5.1 ބިލިއަން ރުފިޔާގެ ސަޕްލިމެންޓްރީ ބަޖެޓް ކޮމިޓީން ފާސްކޮށްފި

ސަރުކާރުގެ ފަރާތުން ހުށަހެޅި ގޮތަށް 5.1 ބިލިއަން ރުފިޔާގެ ސަޕްލިމެންޓްރީ ބަޖެޓު ފާސްކުރަން ބަޖެޓް ދިރާސާކުރި ކޮމިޓީން ފާސްކޮށްފިއެވެ.

ސަޕްލިމެންޓްރީ ބަޖެޓް މަޖިލީހަށް ހުށަހަޅާފައިވަނީ މިިދިޔަ ބުރާސްފަތިދުވަހުއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް ސަޕްލިމެންޓްރީ ބަޖެޓެއް ހުށަހެޅީ މި އަހަރަށް ލަފާކޮށް ނިމިދިޔަ ރައްޔިތުންގެ މަޖިލީހުން ފާސްކުރި 49.8 ބިލިއަން ރުފިޔާގެ ބަޖެޓުން ދައުލަތުގެ ޚަރަދުތައް ހަމަޖައްސަން ދަތިވުމުންކަމަށް ސަރުކާރުން ވިދާޅުވެއެވެ.

ސަޕްލިމެންޓްރީ ބަޖެޓަށް މަޖިލީހުގެ ތަޅުމުގައި ބަހުސްކުރުމަށްފަހު ދިރާސާކުރުމަށް ފޮނުވާފައިވަނީ މާލިއްޔަތު ކޮމިޓީއާއި އިޤްތިޞާދީ ކޮމިޓީގެ މެމްބަރުންގެ މައްޗަށް އެކުލެވޭ ބަޖެޓް ދިރާސާކުރާ ކޮމިޓީއަށެވެ.

މިއަދު ބޭއްވި ބަޖެޓް ދިރާސާކުރާ ކޮމިޓީގެ ބައްދަލުވުމުގައި ސަރުކާރުން ހުށަހެޅިގޮތަށް ބަޖެޓު ފާސްކޮށްދެއްވަން މާމިގިލި ދާއިރާގެ މެންބަރު ގާސިމް އިބްރާހިމް ހުށަހެޅުއްވުމުން، ހޯރަފުށީ ދާއިރާގެ މެންބަރު އަލީ މޫސާއާއި ވެލިދޫ ދާއިރާގެ މެންބަރު މުހައްމަދު އައްބާސް ވަނީ އެ ހުށަހެޅުމަށް ތާއީދުކުރައްވާފައެވެ.

ސަޕްލިމެންޓްރީ ބަޖެޓް ކޮމިޓީން ފާސްކޮށްފައިވަނީ އެއްވެސް އުނި އިތުރެއް ނުގެސް، ސަރުކާރުން ހުށަހެޅުއްވި ގޮތަށެވެ. ކޮމިޓީން ސަޕްލިމެންޓްރީ ބަޖެޓް ފާސްކުރުމަށްފަހު، މަޖިލީހުގެ ތަޅުމުން ސަޕްލިމެންޓްރީ ބަޖެޓާމެދު ގޮތެއް ނިންމުމަށް ހުށަހަޅާނެއެވެ.

ސަޕްލިމެންޓްރީ ބަޖެޓުގައި ޕީއެސްއައިޕީއަށް ދެ ބިލިއަން ރުފިޔާ، ސަބްސިޑީއަށް (ތެޔޮ، ކާޑު، ކަރަންޓާއި ނަރުދަމާ އާއި ފެނުގެ ހިދުމަތް) އެއް ބިލިއަން ރުފިޔާ، ކޮންޓިންޖެންސީ ބަޖެޓަށް 650 މިލިއަން ރުފިޔާ، ސްޓޫޑެންޑް ލޯނަށް 458 މިލިއަން ރުފިޔާ އަދި ސަރުކާރު ހިއްސާވާ ކުންފުނިތަކަށް 441 މިލިއަން ރުފިޔާ، އެންސްޕާއަށް 263 މިލިއަން ރުފިޔާގެ އިތުރުން މެޑިކަލް ކޮންޒިއުމަބަލްސަށް 200 މިލިއަން ރުފިޔާ އަދި މުސާރައަށް 24 މިލިއަން ރުފިޔާ ވަނީ ހިމަނާފައެވެ.

މި ސަޕްލިމެންޓަރީ ބަޖެޓުގައި ޖުމުލަ އާމްދަނީއާއި ހިލޭ އެހީގެ ގޮތުގައި 640 މިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ. އެއީ، ޓެކުހުގެ ގޮތުގައި ލިބޭ އާމްދަނީން އިތުރު 61 މިލިއަން އަދި އެހެނިހެން އާމްދަނީގެ ގޮތުގައި 379 މިލިއަނާއި ހިލޭ އެހީގެ ގޮތުގައި 199 މިލިއަން ރުފިޔާއެވެ.

ސަޕްލިމެންޓްރީ ބަޖެޓާ އެކު ޖުމްލަ ރިކަރަންޓް ހަރަދު 36.4 ބިލިއަން ރުފިޔާއަށް އަރާނެއެވެ. އަދި ކެޕިޓަލް ހަރަދު ނުވަތަ ޕްރޮޖެކްޓްތަކަށް ކުރާ ހޭދަ 15 ބިލިއަން ރުފިޔާ އިން 19 ބިލިއަން ރުފިޔާ އަށް އިތުރުވާނެއެވެ.

5.1 ބިލިއަން ރުފިޔާގެ ސަޕްލިމެންޓްރީ ބަޖެޓާއެކު މިއަހަރުގެ ދައުލަތުގެ ބަޖެޓް 55 ބިލިއަން ރުފިޔާއަށް އަރާނެއެވެ.