އޭޑީބީގެ ރެޒިޑެންޓް މިޝަނެއް ރާއްޖޭގައި ޤާއިމްކުރުމަށް މަޝްވަރާކޮށްފި

އޭޝިއަން ޑިވެލޮޕްމަންޓް ބޭންކު، އޭޑީބީގެ ރެޒިޑެންޓް މިޝަނެއް ރާއްޖޭގައި ގާއިމުކުރުމާއި ގުޅޭގޮތުން މަޝްވަރާކޮށްފިއެވެ.

މި މަޝްވަރާތައް ކުރިއަށް ގެންގޮސްފައިވަނީ އޭޑީބީގެ އެގްޒެކެޓިވް ޑިރެކްޓަރ ޑރ. ޖަސްޓިން ޑިއޯކްނޯ – ސިކެޓު މިހާރު ރާއްޖެއަށް ކުރައްވަމުން ގެންދަވާ ދަތުރުގެތެރެއިން މާލީ ވުޒާރާގެ އިސްވެރިންނާއެކު ބޭއްވި ބައްދަލުވުމުގައެވެ.

މާލީ ވަޒީރު ޑރ. މުޙައްމަދު ޝަފީޤު ބައިވެރިވެވަޑައިގެންނެވި މި ބައްދަލުވުމުގައި ރާއްޖޭގެ މާލީ ދާއިރާ ހަރުދަނާކުރުމަށް ކުރަމުންދާ މަސައްކަތްތަކުގެ ތަފްސީލްވަނީ އޭޑީބީގެ ވަފުދުގެ ބޭފުޅުންނާ ހިއްސާކޮށްފައެވެ. އެގޮތުން ރާއްޖެއިން ގެންނަ ފިސްކަލް ރިފޯމުތަކުގެ މައުލޫމާތުވެސް ވަނީ ހިއްސާކޮށްފައެވެ.

މީގެއިތުރުން ރާއްޖެއާއި އޭޑީބީއާ ގުޅިގެން މަސައްކަތްތައް ކުރެވެން ހުރި ދާއިރާތަކާއި އޭޑީބީގެ ރެޒިޑެންޓް މިޝަނެއް ގާއިމްކުރުމާ ގުޅޭގޮތުންވެސް ވަނީ މަޝްވަރާކޮށްފައެވެ.

Minister Dr. Shafeeq met with the Executive Director (ED) of the @ADB_HQ H.E. Dr. Justine Diokno-Sicat today. Discussions focused on fiscal reforms of the government and exploring avenues for further engagement with the @ADB_HQ. (1/2) pic.twitter.com/qc7dTEcGvT

— Ministry of Finance (@MoFmv) September 9, 2024

އޭޑީބީގެ އެގްޒެކެޓިވް ޑިރެކްޓަރ ޑރ. ޖަސްޓިން ޑިއޯކްނޯ – ސިކެޓު މިހާރު ރާއްޖެއަށް ކުރައްވާ 3 ދުވަހުގެ މި ދަތުރުގެތެރެއިން ސަރުކާރުގެ އެކި ފަރާތްތަކާއެކު ދަނީ ބައްދަލުވުންތައް ބާއްވަމުންނެވެ.

އެގޮތުން ރާއްޖޭގެ ޢުމްރާނީ ތަރައްޤީގެ ދާއިރާއިން ހިންގާ މަޝްރޫޢޫތައް ކުރިއަށްގެންދިއުމަށް ސަރުކާރުން ގެންގުޅުއްވާ ތަސައްވުރު ޢިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވަނީ އޭޑީބީގެ ބޭފުޅުންނާއެކު ބޭއްވެވި ބައްދަލުވުމުގައި ހިއްސާކުރައްވާފައެވެ.

މި ބައްދަލުވުމުގައި އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވަނީ ރާއްޖޭގެ ޢިމާރާތްކުރުމުގެ ދާއިރާގައި މި ސަރުކާރުން ކުރިއަށްގެންދާ މަޝްރޫޢުގެ މައުލޫމާތު ހިއްސާކުރައްވާފައެވެ. އަދި މި މަޝްރޫޢުތައް ކުރިއަށްގެންދިއުމަށް ދިމާވާ މާލީ ދަތިތައްވެސް ވަނީ ހިއްސާކުރައްވާފައެވެ.

އޭޝިއަން ޑިވެލޮޕްމަންޓް ބޭންކް، އޭޑީބީގެ މެމްބަރުކަން ދިވެހިރާއްޖެއަށް ލިބުނީ 1978 ވަނަ އަހަރުއެވެ. އޭޑީބީން އަންނަނީ ރާއްޖޭގެ ތަރައްޤީގެ ގިނަ މަޝްރޫޢުތަކަކަށް މާލީ ގޮތުންނާއި ފަންނީގޮތުން އެހީތެރިކަން ފޯރުކޮށްދެމުންނެވެ.