"ނިކަމެތިވަމުންދިޔަ ޤައުމީ ދިފާއީ ބާރު ކޮޅަށް ޖައްސަވަން ރައީސްގެ މުހިންމު ފިޔަވަޅުތަކެއް"

ދިވެހި ރައްޔިތުންނަކީ ޤައުމުގެ މިނިވަކަން ދިފާޢުކުރަން ޖެހުނު ކޮންމެ ދަނޑިވަޅެއްގައިވެސް، އެކަމުގައި ލާމަސީލު ނަމޫނާއެއް ދައްކާފައިވާ ބައެކެވެ. ދުނިޔޭގެ ބޮޑެތި ބާރުތަކުން ރާއްޖޭގެ މިނިވަންކަމާއި ތޮޅެން ދިމާކުރި ކޮންމެ ފަހަރަކުމެ ދިވެހިން ވަނީ އެފަދަ މީހުންނާއި ކުރިމަތިލައި ޤައުމުގެ މިނިވަންކަމުގެ ހިމާޔަތްކޮށްފައެވެ. މިއީ ތާރީޚުން ފެންނަންއޮތް ހަޤީގަތެކެވެ. 3 ނޮވެންބަރުގެ ހަމާލާއިން ލިބުނު ނަސްރުންވެސް ހާމަވެގެންދަނީ ޤައުމާއި މިނިވަކަން ދިފާޢުކުރުމުގައި ދިވެހި ސިފައިންގެ ދައުރުގެ މުހިއްމުކަމެވެ.

ދުނިޔޭގެ ބޮޑެތި ބާރުތަކާއި އަސްކަރީ ގޮތުން ދިވެހިންނަށް ވާދަކޮށް ނުލެވިދާނެއެވެ. ނަމަވެސް 3 ނޮވެންބަރ 1988ގެ ޢުދުވާނީ ހަމަލާއިން ސާބިތުވި އެއްކަމަކީ، ޤައުމަށް ޤައްދާރުވާ، މަދު ބައެއްގެ ނުބައި ރޭވުންތަކުން ސަލާމަތްވާން ޖެހޭކަމެވެ. ކަނޑުފޭރޭ މީހުންނާއި ނިރުބަވެރި ޖަމާއަތްތައް ރާއްޖެ ހިމެނޭ ސަރަޙައްދުގައިވެސް ހަރަކާތްތެރިވެއެވެ. މިއީ ދިވެހިންނަށްވެސް އޮތް ނުރައްކަލެކެވެ.

ޤައުމީ ދިފާޢީ ބާރުން ފާހަގަކޮށްފައިވާ ގޮތުގައި ދިވެހިންގެ އަސްކަރީ ޤާބިލިއްޔަތުކަން އިތުރުކުރަންޖެހޭ ގިނަ ސަބަބުތަކެއް އެބަހުއްޓެވެ. މާޒީއަށް ބަލާއިރު ކަނޑުމަގުން ދިވެހިންނާއި ތޮޅެން އަބަދުވެސް މަސައްކަތް ބަޔަކު ތިކަން ހާމަވެއެވެ. ކަނޑުގެ ބާޒުންގެ ގޮތުގައި މަޝްހޫރު ޕޯޗުގީޒުން ރާއްޖެ އެރީވެސް އެފަދަ ވިސްނުމެއްގައިކަމަށް ބެލެވިދާނެއެވެ.

މިފަދަ އެތަކެއް ނޭއްޤާނީ އަމަލުތައް ހުއްޓުވައި އަޅުގަނޑުމެންގެ ކަނޑުގެ ސަރަހައްދު ބެލެހެއްޓުން ހަރުދަނާކުރެވެން އޮތީ އަސްކަރީ ޤާބިލްކަން އިތުރުކޮށްގެންނެވެ. ނަސްރުގެ ދުވަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެއްވި ތަޤުރީރުގަިއވެސް އަދި އޭގެ ކުރިިން ވެރިކަމާ ހަވާލުވެވަޑައިގެން މިހާތަނަށް ކުރެއްވި މަސައްކަތްތަކުގެ ތެރެއިން އަސްކަރިއްޔާއަށް އެކަށީގެންވާވަރަށް ވަސީލަތްތައް ފޯރުކޮށްދެވެން ޖެހޭކަން ފާހަގަކުރެއްވިއެވެ.

"ހަތިޔާރު ހޯދައި، އެކިއެކި އާލާތްތައް ހޯދަންޖެހޭ. މިހާރުވެސް އެކުވެރި ބައެއް ދައުލަތްތަކާ އެކީގައި ވަނީ މަސައްކަތްތަކެއް ފެށިފައި. އެގޮތުން ލިބޭ ހިލޭއެހީ ލިބިގެންދާނެ. އޭގެއިތުރަށްވެސް، ހަތިޔާރާއި އާލާތްތައް ގަތުމަށްޓަކައި މިހާރު ހުށަހެޅިފައި އޮތް ބަޖެޓުގެ ތެރެއިން ވާނީ ވަކި ޢަދަދެއް ކަނޑައަޅާފައި. އަޅުގަނޑު ދޭ އުފާވެރި ޚަބަރަކީ، މި އަންނަ އަހަރުގެ ތެރޭގައި، ސިފައިންގެ ޚިދުމަތަށް ބޭނުންވާ ހަތިޔާރާއި އާލާތްތަކުގެ ބޮޑު ޢަދަދެއް އިރާދަކުރެއްވިއްޔާ ހޯދައިދެވޭނެ ކަމުގެ ޔަޤީންކަން އަޅުގަނޑު އަރުވަން. " ރައީސުލްޖުމްހޫރިއްޔާ ވިދާޅުވިއެވެ.

