ފަތުރުވެރިކަމުގެ ދާއިރާގެ 1000އަށްވުރެ ގިނަބައިވެރިންނާއެކު ޓީޓީއެމް މޯލްޑިވްސް ފަށައިފި

ފަތުރުވެރިކަމުގެ ދާއިރާގައި ހަރަކާތްތެރިވާ 1000އަށް ވުރެ ގިނަ ބައިވެރިންނާއެކު މިއަހަރުގެ ޓީޓީއެމް މޯލްޑިވްސް ފަށައިފިއެވެ.

ރާއްޖޭގައި ބާއްވާ ފަތުރުވެރިކަމުގެ އެންމެ ބޮޑު ޓްރޭޑު ޝޯކަމަށްވާ ޓީޓީއެމް މޯލްޑިވްސް ކުރިއަށްދާނީ މާދަމާގެ ނިޔަލަށް މީރުމާގައެވެ.

މިއަހަރުގެ ޓީޓީއެމް މޯލްޑިވްސްގައި 3000 ޕްރީ ޝެޑިއުލް މީޓިން ކުރިއަށްދާނެއެވެ. އަދި ދާއިރާގެ 500 އެއްހާ މީހުން ބައިވެރިވެއެވެ. އެގޮތުން މިއަހަރުގެ ޓީޓީއެމްގައި 100އަށްވުރެ ގިނަ ރިސޯޓުން ބައިވެރިވެފައިވާއިރު 250އަށްވުރެ އެޖެންޓުންނާއި ޓުއަރ އޮޕަރޭޓަރުން ބައިވެރިވެއެވެ.

ޓީޓީއެމް މޯލްޑިވްސްއަކީ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތައް އެއްތަނަކުން ބައްދަލުކޮށް، ވިޔަފާރީގެ ގުޅުންތައް ބަދަހިކުރުމުގެ ފުރުސަތު ފަހިކޮށްދޭ ހަރަކާތެކެވެ.

މިއަހަރުގެ ޓީޓީއެމް މޯލްޑިވްސް ހުޅުވުމުގެ ރަސްމިއްޔާތު ޝަރަފްވެރިކޮށްދީ ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލްއެވެ. ވަޒީރު ވަނީ ރާއްޖޭގެ ފަތުރުވެރިކަމަށް މިފަދަ ޓްރޭޑު ޝޯތައް މުހިއްމުކަން ފާހަގަކުރައްވާފައެވެ.

އަދި ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމަށް ސިނާއަތުގެ ހުރިހާ ފަރާތްތައް ގުޅިގެން މަސައްކަތްކުރުމަށްވެސް ވަޒީރު ވަނީ އެދިވަޑައިގަންނަވާފައެވެ.

ޓީޓީއެމް ފެށުމުގެ ރަސްމިއްޔާތުގައި މާސްޓަރ ކާޑު، ޓްރިޕް އެޑްވައިޒަރ އަދި ފިލިގީ ފަދަ ބައިނައަލްއަޤްވާލީ ކުންފުނިތަކުން ޕްރެޒެންޓޭޝަންތައްވަނީ ހުށަހަޅާފައެވެ.

މިއަހަރުގެ ޓީޓީއެމް އެވޯޑްސް ހަފްލާ އާއި ގާލާ ނައިޓު ބޭއްވުމަށް ހަމަޖެހިފައިވަނީ އަދާރަން ސިލެކްޓު ހުދުރަންފުށީގައެވެ.

ޓީޓީއެމްއަކީ ރާއްޖޭގެ ފަތުރުވެރިކަމުގައި ހަރަކާތްތެރިވާ ފަރާތްތަކާއި ދުނިޔޭގެ ބޮޑެތި ޓްރެވެލް އޭޖެންޓުންނާއި ގުޅުވާލަން ރާއްޖޭގައި ކުރިއަށްގެންދާ އެންމެ ބޮޑު ޓްރެވެލް ޓްރޭޑް ހަރަކާތެވެ. މިއަހަރު މިބާއްވަނީ ޓީޓީއެމް 8 ވަނަ ހަރަކާތެވެ.