ސަރުކާރު ހިއްސާވާ ކޮންމެ ކުންފުންޏެއްގައި ޗާޓާޑް އެކައުންޓެންޓެއް ހުރުން ލާޒިމުކުރަނީ

ސަރުކާރު ހިއްސާވާ ހުރިހާ ކުންފުންޏެއްގެ މާލީ ކަންކަން ހަރުދަނާ ކުރުމުގެ ގޮތުން ކޮންމެ ކުންފުންޏެއްގައި ޗާޓާޑް އެކައުންޓެއްޓެއް ހުންނަ ގޮތަށް ޤަވާއިދު އިސްލާހު ކުރުމަށް ނިންމާފައިވާކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. މާލީ ވަޒީރު މިހެން ވިދާޅުވީ، ދައުލަތުގެ ޚަރުދުތައް ބެލެހެއްޓުމުގައި ހުރި މައްސަލަތަކާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.

މާލީ ވަޒީރު މޫސާ ޒަމީރު ވިދާޅުވީ ސަރުކާރުން ހިއްސާވާ ކުންފުނިތަކުގެ ރިފޯމް މަސައްކަތް ސަރުކާރުން ބާރަށް ކުރަމުންދާއިރު، ކުންފުނިތަކުގެ މާލީ ކަންކަން އެންމެ ރަނގަޅަށް ބައެއް ކުންފުނިތަކުގައި ބެލެހެއްޓިފައި ނެތްކަން ފާހަގަކުރެވިފައިވާ ކަމަށެވެ. އެގޮތުން ފެނަކަ ފަދަ ކުންފުނިތައް އޮޑިޓް ކުރުމަށް ދިއުމުން، އެކައުންޓެންޓެއް ނެތި ބަޔާންތައް ތައްޔާރު ނުވެ ހުރިކަން މާލީ ވަޒީރު ފާހަގަކުރެއްވިއެވެ.

މިކަންކަން ހައްލުކުރުމަށް ކުރީގެ މާލީ ވަޒީރުވެސް މަސައްކަތްތަކެއްކޮށްފައިވާކަން ފާހަގަކުރައްވާ، ވަޒީރު ވިދާޅުވީ، މިމައްސަލަ ހައްލުކުރުމަށް ރައީސުލްޖުމްހޫރިއްޔާއާއެކު ކުރެވުނު މަޝްވަރާތަކުން، ސަރުކާރު ހިއްސާވާ ކުންފުނިތަކުގެ މާލީ ބަޔާންތައް ތައްޔާރު ކުރަން ޗާޓާޑް އެކައުންޓެއްޓެއް ހަމަޖެއްސުމަށް،މިހާރު ނިންމަވާފައިވާކަމަށެވެ.

"އަޅުގަނޑު މިފަށާގަތް ހިސާބު ނުވަތަ އަޅުގަނޑު މިކުރާ ކަމަކީ، ސަރުކާރު ކޮންމެ އެސްއޯއީއެއްގެ ހިސާބުތައް ނިންމާނީ ރާއްޖޭގައި ޗާޓާޑް އެކައުންޓެންސީގެ ހުއްދަ އޮންނަ ފަރާތަކުން ކަމަށް. އޭރުން ކޮންމެ އެސްއޯއީއަކުން ޖެހޭނެ އެކައުންޓެންޓެއް ބަހައްޓައިގެން އެކައުންޓުތައް އޮޑިޓް ކުރެވޭނެ ނިޒާމެއް ރާވަން." މާލީ ވަޒީރު މޫސާ ޒަމީރު ވިދާޅުވިއެވެ.

މާލީ ވަޒީރު ވިދާޅުވި، ސަރުކާރު ހިއްސާވާ ކުންފުނިތަކުގައި ހުރި ދައުލަތުގެ މުދާތައް ބެލެހެއްޓުމުގެ ހަރުދަނާ ޤާނޫނީ ނިޒާމެއް އޮންނަން ޖެހޭކަމަށެވެ. އެކަންކަމުގައި ޒިންމާވާ ފަރާތްތައް ޖަވާބުދާރީ ކުރުވަން ޖެހޭއިރު، އެވުޒާރާގެ އެތެރޭގައި އެކަމަށް ހާއްސަ ސެކްޝަނެއް އޮންނަ ކަމަށާއި، ޤާނޫނީ ވަކި މުއައްސަސާއެއްވެސް އެކަމަށް އޮންނަ ކަމަށް ވަޒީރު ވިދާޅުވިއެވެ. އެހެންކަމުން މިކަމުގައި ޤާނޫނީ ފުށުންއެރުންތަކެއްވެސް ހުރިކަން ވަޒީރު ފާހަގަކުރެއްވިއެވެ.

މިކަމަށް އިޝާރާތް ކުރައްވާ ދައުލަތުގެ ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވީ، ޤާނޫނުތަކަށް ކުރިން ގެނެސްފައިހުރި ބަދަލުތަކާއެކު ދައުލަތުގެ ކުންފުނިތަކަށް ބަސްބުނަންވީ ފަރާތް މިހާރު ސާފުނުވާ ކަމަށެވެ. އަދި މިވޭތުވެ ދިޔަ އަހަރުތަކުގައި ސަރުކާރުގެ ކުންފުނިތަކުގެ ހިންގި ބޮޑެތި ކޮރަޕްޝަން މައްސަލަތައްވެސް ބެލޭނެ އެކަށީގެންވާ ނިޒާމެއް ނެތްކަމަށްވެސް ބަންޑާރަ ނައިބު ވިދާޅުވިއެވެ.

"ސަރުކާރު ކުންފުނިތަކަކީ ވަކިން ތަނެއް ހަދައިގެން ރެގިއުލޭޓް ކުރަންޖެހޭ ތަންތަންތޯ އަޅުގަނޑުމެން ސީރިއަސްކޮށް ބަލަމުން މިދަނީ. މީގެ ކުރިން ފިނޭންސްގެ ދަށުން ކުރިއިރު އަޅުގަނޑަށް ހީވަނީ މާ ރަނގަޅަށް މިކަން ކުރެވުނުހެން. އެހެން ކަމުން، ޤާނޫނަށް އިސްލާހު ގެންނަން ޖެހެންޔާ އެކަންވެސް ކޮށްގެން މައްސަލަ ހައްލުކުރަން މަސައްކަތް މިކުރަނީ " ބަންޑާރަނައިބު ވިދާޅުވިއެވެ.

ސަރުކާރު ހިއްސާވާ ކުންފުނިތަކުގެ ބެލެނިވެރިކަން މިހާރު ޤާނޫނީ ގޮތުން އޮންނަނީ ޕްރައިވެޓައިޒޭޝަން ކޯޕްރަޓައިޒޭޝަން ބޯޑުގެ ދަށުގައެވެ.