ސަރުކާރުން ޤައުމީ ޚިދުމަތުގެ ޕްރޮގްރާމް ތަޢާރަފްކުރަން ނިންމާފައިވާއިރު، އަހަރަކު 1000 ސިފައިން ދިވެހި ޤައުމުގެ ޚިދުމަތައް ނެރުމަކީ އަމާޒެކެވެ. މި އަމާޒާއެކު އަޅާނުލެވި ދޫކޮށްލެވިފައިވާ ސިފައިންގެ މަރުކަޒުތައް ތަރައްޤީކޮށް، ގިރިފުށި ފަޅުން އިތުރު 13 ހެކްޓަރު ހިއްކާ ތަރައްޤީކުރައްވާނެ ކަމަށް ރައީސުލްޖުމްހޫރިއްޔާ ވަނީ އިއުލާންކުރައްވާފައެވެ.

ޤައުމީ ދިފާޢީ ބާރަކީ ޒަމާނީ ވަސީލަތްތަކާއި ޤަބިލީއްޔަތުކަން ލިބިފައިވާ ބާރަކަށް ހެއްދެވުމަކީ ރައީސުލްޖުމްހޫރިއްޔާގެ އަމާޒެކެވެ. އެގޮތުން މުޅިން އަލަށް ޤައުމީ ދިފާޢީ ބާރުގެ ވައިގެ ބަހާ މިއަހަރު އުފައްދަވާފައިވާއިރު، މިދައުރު ނިމުމުގެ ކުރިން ކޯސްޓް ގާޑްގެ ކެޕޭސިޓީ ބޮޑުކުރަން އެމަނިކުފާނު ވަނީ ނިންމަވާފައެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިންޤިލާބީ ބަދަލެއް، ޤައުމީ ދިފާޢީ ބާރަށް ގެނުވުމަށް މަސައްކަތް ކުރަމުންދާއިރު މިއީ ދިވެހި ތާރީހުގައިވެސް ފާހަގަކޮށްލެވޭ މަސައްކަތެއްކަން ދިފާޢީ ވަޒީރު ޣައްސާން މައުމޫން ވިދާޅުވެއެވެ.

"1988 ގެ ހަދިސާ ވެގެން ދިޔައީ އަސްކަރީއްޔާގެ ޤާބިލްކަން އިތުރުކުމުގެ ރަނގަބީލަކަށް. އެ މަސައްކަތް އޭރު ފެށިގެން އައިސް 20 އަހަރު ފަހުން ހުއްޓިފައި އޮވެފައި، އައު ބާރަކާއި އައު ރޫހަކާއި އޭގެ 15 އަހަރު ފަހުން ފެށިގެން އައީ، މިދިޔަ ނޮވެމްބަރު 17 ވަނަ ދުވަހު ސިފައިންގެ އެންމެ މަތީވެރިޔާގެ ހައިސީއްޔަތުން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދިވެހި ރާއްޖޭގެ މިނިވަންކަމާއި އިސްތިޤްލާލާއި ސިޔާދަތުގެ ހިމާޔަތުގައި ދަންމަވާލެއްވި ފަލަ ރަތްރޮނގާއެކުގައި. " ދިފާޢީ ވަޒީރު ވިދާޅުވިއެވެ.

ޤައުމު ދިފާޢުކުރަން އެހެން ޤައުމަކަށް ބަރޯސާވެއްޖެނަމަ، ޤައުމުގެ އިސްތިޤްލާލަށް އޭގެ އަސަރު ކުރާނެކަމީ ޝައްކެއް އޮތް ކަމެއް ނޫނެވެ. މިހާރުވެސް ދުނިޔޭގެ ޤައުމުތަކުން އުޅެނީ އެފަދަކަންކަމުން ސަލާމަތް ނުވެވިގެންނެވެ. އެހެން ކަމުން ޤައުމުގެ ދިފާޢީ ބާރު ވަރުގަދަކޮށް އަމިއްލަ މިނިވަންކަން ކަށަވަރުކުރުވުމަކީ، އަޅުގަނޑުމެންގެ ކުރިމަގަށް ކޮންމެހެން ކުރަން ޖެހިފައިވާ މުހިންމު ކަމެކެވެ. ރައީސް ޑރ. މުޙައްމަދު މުއިއްޒު ގެންދަވަނީ އެމަގަށް މަސައްކަތް ކުރައްވަމުންނެވެ.