މިހާތަނަށް 13 ޖަމްޢިއްޔާއަކަށް ފައިސާގެ އެހީދީފި
-
މިއީ އެންމެ ގިނަ ޖަމްޢިއްޔާތަކަށް ފައިސާގެ އެހީ ދިން ފަހަރު
-
49 ޖަމްޢިއްޔާއަކުން ޕްރޮޕޯސަލް ހުށައެޅި
ޖަމްޢިއްޔާތައް މާލީގޮތުން ބާރުވެރިކުރުވުމަށް ކުރާ މަސައްކަތުގެ ދަށުން 13 ޖަމްޢިއްޔާއަކަށް ދައުލަތުގެ ބަޖެޓުން ފައިސާގެ އެހީތެރިކަން ދީފިއެވެ. ދައުލަތުގެ ބަޖެޓުން މިއަހަރު ފައިސާގެ އެހީ ލިބޭ މަދަނީ ޖަމްޢިއްޔާތައް ކަނޑައަޅާފައިވަނީ އެކަމަށްޓަކައި ޕްރޮޕޯސަލް ހުށައެޅުމަށް ހުޅުވާލުމުން ޕްރޮޕޯސަލްތައް ހުށައެޅި ޖަމުޢިއްޔާތަކުގެ ތެރެއިންނެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މަދަނީ ޖަމްޢިއްޔާތަކުގެ ރަޖިސްޓްރަރ ޢަލީ ޝަކީލް ވިދާޅުވީ ފައިސާގެ އެހީތެރިކަން ބޭނުންވާ ޖަމްޢިއްޔާތަކަށް ފުރުޞަތު ހުޅުވާލުމުން 49 ޖަމުޢިއްޔާއަކުން ޕްރޮޕޯސަލް ހުށައެޅިކަމަށެވެ. އަދި އޭގެ ތެރެއިން 16 ޖަމްޢިއްޔާއަކަށް ފައިސާގެ އެހީދިނުމަށް ނިންމާ، އޭގެ ތެރެއިން 13 ޖަމްޢިއްޔާއަކާއެކު އެކަމުގެ އެއްބަސްވުމުގައި ސޮއިކޮށްފައިވާކަމަށް ޝަކީލް ވިދާޅުވިއެވެ.
ޖަމްޢިއްޔާތަކުން ކުރިއަށް ގެންދާ މަޝްރޫޢުތަކަށް ފައިސާ ހަމަޖައްސާފައިވަނީ 2 ފަރާތުގެ މަޝްވަރާއާއެކުކަމަށް ޝަކީލް ވިދާޅުވިއެވެ. އެގޮތުން 16 ޖަމްޢިއްޔާއަކަށް ދޭ އެހީއަށް 3 މިލިޔަން ރުފިޔާ ޚަރަދުވާކަމަށް އޭނާ ވިދާޅުވިއެވެ. އަދި މިއީ ފަހުގެ ތާރީޚުގައި އެންމެ ގިނަ ޖަމްޢިއްޔާތަކަށް އެއްފަހަރާ ފައިސާގެ އެހީ ފޯރުކޮށްދޭފަހަރުކަން އޭނާ ފާހަގަކުރެއްވިއެވެ.
މި މަސައްކަތާ ގުޅޭގޮތުން ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވަޒީރު އިބްރާހީމް ވަޙީދު ވިދާޅުވީ ބައެއް ޖަމްޢިއްޔާތަކުން ހުށައެޅި މަޝްރޫޢުތަކަކީ ސަރުކާރުން މިހާރުވެސް ކުރިއަށް ގެންދިޔުމަށް ނިންމާފައިވާ މަޝްރޫޢުތަކެއްކަމަށެވެ. އެހެންކަމުން އެ މަސައްކަތް ކޮށްދޭނެ އިންތިޒާމްތައް ހަމަޖެއްސުމަށްޓަކައި ބޭނުންވާ އެހީތެރިކަން ފޯރުކޮށްދެމުން ގެންދަވާނެކަމަށް ވަޒީރު ވިދާޅުވިއެވެ.
ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން ވިދާޅުވީ އެހީ ފޯރުކޮށްދިން ޖަމްޢިއްޔާތަކުން ކުރިއަށް ގެންދިޔުމަށް ނިންމާފައިވާ މަޝްރޫޢޫތަކުގެ ތެރޭގައި ހޭލުންތެރިކަމުގެ ޕްރޮގްރާމްތައް ހިންގުމަށާއި ޕާކް ތަރައްޤީކުރުންފަދަ އިޖްތިމާޢީ ދާއިރާއިން ފާހަގަކޮށްލެވޭ މަޝްރޫޢޫތައް ހިމެނޭކަމަށެވެ.
ސަރުކާރުގެ ބަޖެޓުން ޖަމްޢިއްޔާތަކަށް ފައިސާ ދޭން ނިންމީ މުޖުތަމަޢު ބާރުވެރިކުރުވުމަށް ޖަމްޢިއްޔާތަކުން ކުރާ މަސައްކަތްތަކަށް އެއްބާރުލުން ދިނުމާއެކު ޤައުމީ ތަރައްގީގައި ޖަމުޢިއްޔާތަކުން އަދާކުރާ ދައުރު ފުޅާކުރުމަށެވެ.
ރާއްޖެގައި 3000 އަށް ވުރެ ގިނަ ޖަމުޢިއްޔާ ދަފްތަރުގައި ރަޖިސްޓްރީކޮށްފައި އޮތްތަނަމަވެސް އޭގެ ތެރެއިން ހަރަކާތްތެރިކޮށް އުޅޭނީ 600 އެއްހާ ޖަމްޢިއްޔާކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން ވިދާޅުވެއެވެ.