"އަމާން އުދަރެސް"ގެ ހުރިހައި ޓަވަރެއްގެ ސްޓްރަކްޗާގެ މަސައްކަތް ނިމިއްޖެ

ފަހި ދިރިއުޅުން ކޯޕަރޭޝަން، އެފްޑީސީން ހުޅުމާލޭގެ ދެވަނަ ފިޔަވަހީގައި ތަރައްޤީކުރަމުންދާ ޓަވަރުތަކުގެ ތެރެއިން "އަމާން އުދަރެސް"ގެ ހުރިހާ ޓަވަރެއްގެ ސްޓްރަކްޗާގެ މަސައްކަތް ނިމިއްޖެއެވެ.

އިންޑިއާގެ ކުންފުންޏެއްކަމަށްވާ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް، ކޭޕީއައިއެލްއާ ހަވާލުކޮށްގެން ތަރައްޤީކުރަމުންދާ މިޓަވަރުތަކުގެ އެންމެ ފަހު ސްލެބް އަޅާ ވަނީ ނިމިފައެވެ.

މިކަމާ ގުޅޭގޮތުން އެފްޑީސީގެ ޑިރެކްޓަރ ޙަސަން މާނިޙް އުމަރު ވިދާޅުވީ ދެން ކުރިއަށްދާނީ ފިނިޝިންގެ މަސައްކަތްތައް ކަމަށެވެ. އަދި ބާރު ދުވެލީގައި މަސައްކަތް ކުރިއަށްގެންގޮސް ހުރިހާ ޔުނިޓެއް ކަނޑައަޅާފައިވާ ވަގުތަށް ނިންމާ ހަވާލުކުރެވޭނެ ކަމަށެވެ.

"މިއަދާ ހަމައަށް މި ނިންމާލެވުނީ ކޭޕީއައިއެލްގެ 16 ޓަވަރުގެ ސްޓްރަކްޗަރަލް މަސައްކަތް. އަޅުގަނޑުމެންގެ ހުރިހާ ރިސޯސްތަކެއްދެން ބޭނުންކުރެވިގެންދާނީ ފިނިޝިން މަސައްކަތްތަކަށް. އެހެންކަމުން ފިނިޝިން މަސައްކަތްތައް ބާރު ސްޕީޑްގައި ކުރިއަށް ގެންގޮސް ހުރިހާ ޔުނިޓްތައް ކަނޑައަޅާފައިވާ ވަގުތަށް ނިންމާ ހަވާލު ކުރެވިގެންދާނެ" ޙަސަން މާނިޙް އުމަރު ވިދާޅުވިއެވ.

މިމަސައްކަތުގެ އިތުރު ތަފްސީލް ހިއްސާކުރަމުން އެފްޑީސީގެ މެނޭޖަރ ޕްރޮޖެކްޓްސް އިންޖީނިއަރިންގ، މުޙައްމަދު ހައިކަލް އިބްރާހިމް ވިދާޅުވީ މި 16 ޓަވަރުގެ ސްޓްރަކްޗާތައް އަވަހަށް ނިމުމުގެ މައިގަނޑު ސަބަބަކީ އެލުމިނިއަމް ފްރޭމްވޯކް ކޮންސްޓްރަކްޝަން މެތަޑް ބޭނުންކޮށްފައިވާތީކަމަށެވެ.

ކޭޕީއައިއެލްގެ ފަރާތުން ވާހަކަދައްކަވަމުން ޕްރޮޖެޓް ޑިރެކްޓަރ ތަންގަރާޖް ކަރްތިކެޔަން ވިދާޅުވީ، މި ހުރިހާ ޓަވަރުތަކެއް ވެސް ކަނޑައެޅިފައިވާ ވަގުތައް ނިންމާފައިވާއިރު، މިޓަވަރުތައް ނިންމާފައިވަނީ ކޮލިޓީއަށް ބުރޫނާރާ ގޮތަށްކަމަށެވެ.

ސަރުކާރުގެ "ގެދޮރުވެރިޔާ" މަޝްރޫއުގެ ދަށުން ހުޅުމާލޭގެ ދެވަނަ ފިޔަވަހީގައި އެފްޑީސީން އިމާރާތްކުރަމުންދަނީ ޖުމްލަ 4000 ހައުސިންގ ޔުނިޓްގެ 32 ޓަވަރެވެ. މި 32 ޓަވަރު ތަރައްޤީކުރުމަށް އިންޑިއާގެ ދެކުންފުންޏެއް ކަމަށްވާ ކޭޕީއައިއެލް އާއި އެންބީސީސީއާ ހަވާލުކުރީ 2021 ވަނަ އަހަރުއެވެ.

އެގޮތުން ކޭޕީއައިއެލްއިން ތަރައްޤީކުރަމުންދާ 16 ޓަވަރަށް "އަމާން އުދަރެސް" އަދި އެންބީސީސީން ތަރައްގީކުރަމުންދާ 16 ޓަވަރަށް ދީފައިވާ ނަމަކީ އަމާން ދޯދި އެވެ.

މި 4000 ހައުސިންގ ޔުނިޓްގެ މަސައްކަތްތައް އެއްކޮށް ނިމޭނެ ކަމަށް އެފްޑީސީން ލަފާކުރަނީ 2025 ވަނަ އަހަރުގެ ފުރަތަމަ އަދި ދެވަނަ ކުއާޓަރގައެވެ.