"ދިވެހީންގެ އުފެއްދުންތެރިކަމުގެ މަޢުރަޒު" އަންނަ މޭމަހު ބާއްވަނީ

"ދިވެހީންގެ އުފެއްދުންތެރިކަމުގެ މަޢުރަޒު" އަންނަ އަހަރުގެ މެއި މަހުގެ 23 އިން 31 އަށް ބޭއްވުމަށް ނިންމައިފިއެވެ.

ހުޅުމާލެ ސެންޓްރަލް ޕާކްގައި ބާއްވާ މި މަޢުރަޒަކީ މަސައްކަތްތެރިންގެ ހުނަރު ކުރިއަރުވައި ތަރައްްޤީކުރުމަށް ބާރުއަޅައި، ދިވެހިންގެ ހުނަރުވެރި އުފެއްދުންތައް އެއްތާކުން ފެންނާނެ އިންތިޒާމު ހަމަޖެއްސުމަށް ބާއްވާ މަޢުރަޒެކެވެ.

"ދިވެހީންގެ އުފެއްދުންތެރިކަމުގެ މަޢުރަޒު" އާ ގުޅޭ ތަފްސީލްތައް ދިނުމަށްޓަކައި ބޭއްވި ނޫސްވެރިންގެ ބައްދަލުވުމުގައި އިޤްތިސާދީ ތަރައްޤީއާއި ވިޔަފާރިއާބެހޭ ވުޒާރާގެ ނައިބް ޞާލިޙް ޙުސައިން ވިދާޅުވީ 81 ދާއިރާއަކުން ވާދަކުރުމުގެ ފުރުސަތު މި މަޢުރަޒުގައި އޮންނާނެ ކަމަށެވެ. ޢަދި މި ދާއިރާތަކުގައި ބައިވެރިވުމުގެ ފުރުސަތު ވަރަށް އަވަހަށް ހުޅުވާލާނެ ކަމަށް ޞާލިޙް ވިދާޅުވިއެވެ.

"އަމިއްލަ ފަރުދުންގޮތުގައިވެސް، ރަށު ފެންވަރުގައިވެސް، ސިޓީތަކުގެ ފެންވަރުގައިވެސް ، ވިޔަފާރި ރަޖިސްޓްރީކުރުމުގެ ޤާނޫނުގެ ދަށުުން ހިމެނޭ ވިޔަފާރިތަކުގެ އަދި ތައުލީމުދޭ މަރުކަޒުގެ ދާއިރާއިން، ހާއްސަ އެހީއަށް ބޭނުންވާ ފަރާތްތަކުން ދާއިރާއިން ބައިވެރިވުމުގެ ފުރުސަތު އޮންނާނެ ވާދަ ކުރުމުގެ ދާއިރާއިން،" ޞާލިޙް ވިދާޅުވިއެވެ.

މި މަޢުރަޒުގައި ވާދަކުރުމުގެ ބައިގެ އިތުރުންވެސް ތަފާތު އެކި ކަހަލަ ޑިސްޓްރިކްޓްތަކުގައި ބައިވެރިވުމުގެ ފުރުސަތު އޮންނާނެ ކަމަށް ޞާލިޙް ވިދާޅުވިއެެވެ. އިޤްތިސާދީ ތަރައްޤީ އާއި ވިޔަފާރިއާބެހޭ ވުޒާރާއިން މިހާރުވަނީ މަޢުރަޒާއި ގުޅުން ހުރި ކަންކަމުގައި އަމަލު ކުރާނެގޮތުގެ ޢުޞޫލު ގެޒެޓުކޮށްފައެވެ.

ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާ ކުރުމުގެ މަޤްޞަދުގައި، ވިޔަފާރިއާއި އުފެއްދުންތެރިކަމަށް އަމާޒުކޮށް މަޢުރަޒެއް ބޭއްވުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ މިއަހަރުގެ މެއި މަހުގެތެރޭގައެވެ.

ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާ ކުރުމުގެ މަޤްޞަދުގައި، ވިޔަފާރިއާއި އުފެއްދުންތެރިކަމަށް އަމާޒުކޮށް ބާއްވާ މި މަޢުރަޒަކީ ވާދަވެރި މާހައުލެއްގައި ބާއްވާ މަޢުރަޒަކަށް ހެދުމަށްޓަކައި، އެކި ދާއިރާތަކުން ވާދަކުރެވޭގޮތަށް މި މަޢުރަޒު ކުރިއަށް ގެންދެވުމަށާއި، ކްރިއޭޓިވް އިކޮނޮމީ ޑިސްޓްރިކްޓާއި، ޑިޖިޓަލް އެންޑް އިނޮވޭޓިވް ޑިސްޓްރިކްޓާއި، އެންޓަރޓެއިންމަންޓް ޑިސްޓްރިކްޓް އަދި މާރކެޓް ޕްލޭސް ޑިސްޓްރިކްޓް ހިމަނައިގެން މި މަޢުރަޒު ބޭއްވުމަށްވެސް ނިންމަވާފައިވެއެވެ.

މި މަޢުރަޒު އިންތިޒާމްކޮށް ހިންގުން އިޤްތިސާދީ ތަރައްޤީ އާއި ވިޔަފާރި އާއި ބެހޭ ވުޒާރާ އާއި ބިޒްނަސް ސެންޓަރ ކޯޕަރޭޝަން (ބީ.ސީ.ސީ) ގުޅިގެން ކުރިއަށް ގެންދެވުމަށް ވަނީ ނިންމަވާފައެވެ.