އަމާޒަކީ ފަންނިއްޔާތު ބޭނުންކޮށްގެން ހަމަހަމަ ތަޢުލީމީ ނިޒާމެއް މުޅި ރާއްޖޭގައި ޤާއިމްކުރުން: ޑރ.މާރިޔާ

ފަންނިއްޔާތުގެ އެކި ވަޞީލަތްތައް ބޭނުންކޮށްގެން ކިޔަވައިދިނުމުގައި ހަމަހަމަ ނިޒާމެއް މުޅި ރާއްޖޭގައި ޤާއިމުކުރުމަކީ އަމާޒެއްކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

ވަޒީރު މިހެން ވިދާޅުވީ، ޗައިނާއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން ގްލޯބަލް ސްމާޓް އެޑިޔުކޭޝަން ކޮންފެރެންސް ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ގްލޯބަލް ސްމާޓް އެޑިޔުކޭޝަން ކޮންފެރެންސް، ޖީ.އެސް.އީ.ސީ ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މަތީ ތަޢުލީމާބެހޭ ވަޒީރު ޑރ. މަރްޔަމް މާރިޔާ ވިދާޅުވީ އަމާޒަކީ ފަންނިއްޔާތުގެ ވަޞީލަތްތައް ބޭނުންކޮށްގެން ރާއްޖޭގެ ހުރިހާ ރަށަކަށް އެއް ފެންވަރެއްގެ ތަޢުލީމީ ނިޒާމެއް ޤާއިމްކުރުން ކަމަށެވެ. އެގޮތުން ފަންނިއްޔާތުގެ ވަޞީލަތްތަކާއެކު މާލެއެކޭ އެއް ފެންވަރަށް އަތޮޅު ތެރޭގައިވެސް ކިޔައިވައިދެވިދާނެކަން ވަޒީރު ފާހަގަކުރެއްވިއެވެ.

ވަޒީރު ޑރ. މާރިޔާ ވިދާޅުވީ، ރާއްޖޭއަކީ ޖަޒީރާ ޤައުމަކަށްވުމުން ހުރިހާ ރަށެއްގައި ފަންނިއްޔާތުގެ ވަސީލަތްތަށް ބޭނުންކޮށްގެން އެއް ފެންވަރެއްގެ ތަޢުލީމު ފޯރުކޮށްދިނުމުގައި ގޮންޖެހުންތައް އެބަހުރި ކަމަށެވެ. ނަމަވެސް އަމާޒަކީ މި ގޮންޖެހުންތަކުން އަރައިގަނެ، އެއް ފެންވަރެއްގެ ތަޢުލީމެއް ހުރިހާ ރަށަކަށްވެސް ފޯރުކޮށްދިނުންކަމަށް ވަޒީރު ވިދާޅުވިއެވެ.

މަތީ ތަޢުލީމާބެހޭ ވަޒީރު ވިދާޅުވީ، ފަންނިއްޔާތު ބޭނުންކޮށްގެން އުނގަންނައިދޭއިރު، އާޓިފިޝަލް އިންޓަލެޖެންސް، އޭއައިގެ ދައުރު ބޮޑު ކަމަށެވެ. އެގޮތުން އޭއައި ބޭނުންކުރާއިރު ސަމާލުވާންޖެހޭ ގިނަ ކަންތައްތަކެއް ހުރިކަން ފާހަގަކުރައްވަމުން ވަޒީރު ވިދާޅުވީ، ދަރިވަރުންނާއި މުދައްރިސުން އޭއައިއަށް އަހުލުވެރިވުން މުހިންމު ކަމަށެވެ. ރާއްޖޭގެ ޤައުމީ މަންޙަޖުގެ މުޤައްރަރުގައި އޭއައިއާބެހޭ މަޢުލޫމާތު ހިމެނުން މުހިންމުކަން ޑރ. މަރިޔަމް މާރިޔާ ފާހަގަކުރެއްވިއެވެ.

"ތަޢުލީމީ ދާއިރާގައި ފަންނިއްޔާތު ބޭނުންކުރާއިރު، ޓެކްނޮކޮޖީއާއި ގުޅޭ އުސޫލުތަކާއި ގަވާއިދުތަށް އުފައްދައި، އެ ގަވާއިދުތަށް ތަންފީޒުކޮށް، ފަންނިއްޔާތުގެ ސަބަބުން އާންމުންނަށް ލިބިދާނެ ގެއްލުންތަކުން ހިމާޔަތް ހޯދައިދިނުން މުހިންމު." ވަޒީރު ވިދާޅުވިއެވެ.

މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ. މަރްޔަމް މާރިޔާ މިހާރު ޗައިނާއަށް ކުރައްވަމުންގެންދަވާ ދަތުރުފުޅަކީ ބެއިޖިން ނޯމަލް ޔުނިވަރސިޓީގެ ދަޢުވަތަކަށް ކުރައްވާ ދަތުރުފުޅެކެވެ.

މި ދަތުރުފުޅުގެ ތެރެއިން "ރައުންޑް ޓޭބަލް އޮން ވިމެންސް ލީޑަރޝިޕް އިން ދަ އޭޖް އޮފް އޭއައި" ގައި ޕެނަލިސްޓެއްގެ ގޮތުގައި ބައިވެރިވެވަޑައިގަތުމަށް ވަނީ ހަމަޖެހިފައެވެ. މީގެ އިތުރުން ބެއިޖިން ނޯމަލް ޔުނިވަރސިޓީ އިން އިންތިޒާމްކުރާ "ޑިވެލޮޕްމަންޓް އެންޑް ޔޫސް އޮފް ޑިޖިޓަލް ޓެކްސްޓް ބުކް" ފޯރަމްގައިވެސް ވަޒީރު ބައިވެރިވަޑައިގަންނަވާނެކަމަށް މަތީ ތައުލީމާބެހޭ ވުޒާރާއިން ވިދާޅުވެއެވެ.