ފެރިދޫ އާއި ބޮޑުފޮޅުދޫގައި ބީއެމްއެލްގެ އޭޓީއެމް ސެންޓަރު ހުޅުވައިފި

އއ.ފެރިދޫއާއި، ބޮޑުފޮޅުދޫގައި ބޭންކް އޮފް މޯލްޑިވްސްއިން އޭޓީއެމް ސެންޓަރު ހުޅުވައިފިއެވެ.

ފެރިދޫ އާއި ބޮޑުފޮޅުދޫގައި ހުޅުވުނު އައު އޭޓީއެމް ސެންޓަރުތަކުން ދުވާލަކު 24 ގަޑިއިރު އަސާސީ ބޭންކިންގ ޚިދުމަތްތައް ފޯރުކޮށްދޭނެއެވެ. މީގެ ތެރޭގައި ފައިސާ ނެގުމާއި، ޖަމާކުރުމާއި، ފައިސާ ޓްރާންސްފަރ ކުރުން ހިމެނެއެވެ.

ފެރިދޫ އާއި ބޮޑުފޮޅުދޫގައި ގާއިމްކުރެވުނު މި އޭޓީއެމް ސެންޓަރުތަކާއެކު ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ލިބޭނެ މަގު އިތުރަށް ތަނަވަސްވެގެން ދާނެއެވެ.

ބީއެމްއެލްގެ ސީއީއޯ މުޙައްމަދު ޝަރީފު ވިދާޅުވީ، ޑިޖިޓަލް ބޭންކިންގ ފުޅާކުރުމަށް ކުރަމުންދާ އިންވެސްޓްމެންޓްތަކާއެކު މިއިންވެސްޓްމަންޓަކީ ޚިދުމަތްދޭ މުޖުތަމައުތަކަށް އެހީތެރިވުމަށާއި، ދިވެހިރާއްޖޭގެ އިޤްތިޞާދު ހަރުދަނާކުރުމަށް ބޭންކުން ކުރަމުންދާ މަސައްކަތުގެ ހެއްކެއްކަމަށެވެ.

މިސެންޓަރުތަކާއެކު އއ.އަތޮޅުގައި ބީއެމްއެލްއިންވަނީ ޖުމްލަ 6 އޭޓީއެމް ސެންޓަރު ގާއިމްކޮށްފައެވެ. އޭޓީއެމް ވިއުގައިގެ އިތުރުން، 2006 ވަނަ އަހަރު ރަސްދޫގައި ހުޅުވުނު ބްރާންޗް މެދުވެރިކޮށް ބީއެމްއެލްއިން އަންނަނީ އަތޮޅުގައި ބޭންކިންގ ޚިދުމަތްވެސް ފޯރުކޮށްދެމުންނެވެ.

ބޭންކް އޮފް މޯލްޑިވްސްއިންވަނީ މިހާތަނަށްވަނީ މުޅިރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 91 ސެލްފްސަރވިސް ބޭންކިންގ ސެންޓަރ، 147 އޭޓީއެމް، އޭޖެންޓު ބޭންކިންގ ޚިދުމަތުގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތް ފޯރުވައިދެމުންނެވެ. ބޭންކް އޮފް މޯލްޑިވްސްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމަޢުތަކަށް އެހީތެރިކަން ފޯރުކޮށްދިނުންކަމަށް އެބޭންކުން ހާމަކުރެއެވެ.