ކުޑަކުދިންނަށް ދޭ ބޭހެއް ކަމަށްވާ ކޮފްސީ ސިރަޕް ބޭނުންކުރުން މަނާކޮށްފި
-
ކޮފްސީ ސިރަޕްގައި ކުނޑި ކޮޅުތަކެއް ހުންނަކަން ވަނީ ފާހަގަކުރެވިފައި
-
ބޭހުގެ ރައްކާތެރިކަން ކަށަވަރުކުރުމަށް މިކަންތައް އިތުރަށް ބެލުމުގެ މަސައްކަތް ދަނީ ކުރަމުން
-
ވަކިގޮތެއް އަންގަންދެން ރާއްޖެ އެތެރެކުރުމާއި، ވިއްކުމާއި، ބޭނުން ކުރުންވަނީ މަނާކޮށްފައި
ރޯގާ އާއި ކެއްސުމަށް، އާއްމުގޮތެއްގައި ކުޑަކުދިންނަށް ދޭ ބޭހެއް ކަމަށްވާ ކޮފްސީ ސިރަޕްގެ ކޮލިޓީގެ މައްސަލަތަކަށް ފާހަގަކުރެވި ވަކި ގޮތެއް އަންގަންދެން އެބޭސް ރާއްޖެ އެތެރެކުރުމާއި، ވިއްކުމާއި، ބޭނުން ކުރުން މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭއިން މަނާކޮށްފިއެވެ.
އެމްއެފްޑީއޭއިން ވިދާޅުވީ ކޮފްސީ ސިރަޕްގައި ކުނޑި ކޮޅުތަކެއް ހުންނަކަން ފާހަގަކުރެވިފައިވާ ކަމަށެވެ. އަދި މިބޭހުގެ ރައްކާތެރިކަން ކަށަވަރުކުރުމަށްޓަކައި މިކަންތައް އިތުރަށް ބެލުމުގެ މަސައްކަތް ކުރަމުންދާކަމަށެވެ.
އެމްއެފްޑީއޭއިން ވިދާޅުވީ ދިމާވެފައިވާ މިމައްސަލަ އެއޮތޯރިޓީން ބެލުމަށްފަހު ވަކި ގޮތެއް އަންގަންދެން އެބޭސް ރާއްޖެއަށް އެތެރެކުރުމާއި، ވިއްކުމާއި ބޭނުން ކުރުން މަނާކޮށްފައިވާ ކަމަށެވެ.
މިކަމާ ބެހޭ އިތުރު މައުލޫމާތު ބޭނުންވާ ފަރާތްތަކުން އެއޮތޯރިޓީގެ ހޮޓްލައިން ނަންބަރު 7200321 އަށް ގުޅުމަށްވެސް އެ އޮތޯރިޓީންވަނީ އެދިވަޑައިގެންފައެވެ.
މި ބޭހަކީ އިންޑިއާގެ އެމްއެމްސީ ހެލްތު ކެއަރ ލިމިޓެޑް ކިޔާ ކުންފުންޏަކުން އުފައްދާ ބޭހެކެވެ.