ކުޑަކުދިން ނަމާދަށް ޝައުޤުވެރިކުރުމަށް އިމާމު ޙުސައިން ރަޝީދު ކުރެއްވީ ތަޢުރީފު ޙައްޤު މަސައްކަތެއް!

މި ޖީލުގެ ކުޑަކުދިން ދީނީ އަޅުކަންތައް އަދާކުރުމަށް ޝައުޤުވެރިކަން ކުޑަކަމުގެ ވާހަކަ މަދުންނަމަވެސް ދެކެވެއެވެ. އެހެންކަމުން ކުޑަކުދިންނަކީ ދީނީ އަޅުކަންތަކަށް ޝައުޤުވެރިކަން ހުންނަ ބަޔަކަށް ހެދުމަށް މުދައްރިސުންނާއި ބެލެނިވެރިން ގިނަ މަސައްކަތްތަކެއް ކުރެއެވެ. ޚާއްސަކޮށް އިސްލާމް ދީނުގެ ތަނބުކަމުގައިވާ ނަމާދު ކުރުމަށް ޝައުޤުވެރިކޮށް ބާރުއެޅުމަށެވެ.

މިގޮތުން ކުޑަކުދިން ނަމާދުކުރުމަށް ބަރުއަޅާ އެކުދިންނަށް ތަފާތު ކުދި އިނާމުތައް ހުށައަޅައިގެން ނަމާދުގައި ކިޔާ ތަކެތި ދަސްކޮށްދިނުމަށް އިސްލާމާއި ޤުރުއާން ކިޔަވައިދެއްވާ މުދައްރިސުން މަސައްކަތް ކުރެއެވެ. ނަމަވެސް އަމިއްލަ އަތުން ބޮޑު ޚަރަދެއްކޮށްގެން ގިނަ އަދަދެއްގެ ކުދިންތަކަކަށް އިނާމު ހުށައަޅައިގެން ނަމާދަށް ޝައުގުވެރިކުރުމަށް ޕްރޮގުރާމެއް ހިންގާނީ މަދު ބަޔެކެވެ. މިފަދަ ޕްރޮގުރާމެއް ހިންގާފައިވާ އެކަކަކީ ހއ. އިހަވަންދޫގެ ތަޢާވުން މިސްކިތުގެ އިމާމު ޙުސައިން ރަޝީދެވެ.

ޖެހިޖެހިގެން 40 ރޭ ފަތިސް ނަމާދުގެ ޖަމާޢަތަށް ހާޒިރުވާ ކޮންމެ ކުއްޖަކަށް ބައިސްކަލެއް ދޭނެކަމަށްބުނެ ޙުސައިން ރަޝީދު އިސްނަންގަވައިގެން މި ބޮޑު ޕްރޮގުރާމް ފެށީ މިދިޔަ އަހަރުގެ މެއި މަހުގެ 1 ވަނަ ދުވަހުއެވެ. މި ޕްރޮގުރާމުގައި 64 ކުއްޖަކު ބައިވެރިވިއެވެ. އެގޮތުން 40 ރެއަށްފަހު ޕްރޮގުރާމް ނިމުނުއިރު، އެއްވެސް ދުވަހެއް ވައްޓާ ނުލައި ފަތިސް ނަމާދަށް ހާޒިރުވެވުނީ 38 ކުއްޖަކަށެވެ. މި ކުދިންނަށް ބައިސްކަލު ހަވާލުކުރުމުގެ ރަސްމިއްޔާތު ރޭ ތަޢާވުން މިސްކިތުގައި ވަނީ ބާއްވާފައެވެ.

ޕްރޮގުރާމް ކުރިއަށްގެންދިޔަ މަޤުޞަދާ ބެހޭގޮތުން ޙުސައިން ރަޝީދު ވަނީ ޕީއެސްއެމް ނިއުސްއާ މަޢުލޫމާތު ޙިއްސާކުރައްވާފައެވެ.

