މިއީ ރައްޔިތުންގެ ސަރުކާރެއް، މަސައްކަތް ކުރާނީ ރައްޔިތުންގެ ފަޅީގައި ތިބެގެން: ރައީސް

މިއީ ރައްޔިތުންގެ ސަރުކާރެއް ކަމަށާއި ސަރުކާރުން މަސައްކަތް ކުރާނީ ރައްޔިތުންގެ ފަޅީގައި ތިބެގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިފަދައިން ވިދާޅުވީ ހުޅުމާލޭ ފޭސް 2 ގައި ޤާއިމުކުރި ޕެޓް ކެއަރ ފެސިލިޓީ ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

"އޮޅު ހިޔާ"ގެ ނަމުގައި ޤާއިމުކޮށްްފައިވާ ޕެޓް ކެއަރ ފެސިލިޓީ ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ސަރުކާރުން ރައްޔިތުންގެ ކަންބޮޑުވުންތައް ޙައްލުކޮށްދޭން މަސައްކަތް ކުރައްވާނެކަމަށާއި މިހާރުވެސް މަސައްކަތްތައް ބައްޓަންކޮށްފައިވަނީ އެ މަގުންކަމަށެވެ.

މި ސަރުކާރަކީ ރައްޔިތުންގެ ސަރުކާރެއް ކަމަށާއި މިއީ ރައްޔިތުންގެ ފަޅީގައި ތިބެގެން މަސައްކަތް ކުރައްވާ ސަރުކާރެއްކަމަށް ރައީސް ވިދާޅުވިއެވެ. އަދި މިކަމުގައި ދެވަނަ ވިސްނުމެއް ނެތްކަމަށާއި ހުރިހާ ކަމެއްވެސް ކުރާނީ ރައްޔިތުން ބޭނުންވާ ގޮތަށް ކަމަށް އެމަނިކުފާނު ވިދާޅުވިއެވެ.

"މިފަދަ (މަގުމަތީގައި ބުޅާ ގިނަވުން) ކަންތައްތައް ހައްލު ކުރުމަށް ސަރުކާރުން އިސްކަންދޭނެ. ރައްޔިތުންގެ ކަންބޮޑުވުންތަކަށް ހައްލު ހޯދައިދޭނަން. މިކަމުގައި ދެވަނަ ވިސްނުމެއް ނެތް. ރައްޔިތުންގެ އިހުސާސްތަކަކީ ކޮބައިތޯ ބަލާ ރައްޔިތުންނަށްޓަކައި ކަންތައްތައް ނިންމަމުން މިދަނީ" ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ، މި ސަރުކާރަކީ ވާ ވައުދުތައް ފުއްދާ، ލާމަރުކަޒީ ނިޒާމުގެ ތެރެއިން ކަންތައްތައް ކުރެއްވުމަށް އިސްކަންދޭނެ ސަރުކާރެއްކަމަށެވެ.

އެގޮތުން ކައުންސިލްތައް ބާރުވެރިކުރުވުމަށް މި ސަރުކާރުން ގިނަ މަސައްކަތްތަކެއް ކުރައްވާކަން ފާހަގަކުރައްވާ ރައީސް ވިދާޅުވީ 160 ކައުންސިލާއި ބައްދަލުކުރައްވާ، ކައުންސިލްތަކުން ފާހަގަކުރެއްވި ގިނަ ކަންތައްތައް ތަންފީޒުކުރައްވަމުންދާ ކަމަށެވެ.

"ލާމަރުކަޒީ ނިޒާމުގެ ތެރެއިން ރައްޔިތުންނާއި ގާތުން މަސައްކަތް ކުރެއްވުމުގައި އެންމެ ބޮޑަށް އެންމެ އިސްކަމެއްދީގެން އަޅުގަނޑުމެން މަސައްކަތް ކުރަމުންދާކަން އެއީ ފެންނަން އޮތް ހަޤީޤަތެއް" ރައީސް ވިދާޅުވިއެވެ.

ރައީސުލްޖުމްހޫރިއްޔާ ވަނީ ޤާނޫނު ފާސްވާއިރު އޮތް ގޮތަށް ބްލޮކް ގްރާންޓްގެ 5 ޕަސަންޓް ކައުންސިލްތަކަށް ލިބޭނެކަން ފާހަގަކުރައްވާފައެވެ. އަދި ޓޫރިޒަމްގެ ތެރެއިން ލިބޭ ޓެކްސްގެ ވަކި ޕަސަންޓެއް ކައުންސިލްތަކަށް ޖަމާކޮށްދޭން ނިންމަވާފައިވާ ކަމަށާއި ޤާނޫނު އިސްލާހު ކުރަން ވަރަށް އަވަހަށް ފޮނުއްވާނެކަމަށް ވިދާޅުވިއެވެ.

މީގެއިތުރުން ޤާނޫނުގައި ލިޔެފައި ހުރި އެހެންނަމަވެސް ކައުންސިލްތަކާއި ހަވާލުނުކުރާ ގިނަ ކަންތައްތަކާއި ގުޅިގެން ކެބިނެޓްގައި މަޝްވަރާ ކުރައްވަމުންދާ ކަމަށާއި ވަރަށް އަވަހަށް އެކަންތައްތައް އިއުލާން ކުރައްވާނެކަމަށް އެމަނިކުފާނު ވިދާޅުވިއެވެ.

ކައުންސިލްތަކުގެ އިމާރާތްތައް މާރާމަތު ކުރުމުގެ މަސައްކަތަކީ ވެސް މި އަހަރު ފެށޭނެ މަޝްރޫއެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ކައުންސިލްތައް ލާމަރުކަޒީ ނިޒާމުގެ ތެރެއިން ބާރުވެރިކުރުވައިގެން، ކަންތައްތައް ކުރުމުގައި އަމަލާ ބަހާއި ދިމާވާ ކަމަށްވެސް ރައީސް ވިދާޅުވިއެވެ. އަދި ޕެޓް ކެއަރ ފެސިލިޓީ އަކީ އެކަމުގެ ހެއްކެއްކަމަށް ރައީސް ވިދާޅުވިއެވެ.