ބީއެމްއެލް އޭޓީއެމް ޚިދުމަތް ހިމަންދޫއަށް

ބޭންކް އޮފް މޯލްޑިވްސް، ބީއެމްއެލް ބޭންކިންގ ޚިދުމަތް ފުޅާކުރުމަށް ކުރަމުންދާ މަސައްކަތުގެ ދަށުން މިއަދު އއ. ހިމަންދޫގައި އޭޓީއެމް ސެންޓަރެއް ހުޅުވައިފިއެވެ.

ހިމަންދޫގައި ހުޅުވުނު އައު އޭޓީއެމް ސެންޓަރު މެދުވެރިކޮށް ދުވާލަކު 24 ގަޑިއިރު އަސާސީ ބޭންކިންގ ޚިދުމަތްތައް ލިބޭނެއެވެ. މީގެ ތެރޭގައި ފައިސާ ނެގުމާއި، ޖަމާކުރުމާއި އަދި ފައިސާ ޓްރާންސްފަރ ކުރުން ހިމެނެއެވެ.

މިއަދު ހިމަންދޫގައި ހުޅުވުނު އޭޓީއެމް ސެންޓަރުގެ އިތުރުން ދާދިފަހުން ފެރިދޫ އާއި ބޮޑުފޮޅުދޫގައި ހުޅުވުނު އޭޓީއެމް ސެންޓަރުތަކާއެކު އއ. އަތޮޅުގައި ބީއެމްއެލް އިން މިވަނީ ޖުމްލަ 7 އޭޓީއެމް ސެންޓަރު ޤާއިމްކޮށްފައެވެ.

މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 92 ސެލްފްސަރވިސް ބޭންކިންގ ސެންޓަރ، 148 އޭޓީއެމް، އޭޖެންޓު ބޭންކިންގ ޚިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތެއް ބީއެމްއެލުން ދަނީ ފޯރުކޮށްދެމުންނެވެ.