލިބޭނެހެން ތައްޔާރުކުރާ ޕްލޭނެކެވެ.

ޕްލޭން އިޢުލާނުކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ، މިފަދަ ޕްލޭނެއްގެ އެންމެ ބޮޑު ބޭނުމަކީ ރައްޔިތުންގެ ޚިޔާލާއި ނިންމުންތަކާއެކު ރާއްޖޭގެ ތަރައްޤީއާއި ގުޅޭ ދިގުމުއްދަތުގެ ޕްލޭނެއް އޮތުންކަމަށެވެ.

ޤަޢުމީ ތަރައްޤީގެ ޕްލޭން ހަދާނީ ރައްޔިތުންނާ ކަމާގުޅުންހުރި ހުރިހާ ފަރާތްތަކުގެ މަޝްވަރާއާއިއެކު، ރައްޔިތުން ބޭނުންވާގޮތަށެވެ.

އެގޮތުން ހުރިހާ ރަށްތަކާއި ޖަމިއްޔާ ޖަމާތަތްތައް، ސިޔާސީ ޕާޓީތައް އަދި އެކި ދާއިރާތަކުން މާހިރުންގެ ލަފާ ހޯދާނެއެވެ. އަދި އެކި ސިނާޢަތްތަކަށް ޢަމާޒުކޮށް މަޝްވަރާއާއި ޚިޔާލު ހޯދާ ޕްލޭންތައް އެކުލަވާލާނެއެވެ. ރާއްޖެއިން ބޭރުގެ ކުރިއަރާފައިވާ ޤައުމުތަކުގެ ތަޖުރިބާ ހޯދުންވެސް ހިމެނެއެވެ.

ޕްލޭން ވެގެންދާނީ ޤައުމިއްޔަތުގެ ވިސްނުމުގައި ޤައުމުގެ ކުރިމަގު ހިމާޔަތްކޮށް، ބިނާކުރުމުގެ ވިސްނުމުގައި ކުރާ މަސައްކަތަކަށްކަމަށްވެސް ރައީސުލްޖުމްހޫރިއްޔާ ވިދާޅުވެފައިވެއެވެ. މި ފަށާ މަސައްކަތް ވެގެންދާނީ އެންމެންގެ ކުރިއެރުމަށް، ދަރިންގެ މުސްތަޤްބަލަށް ކުރާ ވަރަށް މުހިންމު މަސައްކަތަކަކަށްކަމަށް އެމަނިކުފާނު ވިދާޅުވިއެވެ.

މި ޕްލޭނާއެކު ރާއްޖޭގައި އޮތް ބޮޑެތި މައްސަލަތައް ރިޢާޔަތްކޮށް، ދުރު ރާސްތާކައި އެކަންކަން ޙައްލުކުރުމަށް ގިނަ ފިޔަވަޅުތަކެއް އެޅާނެއެވެ.