ހުޅުމާލޭ ދެވަނަ ފިޔަވަހީގައި ޤާއިމުކުރި ޕެޓް ކެއަރ ފެސިލިޓީ ރައީސް ހުޅުއްވައިދެއްވައިފި

މާލެ ސަރަހައްދުގައި މަގުމަތީ އުޅޭ ބުޅާތައް ގިނަވުމުގެ މައްސަލައަށް ހައްލެއް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަޞައްވުރާއި އެއްގޮތަށް ބިނާކޮށްފައިވާ ޕެޓް ކެއަރ ފެސިލިޓީ، އެމަނިކުފާނު ހުޅުއްވައި ދެއްވައިފިއެވެ. މިތަން ހުޅުވާފައިވަނީ ހުޅުމާލެ ދެވަނަ ފިޔަވަހީގައެވެ.

"އޮޅު ހިޔާ" މި ނަމުގައި ޤާއިމުކޮށްފައިވާ މި ޕެޓް ކެއަރ ފެސިލިޓީ ތަރައްޤީކޮށްފައިވަނީ ހުޅުމާލެ ދެވަނަ ފިޔަވަހީގައި 5000 އަކަ ފޫޓުގެ ބިމެއްގައެވެ. މި ފެސިލިޓީ ހުޅުވުމަށް މިއަދު ހަވީރު ބޭއްވި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި ދައުލަތުގެ ވަޒީރުންނާއި، ރައްޔިތުންގެ މަޖިލީހުގެ މެންބަރުން ބައިވެރިވެވަޑައިގެންނެވިއެވެ.

ޕެޓް ކެއަރ ފެސިލިޓީން ލިބޭނެ ޚިދުމަތްތަކުގެ ތެރޭގައި އާންމު ޗެކްއަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުން، ކާންދިނުމާއި، ބޭސްއެޅުން ހިމެނެއެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫން ވެސް ބަލި ދެނެގަތުމަށް ކުރާ ޓެސްޓުތައް ހެދުމުގެ އިތުރުން، އެނެސްތީސިއާ ބެލެހެއްޓުމާއި އޮޕަރޭޝަނަށްފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުން ހިމެނެއެވެ.

މާލެ ސިޓީގައި ބުޅާ ގިނަވެ، ނުބެލެހެއްޓި، ޢާއްމު ދިރިއުޅުމަށް އުނދަގޫވާވަރަށް އެކަން ދިޔައިރުވެސް މާލެ ސިޓީ ކައުންސިލްގެ މެޖޯރިޓީ، އެމްޑީޕީއަށް އޮތް 3 ދައުރުގައި އެކަމާ އެއްވެސް ވަރަކަށް އަޅައެއް ނުލައެވެ.

ނަމަވެސް 2021 ވަނަ އަހަރު މާލެ ސިޓީގެ މޭޔަރުކަމަށް ވަޑައިގަތުމަށް އަދުގެ ރައީސުލްޖުމްހޫރިއްޔާ ޑރ. މުޢިއްޒު ކުރެއްވި ކެމްޕޭނުގައި، ރައްޔިތުންގެ ކަންބޮޑުވުމެއްގެ ގޮތުގައި، އަދި ޙައްލު ނުކުރެވި ދިގުލާފައިވާ މި މައްސަލަ ޙައްލުކުރަން މަސައްކަތް ފައްޓަވާނެކަމަށް ވިދާޅުވިއެވެ.

އެގޮތުން މި މަސައްކަތް ކުރުމަށް ބިމެއް ހަމަޖައްސަވައި ދެއްވުމަށް 2021 ވަނަ އަހަރު އެދިލެއްވިއެވެ. ނަމަވެސް އޭރު އޮތް އެމްޑީޕީގެ ކޯލިޝަން ސަރުކާރުން އެއްވެސް އެއްބާރުލުމެއް ނުލިބި މިކަން ދިގުލައި ދިޔައެވެ. އޭގެފަހުން މޭޔަރުކަމުގައި ރައީސުލްޖުމްހޫރިއްޔާ ޑރ. މުޢިއްޒު ހުންނަވައި، މިކަން ޙައްލުކުރެވޭނެ މަގެއް ފެނޭތޯ ކުރެއްވި މަސައްކަތުން ބޮޑުތަކުރުފާނުމަގު، މަސްވެރީންގެ ޕާކު އޮތް ސަރަޙައްދުން އެކަމަށް ސަރަހައްދެއް ހާއްސަކުރެވޭތޯ މަސައްކަތް ކުރެއްވިއެވެ.

އެހެންނަމަވެސް އެކަން ކާމިޔާބު ނުވެ، ރައީސުލްޖުމްހޫރިއްޔާކަމާ ޙަވާލުވެވަޑައިގެން ދިރޭތަކެއްޗަށް އޯގާތެރިވެ ބެލެހެއްޓުމަށް ޚާއްޞަ އިސްކަމެއް ދެއްވުމަށްޓަކައި ދަނޑުވެރިކަމާބެހޭ ވުޒާރާގެ ނަމާއި މެންޑޭޓްގެ ތެރޭގައި އެނިމަލް ވެލްފެއަރ ހިމެނުއްވިއެވެ. އަދި މާލެ ސިޓީގައި އެންމެ އިސްކަން ދެއްވައިގެން ޙައްލު ހޯއްދަވާ އެއް ކަމެއްގެ ގޮތުގައި، ޕެޓް ކެއަރ ފެސިލިޓީ ބިނާކުރުން ހިމަނުއްވައި، ހުޅުމާލެ 2 ވަނަ ފިޔަވަހީން އެކަމަށް ޚާއްޞަ ބިމެއް ސަރުކާރުން ހަމަޖެއްސެވިއެވެ.

މިމަސައްކަތުގެ ސަބަބުން މާލެ ސަރަހައްދުގައި، އެތައް އަހަރުތަކެއް ވަންދެން ރައްޔިތުންނަށް ކަންބޮޑުވުމަކަށް ވެފައިވާ ބުޅާ ގިނަވުމުގެ މައްސަލައަށް ހައްލެއް ލިބިގެންދާނެއެވެ. އަދި ރަށުތެރެއާ މަގުތައް ހަޑިވެ ނަޖިސްވުން ކުޑަކުރެވި، ބުޅާ ބެލެހެއްޓުންވެސް އޯގާތެރިކަމާ އަޅައިލުމާއެކު އިންތިޒާމު ކުރެވޭނެ ކަމަށް ސަރުކާރުން ވިދާޅުވެއެވެ.

މިއީ އެތަކެއް އަހަރުތަކެއް ވަންދެން މާލެ ސަރަހައްދުގައި ދިރިއުޅެމުންދާ ރައްޔިތުންގެ ހައްލެ ނުލިބި އޮތް ކަންބޮޑުވުމަކަށް، ރައީސުލްޖުމްހޫރިއްޔާ ޑރ. މުޢިއްޒު ހޯއްދަވައި ދެއްވި ދާޢިމީ ހައްލެކެވެ.