ނޭޝަނަލް ކެރިއަރ ސަރވިސް: މަސައްކަތު މާހައުލަށް މީހުން ބިނާކުރުމަށް ގިނަ ޕްރޮގްރާމްތަކެއް

އިޤްތިޞާދާ ބެހޭ ވުޒާރާގެ ދަށުން ހިންގަމުން އައި "ނެޝަނަލް ޖޮބް ސެންޓަރ"ގެ ދައުރު ފުޅާކޮށް "ނޭޝަނަލް ކެރިއަރ ސަރވިސް" އަށް ބަދަލުކޮށްފައިވަނީ މިއަހަރުގެ ޖުލައިމަހުއެވެ. އެ ސެންޓަރުގެ ހިންގުން މަތީ ތަޢުލީމާއި މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާގެ ދަށަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބަދަލުކުރައްވާފައެވެ.

މި ބަދަލާއެކު މަތީ ތަޢުލީމުގެ ދާއިރާއާއި ރާއްޖޭގެ ވަޒީފާގެ ބާޒާރާ ގުޅުވާލުމަށް ގިނަ މަސައްކަތްތަކެއް ކުރިއަށްގެންދިއުމަށް މަތީ ތަޢުލީމާ ބެހޭ ވުޒާރާއިން މިހާރު ވަނީ މަސައްކަތްތައް ފަށާފައެވެ.
ޖޮބް ސެންޓަރު މިހާތަނަށް ހިންގަމުން އައީ ވަޒީފާ ބޭނުންވާ މީހުންނާއި ވަޒީފާ ދޭ ފަރާތްތަކާ ގުޅުވައިދޭ ތަނެއްގެ ގޮތުގައެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މަތީ ތަޢުލީމާ މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވީ، ސަރުކާރުން މި ގެންނެވި ބަދަލާއެކު އެންމެ ބޮޑު ޢަމާޒެއް އޮތީ، ކުދިން ކުރިއަށް ދާން ބޭނުންވާ ދާއިރާތައް ޚިޔާރުކުރުމާއި އެގޮތުގައި ކުރިއަށް ދާން ބޭނުންވާ މަގު ކޮށައިދިނުންކަމަށެވެ. އަދި ކިޔަވައިގެން ނިކުންނަ ކުދިންނަކީ މަސައްކަތު މާހައުލުގެ ހުނަރުތަކާއެކު ނިކުންނަ ކުދިންކަން ކަށަވަރުކުރުމަށް މަސައްކަތްކުރުމެވެ.

ނަޒީރު ވިދާޅުވީ މި ގެނައި ބަދަލުގެ ދަށުން ހިންގާ ޕްރޮގްރާމްތައް ރާވަމުންދާކަމަށާއި އެކަމާ ގުޅޭ ޢަމަލީ ޕްރޮގްރާމްތައް ކުރިއަށް އޮތް މަހެއްހާ ދުވެހުގެ ތެރޭގައި ފަށާނެކަމަށެވެ.

"މިމަހު ފަހުކޮޅު ނޫނީ އަންނަ މަހު ކުރީކޮޅު މާލެ އަތޮޅުގައި ކެރިއަރ ގައިޑެންސް ދިނުމުގެ މަސައްކަތްތައް ބާރު ސްޕީޑްގައި ފަށާނަން. އެކަމުގެ ޕްލޭން ވަނީ ހަދާފައި. އަދި އަހަރަކު ދެފަހަރު ކެރިއަރ އެކްސްޕޯ ބާއްވާނަން." މަތީ ތަޢުލީމާ ބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވިއެވެ.

ޑރ. ނަޒީރު ވިދާޅުވީ، މިގޮތަށް ހިންގާ ޕްރޮގްރާމްތަކުގައި ކުދިން ކުރިއަށްދާން ބޭނުންވާ މަގު ޚިޔާރުކުރުމުގައި ބޭނުންވާ އެހީ ދޭނެކަމަށެވެ. އަދި މަތީ ތަޢުލީމުދޭ ރާއްޖެއާއި ރާއްޖެއިން ބޭރުގެ އިންސްޓިޓިއުޝަންތަކާ ގުޅޭ މަޢުލޫމާތު އެއް ފުރާޅެއްގެ ދަށުން ލިބޭނެ ގޮތް ހަދައިދޭނެކަމަށެވެ.

އެގޮތުން ރާއްޖެއަށް މުހިންމު ދާއިރާތަކާއި އެ ދައިރާތަކުން ހުރި ތަޢުލީމީ އަދި ތަމްރީންގެ ފުރުޞަތުތައް ކިޔައިދޭނެއެވެ. މީގެ ސަބަބުން މަސައްކަތު މާހައުލަށް ތަމްރީންވެފައިވާ ޒުވާނުންތަކެއް އުފެއްދި ވަޒީފާތައް ހޯދުމުގައިވެސް ފަސޭހަވާނެކަމަށް މަތީ ތަޢުލީމާ ބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވިއެވެ.

ރާއްޖޭގައި އަލަށް އަމަލުކުރަންފެށި އިންޑަސްޓްރިއަލް ރިލޭޝަންގެ ޤާނޫނާއި އަދި އޮކިއުޕޭޝަނަލް ސޭފްޓީ ޤާނޫނުގައި މަސައްކަތްތެރިން ބިނާކުރުމާ ގުޅޭ ގިނަ މާއްދާތަކެއް ހިމެނެއެވެ. "ނޭޝަނަލް ކެރިއަރ ސަރވިސް"އާއެކު މި ޤާނުނުތައް ތަންފީޒުކުރުމަށްވެސް މަގުފަހިވެގެންދެއެވެ.