ގަރލްގައިޑްގެ ސަބަބުން ހަރުދަނާ ޝަޚުސިއްޔަތަކަށްވުމުގެ ފުރުސަތު ލިބޭ: މެޑަމް ސާޖިދާ

ގަރލްގައިޑް ޙަރަކާތުގެ ސަބަބުން ހަރުދަނާ ޝަޚުސިއްޔަތުތަކަށްވުމުގެ ފުރުސަތު އަންހެން ކުދިންނަށް ފަހިވެގެންދާކަމަށް ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ސާޖިދާ މުޙައްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވީ ވޯލްޑް އެސޯސިއޭޝަން އޮފް ގަރލްގައިޑްސް އެންޑް ގަރލް ސްކައުޓުން އިންތިޒާމްކުރާ "ޔަންގ ވިމެން އިން ގަވަރނަންސް ވަރކްޝޮޕް" ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.

"ޔަންގ ވިމެން އިން ގަވަރނަންސް ވަރކްޝޮޕް"ގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ސާޖިދާ މުޙައްމަދު ވިދާޅުވީ ގަރލްގައިޑް ޙަރަކާތާއެކު މިއަދު ކުރެވޭ މަސައްކަތުގެ ފޮނިމީރުކަން އަންނަންއޮތް ޖީލުތަކަށް ލިބޭނެކަމަށެވެ. އަދި ދުނިޔޭގެ ހުރިހާ ހިސާބެއްގައިވެސް އަންހެން ކުދިންގެ ކުރިއެރުމަށްޓަކައި ގައިޑް އެސޯސިއޭޝަންތަކުން ކުރާ މަސައްކަތް މެޑަމް ސާޖިދާ ފާހަގަކުރެއްވިއެވެ. މީގެއިތުރުން ގަރލްގައިޑްގެ ޙަރަކާތަކީ ހަމައެކަނި ލީޑަރުން ބިނާކުރުން ނޫންކަމަށާއި އެއީ އަންހެނުންގެ ތަރައްޤީއަށް ކުރެވޭ ވަރަށް ބޮޑު މަސައްކަތެއްކަންވެސް އެކަމަނާ ފާހަގަކުރެއްވިއެވެ.

"މިފުރުސަތުގައި ފަހަގަކޮށްލަން ބޭނުން އަދިވެސް ގުޅިގެން މަސައްކަތް ކުރަންވީ ދާއިރާތަށް. އެއީ ޓެކްނޮލޮޖީއާއި ޒަމާނީ ވަޞީލަތްތަކަށް އަހުލުވެރި ބަޔަކަށް އަންހެންކުދިން ހަދަންޖެހޭ. މިފަދަ ކަންކަމުގައި އަދިވެސް ބޮޑަށް މަދަނީ ޖަމިއްޔާތަކާއި އެކި އިދާރާތަކާއި ގުޅިގެން މަސައްކަތް ކުރަންޖެހޭކަން ފާހަގަކޮށްލަން." ޗީފް ގައިޑް ސާޖިދާ މުޙައްމަދު ވިދާޅުވިއެވެ.

މިރަސްމިއްޔާތުގައި އިޖުތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ.ޢައިޝަތު ޝިހާމް ދެއްކެވި ވާހަކަފުޅުގައި އެކަމަނާ ގައިޑް ހަރަކާތުގައި އުޅުއްވި ދުވަސްވަރުގެ ހަނދާންތަކާއި އެކަމުގެ ސަބަބުން ދިރިއުޅުމަށް އައި ހެޔޮ ބަދަލު ހިއްސާކުރެއްވިއެވެ. އަދި ގައިޑްގެ ޙަރަކާތަކީ އިޖުތިމާޢީ އެތައް ގުޅުމެއް ބަދަހިކުރުމަށް ލިބޭ ފުރުސަތެއްކަންވެސް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ މިއަދު ދުނިޔޭގެ ކޮންމެ ހިސާބަކަށް ބެލިނަމަވެސް ފެންނަނީ ނަފްސާނީ ބަލިތަކާއި އެހެނިހެން ބަލިތަކަށް މީހުން ހުށައެޅެމުންދާ ނިސްބަތް އިތުރުވަމުންދާ މަންޒަރުކަމަށެވެ. އެހެންކަމުން މިފަދަ ޒަމާނެއްގައި ގައިޑްގެ އަސާސްތަކުގައި ހިމެނޭ މުހިއްމު ކަންކަމުގައި ހިފައިގެން މުޖްތަމަޢުއަށް ހެޔޮ ބަދަލެއް ގެނައުމަށް މަސައްކަތްކުރަންޖެހޭކަން ވަޒީރު ފާހަގަކުރެއްވިއެވެ.

"ދިރާސާތަކުން އަދި ސަރވޭތަކުން އެބަދައްކާ އެކަނިވެރިކަމަކީ ނަފްސާނީ އެތައް މައްސަލައަށް މަގުފަހިކުރާކަމެއްކަން. މިފަދަ ޒަމާނެއްގައި ގުޅިގެން ހައްލަކާ ދިމާއަށް މަސައްކަތްކުރަންޖެހޭއިރު ގަރލްގައިޑްގެ ތެރެއިން އެފުރުސަތު އެބައޮތް. ގައިޑްގެ ޙަރަކާތަކީ ގުޅުންތައް ބަދަހިވެފައިވާ ހަރުދަނާ މުޖުތަމަޢެއް ބިނާކުރުމުގައި މުހިއްމު ބައެއް." ވަޒީރު ވިދާޅުވިއެވެ.

"ޔަންގ ވިމެންއިން ގަވަރނަންސް ވަރކްޝޮޕް"އަކީ 2017 ވަނަ އަހަރު އިންޑިއާގައި ބޭއްވި 36 ވަނަ ބައިނަލްއަޤުވާމީ ކޮންފަރެންސް "މޯޝަން 32"ގެ ދަށުން ބާއްވަމުންދާ ވޯކްޝޮޕެކެވެ.

މިއީ ވޯލްޑް އެސޯސިއޭޝަން އޮފް ގަރލްގައިޑްސް އެންޑް ގަރލް ސްކައުޓްގެ ފަރާތުން އަންހެން ކުދިން ބިނާކޮށް ކުރިއެރުވުމަށް ބާއްވަމުންދާ ވޯކްޝޮޕެކެވެ. މިވޯކްޝޮޕްގެ ތެރެއިން ކުރިއަށް އޮތް 4 ދުވަހު ހިންގުމުގެ ދާއިރާގައި، ޙަރަކާތްތެރިވުމަށް ބޭނުންވާ ހުނަރުތައް ދަސްކޮށްދިނުމާއި ނަފްސުގެ ކުރިއެރުމަށް ބޭނުންވާ ހުނަރުތައް ދަސްކޮށްދިނުމަށް ވަނީ ހަމަޖެހިފައެވެ. މިވޯކްޝޮޕްގައި ދުނިޔޭގެ 19 ޤައުމަކުން 22 ގަރލްގައިޑުން ބައިވެރިވެއެވެ.