ހުޅުމާލޭގައި ބުޓީކް ހޮޓާ ތަރައްޤީކުރަން ހުޅުވާލައިފި

ހުޅުމާލެ ދެވަނަ ފިޔަވަހީގެ އިންޓަރގްރޭޓެޑް ޓޫރިޒަމް ޒޯން، އާބަން އައިލްގައި ބުޓީކް ހޮޓެލްތަކެއް ތަރައްގީކޮށް ހިންގަން ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓްރެސްޓް، އީއޯއައި ހުށަހެޅުމުގެ ފުރުޞަތު ހުޅުވާލައިފިއެވެ.

ހައުސިން ޑިވެލޮޕްމަންޓު ކޯރޕަރޭޝަން، އެޗްޑީސީއިން ބުނީ އެ މަޝްރޫއު ހަވާލުކުރުމުގައި އިސްކަންދޭނީ ލޭންޑް ލީސް މޮޑެލްއަށްކަމަށެވެ. އެހެން ނަމަވެސް، އެހެން މޮޑެލްތަކަށް ވެސް ހުށަހެޅިދާނެކަމަށް އެކޯޕަރޭޝަނުން ބުނެއެވެ.

ބުޓީކް ހޮޓެލް ތަރައްޤީކުރުމަށް ހުޅުވާލާފައިވަނީ 3 ބިމެއްގައެވެ. އެޗްޑީސީއިން ބުނީ އެއް ފަރާތަށްވުރެ ގިނަ ފަރާތުން އެ މަޝްރޫއުތަކަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ މަޝްރޫޢު ހަވާލު ކުރާނީ އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކަށް ކަމަށެވެ.

އީއޯއައިތައް އިވެލުއޭޓް ކުރުމުގައި ބަލާނެ ކަންތައްތަކުގެ ތެރޭގައި ހުށަހަޅާފައިވާ ވިޔަފާރީގެ މޮޑަލްއާއި، މަސައްކަތުގެ ތަޖުރިބާ އާއި މާލީ ޤާބީލްކަމަށް ބަލާނެކަމަށް އެޗްޑީސީން ބުނެއެވެ. ހޮޓެލް ތަރައްގީކޮށް ހިންގަން ޝައުގުވެރިވާ ފަރާތްތަކުން އީމެއިލް މެދުވެރިކޮށް އަންނަ މަހުގެ 1ވަނަ ދުވަހުގެ 14:00ގެ ކުރިން ކުރިން އީއޯއައި ހުށަހަޅަންޖެހެއެވެ.

އާބަން އައިލްއަކީ ހުޅުމާލޭގެ އެންމެ އުތުރުން އޮންނަ ފަތުރުވެރިކަމަށް ޚާއްސަ ކޮށްފައިވާ ސަރަހައްދެކެވެ.

ގާތްގަނޑަކަށް 23 ހެކްޓަރުގެ މިރަށުގައި ފަތުރުވެރިންނަށް ޚާއްޞަ ތަފާތު ގިނަ އެކޮމަޑޭޝަން ފެސިލިޓީތައް ހިމެނޭނެކަމަށް އެޗްޑީސީން ބުނެއެވެ. އެގޮތުން ޗުއްޓީ ހޭދަކުރުމަށް އަންނަ ފަތުރުވެރިންގެ އިތުރުން، ކުރު މުއްދަތަކަށް ނުވަތަ ޓްރާންސިޓްކޮށް މަޑުކުރާ ފަތުރުވެރިންނަށާއި، ވިޔަފާރި ބޭނުންތަކަށް އަންނަ ފަތުރުވެރިން، އަދި ޑިޖިޓަލް ނޮމެޑްސް ފަދަ ދިގު މުއްދަތަކަށް މަޑުކުރަން ބޭނުންވާ ފަރާތްތަކަށްވެސް ބޭނުންވާ ފަދަ އެކޮމޮޑޭޝަންތައް ހިމެނޭނެ ކަމަށް އެޗްޑީސީން ބުނެއެވެ.

ދާދިފަހުން އެޗްޑީސީން ވަނީ އާބަން އައިލްގައި މެދުފަންތީގެ ތިން ހޮޓާ ތަރައްގީކޮށް ހިންގަން ޝައުގުވެރިވާ ފަރާތްތަކުން އީއޯއައި ހުށަހެޅުމުގެ ފުރުޞަތުވެސް ހުޅުވާލާފައެވެ.