އެޗްއާރުސީއެމްގެ އަމާޒަކީ ޙައްޤުތަކަށް މަސައްކަތްކުރާ މީހުން ބާރުވެރިކުރުމަށް ތަމްރީންތައް މުޅި ރާއްޖޭގައި ހިންގުން

އަމާޒަކީ އިންސާނީ ޙައްޤުތަކަށް މަސައްކަތްކުރާ މީހުން ބާރުވެރިކުރުމަށް ތަމްރީންތައް މުޅި ރާއްޖޭގައި ހިންގުންކަމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސް، އެޗްއާރުސީއެމްގެ މެންބަރު އިސްމާޢިލް ޙަބީބް ވިދާޅުވެއްޖެއެވެ.

ޙަބީބް މިހެން ވިދާޅުވީ އިންސާނީ ހައްޤުތަކަށް މަސައްކަތްކުރާ މީހުން ތަމްރީންކުރުމަށް އެޗްއާރުސީއެމްއިން އިންތިޒާމުކުރާ ހިއުމަން ރައިޓްސް ޑިފެންޑަރސް ޕްރޮގުރާމް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތުގައި ވާހަކަދައްކަވަމުން އެޗްއާރުސީއެމްގެ މެންބަރު އިސްމާޢިލް ޙަބީބް ވިދާޅުވީ އިންސާނީ ޙައްޤުތައް ރައްކާތެރިކޮށް، ދަމަހައްޓާ، އިންސާނީ ހައްޤު ކުރިއަރުވަން އެޗްއާރުސީއެމުން ގިނަ މަސައްކަތްތަކެއް ކުރަމުން އަންނަ ކަމަށެވެ. އަދި މިފަށާ ތަމްރީން ޕްރޮގުރާމަކީ މި މަސައްކަތުގެ ދަށުން އިންސާނީ ޙައްޤުތަކަށް މަސައްކަތްކުރާ މީހުން ކުރިއަރުވައި، ބާރުވެރިކުރުވައި އެމީހުންގެ ޤާބިލުކަން އިތުރުކޮށް ތަރައްޤީކުރުމަށް ހިންގޭ ޕްރޮގުރާމެއްކަމަށް ޙަބީބް ވިދާޅުވިއެވެ.

ޙަބީބް ވިދާޅުވީ، އެޗްއާރުސީއެމްގެ އަމާޒަކީ ހިއުމަން ރައިޓްސް ޑިފެންޑަރސް ޕްރޮގުރާމް ރާއްޖޭގެ އެކި ކަންކޮޅުތަކުގައި ހިންގާ، އިންސާނީ ޙައްޤުތަކަށް ރާއްޖޭގައި މަސައްކަތްކުރާ މީހުން ބާރުވެރިކުރުވުން ކަމަށެވެ.

މި ޕްރޮގުރާމުން ތަމްރީންވާ މީހުން ވާނީ އިންސާނީ ޙައްޤުތަކަށް ޢާންމުން ހޭލުންތެރިކޮށް، ހަވާސާވެފައިވާ ފަރާތްތައް ބާރުވެރިކުރުވައި، ދައުލަތް ޖަވާބުދާރީކޮށް، އިންސާނީ ޙައްޤުތައް ޙިމާޔަތްކުރާ ބަޔަކަށް ކަމަށް ޙަބީބް ވިދާޅުވިއެވެ.

"އިންސާނީ ޙައްޤުތަކަކީ އިންސާނަކަށް ވީތީ ކޮންމެ މީހަކަށްވެސް ލިބިގެންވާ ޙައްޤުތަކެއް. މި ޙައްޤުތައް ނަސްލާއި ކުލައާއި ޖިންސާއި ބަހާއި ދީނާއި ސިޔާސީ ނުވަތަ އެނޫންވެސް އެއްވެސް ބާވަތެއްގެ މިންގަނޑަކުން ތަފާތު ކުރުމެއްނެތި އެންމެންނަށްވެސް ލިބުމަކީ ދިވެހިރާއްޖޭގެ ޤާނޫނުއަސާސީއިން ކަށަވަރުކޮށްދޭ ޙައްޤެއް." ޙަބީބް ވިދާޅުވިއެވެ.

ހިއުމަން ރައިޓްސް ޑިފެންޑަރސް ޕްރޮގުރާމް ކުރިއަށްދާނީ 4 ދުވަހުގެ މުއްދަތަކަށެވެ. މި ޕްރޮގުރާމުގައި މާލެއާއި އަތޮޅުތަކުން މީހުން ބައިވެރިވެއެވެ. އެޗްއާރުސީއެމުން ވަނީ މި ޕްރޮގުރާމް މީގެ ކުރިން އައްޑޫ ސިޓީއާއި ކުޅުދުށްފުށި ސިޓީގައި ބާއްވާފައެވެ.