މަތީ ތަޢުލީމާބެހޭ ވުޒާރާއިން ވަޒީފާގެ ފުރުޞަތުތަކާބެހޭ އެކްސްޕޯއެއް، މީޑިއާ ޕާޓްނަރަކަށް ޕީއެސްއެމް

ރާއްޖޭގައި ލިބެންހުރި ވަޒީފާގެ ފުރުޞަތުތަކާ ބެހޭގޮތުން މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވުޒާރާއިން އިންތިޒާމްކޮށްގެން ބާއްވާ އެކްސްޕޯގެ މީޑިއާ ޕާޓްނަރަކަށް ޕަބްލިކް ސަރވިސް މީޑިއާ، ޕީއެސްއެމް ހަމަޖައްސައިފިއެވެ.

"ދާލަން" މިނަމުގައި ބާއްވާ އެކްސްޕޯގެ މީޑިއާ ޕާޓްނަރެއްގެ ގޮތުގައި ޕީއެސްއެމް ހަމަޖެއްސުމަށް މަތީ ތަޢުލީމާބެހޭ ވުޒާރާއާއި ޕީއެސްއެމްއާ ދެމެދު އެއްބަސްވުމެއްގައި ވަނީ ސޮއިކޮށްފައެވެ.

މި އެއްބަސްވުމާ ގުޅޭގޮތުން މަތީ ތަޢުލީމާބެހޭ ވުޒާރާއިން ވިދާޅުވީ، މި އެއްބަސްވުމުގެ ދަށުން އެކްސްޕޯ އިޝްތިހާރުކުރުމުގައި ޕީއެސްއެމްއިން އެހީތެރިވެދޭނެ ކަމަށެވެ.

މި އެއްބަސްވުމުގައި މަތީ ތަޢުލީމާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. މަރްޔަމް މާރިޔާއެވެ. ޕީއެސްއެމްގެ ފަރާތުން ސޮއިކުރެއްވީ މެނޭޖިން ޑިރެކްޓަރ މުޙައްމަދު ސަޢީދެވެ.

ދާލަން އެކްސްޕޯ ބޭއްވުމަށް ހަމަޖެހިފައިވަނީ އަންނަ މަހުގެ 15 އާއި 16 ވަނަ ދުވަހުއެވެ. މި އެކްސްޕޯ އޮންނާނީ ހުޅުމާލޭ ސެންޓްރަލް ޕާކުގައެވެ. މި އެކްސްޕޯގައި ސަރުކާރުގެ އިދާރާތަކާއި ވުޒާރާތަކާއި އެކި ކުންފުނިތަކުން ބައިވެރިވެ، އެތަންތަނުގައި ހުރި ވަޒީފާގެ ފުރުޞަތުތަކުގެ މަޢުލޫމާތު އެކްސްޕޯގައި ހުށައަޅާނެކަމަށް މަތީ ތަޢުލީމާބެހޭ ވުޒާރާއިން ވިދާޅުވިއެވެ.

މީގެ އިތުރުން މަތީ ތަޢުލީމުދޭ މަރުކަޒުތަކާއި ކޮލެޖު ޔުނިވަރސިޓީތަކުންވެސް އެކްސްޕޯގައި ބައިވެރިވެ، އެތަންތަނުގައި ހުރި ކޯސްތަކުގެ މަޢުލޫމާތު ހުށައަޅާނެކަމަށްވެސް އެ ވުޒާރާއިން ވިދާޅުވިއެވެ.

މަތީ ތަޢުލީމާބެހޭ ވުޒާރާއިން ވިދާޅުވީ މި އެކްސްޕޯގައި 45 ސްޓޯލް ހުންނާނެ ކަމަށެވެ. އަދި އެކްސްޕޯއަށް ޒިޔާރަތްކުރާ މީހުންގެ މެދުގައި ބާއްވާ ގުރުއަތަކުން ހޮވޭ 5 މީހަކަށް ސްކޮލަރޝިޕް، މަތީ ތަޢުލީމާބެހޭ ވުޒާރާގެ ފަރާތުން ދިނުމަށް ހަމަޖެހިފައިވާކަމަށްވެސް ވިދާޅުވިއެވެ.