ހުޅުމާލޭގެ ދުވާރުތަކުގައި އުޅަނދު ޕާކްކުރާނަމަ ފިޔަވަޅު އަޅަނީ
-
މަޤުސަދަކީ މަގުތަކަކީ އެންމެންނަށް ރައްކާތެރި ތަނަކަށް ހެދުން
-
އުޅަނދު ޕާކްކޮށްފައި ހުންނަ ގޮތުން ނުރައްކާ ބޮޑު
ހުޅުމާލޭގެ ދުވާރުގައި ޤަވާއިދާ ޚިލާފަށް އުޅަނދު ޕާކްކުރާނަމަ ފިޔަވަޅު އަޅާނެކަމަށް ފުލުހުން ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ފުލުހުން ވިދާޅުވީ، ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް އުޅަނދު ޕާކުކުރުން އިތުރުވަމުންދާކަން ދިވެހި ފުލުހުންގެ ޚިދުމަތަށް ފާހަގަކުރެވިފައިވާ ކަމަށެވެ.
މިގޮތަށް އުޅަނދު ޕާކުކުރުމަކީ ނުރައްކާތެރި އެކްސިޑެންޓުތައް ހިނގަން މެދުވެރިވާ ކަމަކަށްވާތީ، އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށްޓަކައި، އެފަދަ ސަރަހައްދުތަކުގައި އުޅަނދު ޕާކު ނުކުރުމަށް އެންމެހައި ފަރާތްތަކަށް ދިވެހި ފުލުހުންގެ ޚިދުމަތުން ވަނީ ޢިލްތިމާސް ކުރައްވާފައެވެ. އަދި މިގޮތަށް ޕާކުކޮށްފައި ހުންނަ އުޅަނދުތަކާމެދު ފިޔަވަޅު އަޅަމުންގެންދާނެ ކަމަށް ފުލުހުން ވިދާޅުވެއެވެ.
ފުލުހުން މިހެން ވިދާޅުވެފައިވާއިރު، މަގުމަތީގެ އުސޫލުތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ފިޔަވަޅުތަކެއް އަޅަމުންދާނެކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ދާދިފަހުން ވަނީ ވިދާޅުވެފައެވެ.
ޓްރެފިކްގެ އާއްމު އުސޫލުތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްޤުތައް ގެއްލި، ނުރައްކާތެރި އެކި ހާދިސާތައް ހިނގަމުންދާކަން ސީޕީވެސް ވަނީ ފާހަގަކުރައްވާފައެވެ. އެހެންކަމުން އެފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އަޅާނެ ކަމަށާއި، އެފަދަ ފަރާތްތަކަށް ފިޔަވަޅުއަޅަން އިދާރާތަކަށް އަންގަވާފައިވާނެ ކަމަށްވެސް ސީޕީ ވިދާޅުވިއެވެ.
މިފަދަ ފިޔަވަޅުތައް އެޅުމުގެ މަޤުސަދަކީ މަގުތަކަކީ، އެންމެންނަށް ރައްކާތެރި ތަނަކަށް ހެދުންކަމަށް ސީޕީ ވިދާޅުވިއެވެ. އަދި ނުރައްކާތެރި ހާދިސާތައް ހުއްޓުވުމަކީވެސް މިކަމުގެ މަޤުސަދެއްކަމަށް ވިދާޅުވިއެވެ.