ޔޫރޮޕާ ކޮންފަރެންސް ލީގުގެ ޕްލޭ އޮފްގައި ސްވިޒަލޭންޑްގެ ސަރވެޓް އާއި ދެކޮޅަށް ޗެލްސީ އަންނަ ބުރާސްފަތި ދުވަހު ކުޅޭ މެޗަށް ޔޫއެފާގައި ރަޖިސްޓަރ ކުރި ސްކޮޑުން ރަހީމް ސްޓާލިން އުނިކޮށްފި އެވެ.
ވިދިވިދިގެން ދެވަނަ ފަހަރަށް ޗެލްސީގެ މެޗު ސްކޮޑުން ސްޓާލިންއަށް ފުރުސަތު ގެއްލިފައިވާއިރު، އޭނާ ވަނީ ޕްރިމިއާ ލީގުގެ ފުރަތަމަ މެޗުގައި މެންޗެސްޓަރ ސިޓީ އާއި ދެކޮޅަށް ކުޅުނު މެޗުން ފުރުސަތު ލިބިފައިނުވާތީވެސް އެކަމާއި ހިތްހަމަ ނުޖެހުން ފާޅު ކޮށްފަ އެވެ. އަދި ޗެލްސީގައި ސްޓާލިންގެ މުސްތަގްބަލް އޮތީ ކިހިނެއްކަން ސާފުވާންޖެހޭކަމަށް ބުނެ އޭނާގެ ފަރާތުންވަނީ މީގެ ކުރިން ބަޔާނެއްވެސް ނެރެފައެވެ.
މި ސީޒަނަށް ތައްޔާރުވުމުގެ ގޮތުން ޗެލްސީން ވަނީ 185 މިލިއަން ޕައުންޑް ޚަރަދުކޮށް އެގާރަ ކުޅުންތެރިއަކު ހޯދާފައެވެ. އަދި ކޯޗް މަރެސްކާއަށް ފުރަތަމަ ޓީމު ނަގަން ސާޅީސް ކުޅުންތެރިންގެ ސްކޮޑެއް ވަނީ ލިބިފައެވެ.
ސްޓާލިން 2022 ވަނަ އަހަރު ޗެލްސީ އާއި ގުޅިފައިވަނީ 50 މިލިއަން ޕައުންޑްގެ ޓްރާންސްފާ ފީއަކަށް މެންޗެސްޓަރ ސިޓީންނެވެ. މި މުއްދަތުގެ ތެރޭގައި ޗެލްސީއަށް ކުޅެދިން މެޗުތަކުގައި ސްޓާލިން އަށް ޖެހިފައިވަނީ 19 ގޯލެވެ.
ކޮންފަރެންސް ލީގުގެ ޕްލޭއޮފް މެޗަށް ޗެލްސީން ތައްޔާރުވާއިރު، ޕްރިމިއާ ލީގުގެ ފުރަތަމަ މެޗުން ޗެލްސީ ވަނީ މެންޗެސްޓަރ ސިޓީ އަތުން 2-0 ގެ ނަތީޖާއަކުން ބަލިވެފައެވެ.