"މި ޕްރޮގުރާމް އަޅުގަނޑު ހިންގީ ކުޑަކުދިން ނަމާދު ކުރުމަށް ޝައުޤުވެރި ކުރުވުމަށް. ނަމާދަށް އިސްކަންދިނުމާއި ޝައުގުވެރިކަން އިތުރުކުރުމަށް. މި ޕްރޮގުރާމްގެ ސަބަބުން ބެލެނިވެރިންވެސް ދަރިވަރުން ގޮވައިގެން ފަތިސް ނަމާދަށް އާދޭ. އަދި މި ޕްރޮގުރާމަށް ފަހުވެސް ގިނަ އަދަދެއްގެ ކުދިން ނަމާދަށް ޝައުޤު އުފެދި، ގިނަ ނަމާދުތަކަށް ޖަމާޢަތަށް އާދޭ މިހާރު." ޙުސައިން ރަޝީދު ވިދާޅުވިއެވެ.

ޙުސައިން ރަޝީދު ހިންގެވި މި ޕްރޮގުރާމްގައި ގުރޭޑު 2 އިން ފެށިގެން ގުރޭޑު 8 އާ ދެމެދުގެ ގުރޭޑުތަކުގައި ކިޔަވާ ދަރިވަރުން ބައިވެރިވިއެވެ. މި ދަރިވަރުންނަށް ބައިސްކަލު ހަވާލުކުރީ ޙުސައިން ރަޝީދުގެ އަމިއްލައަށް ޚަރަދުކުރައްވައިގެން އަމިއްލަފުޅަށް ބައިސްކަލު ގަތުމަށްފަހުއެވެ. އަދި ހެޔޮ އެދޭ މީހަކު 2 ބައިސްކަލެއް ހަދިޔާކުރެއްވިކަމަށްވެސް ޙުސައިން ރަޝީދު ވިދާޅުވިއެވެ.

ފަތިސް ނަމާދު ޕްރޮގުރާމް ކުރިއަށްދިޔައިރު ކީރިތި ޤުރުއާންގެ 30 ވަނަ ފޮތް ހިތުން ދަސްކޮށް، އޭނާއަށް ކިޔައިދޭ ކުދިންނަށް 500 ރުފިޔާ ދިޔައީ ދެމުންނެވެ.

ޙުސައިން ރަޝީދު ހުންނެވީ މި ޕްރޮގުރާމް ކުރިއަށްގެންދިއުމަށްފަހު ހުއްޓާލާ ގޮތަކަށް ނޫނެވެ. ރަޝީދު ބުނި ގޮތުގައި 3 މަސް ދުވަހުގެ މުއްދަތަކަށް ދީނީ އެކި މަޢުލޫމާތު ދަސްކޮށްދިނުމުގެ ޕްރޮގުރާމެއް ކުޑަކުދިންނަށް އަމާޒުކޮށްގެން ވަރަށް އަވަހަށް ފެށުމަށް ހަމަޖެހިފައިވެއެވެ. މި ޕްރޮގުރާމުގައި ދީނީ ޢިލްމުވެރިން ކިޔަވައިދެއްވާނެކަމަށްވެސް ރަޝީދު ވިދާޅުވިއެވެ.

ނަމާދަށާއި ދީނީ ކަންކަމަށް ކުޑަކުދިންގެ ހިތުގައި ޝައުޤު އުފެއްދުމަށް ޙުސައިން ރަޝީދު ކުރައްވާ މަސައްކަތުން ނަމޫނާ ލިބިގަނެ، މިފަދަ ދިވެހިންތަކެއް އަޅުގަނޑުމެންގެ މުޖުތަމަޢުގައި އުފެދެންޖެހެއެވެ. ރަޝީދުފަދަ ގިނަ ބަޔަކު ދިވެހި މުޖުތަމަޢުގައި އުފެދިއްޖެނަމަ، ދިވެހި ޤައުމުގެ ދީނީ ދަންމަރުގެ ހުޅުގަނޑު އިތުރަށް ގަދަވާނެކަން ކަށަވަރެވެ.