ފަތުރުވެރިކަމަށް ޒުވާނުން އިންވެސްޓްކުރަންޖެހޭ، ސަރުކާރުން އެހީވާނެ: ވަޒީރު ފައިސަލް

ދިވެހި ޒުވާނުން ފަތުރުވެރިކަމުގެ ސިނާޢަތުގައި އިންވެސްޓްކުރަންޖެހޭކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ވަޒީރު ފައިސަލް މިހެން ވިދާޅުވީ ޑެސްޓިނޭޝަން އައްޑޫ ސަމިޓު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

އައްޑޫގެ ފަތުރުވެރިކަން ކުރިއަރުވައި ޕްރޮމޯޓްކުރުމަށް ބާއްވާ "ޑެސްޓިނޭޝަން އައްޑޫ ސަމިޓް" ފެށުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައި ފަތުރުވެރިކަމާބެހޭ ވަޒީރު ފައިސަލް އިބްރާހިމް ވިދާޅުވީ ފަތުރުވެރިކަމުގެ ދާއިރާއިން އިންވެސްޓުކުރަން ބޭނުންވާ ދިވެހިންނަށް މާލީގޮތުން އެހީތެރިކަން ސަރުކާރުން ފޯރުކޮށްދިނުމަށް ތައްޔާރުވަމުންދާ ކަމަށެވެ.

"މިވަގުތު ދިވެހި ޒުވާނުން ނިކުމެ އިންވެސްޓުކޮށްފިކަމަށް ވަނީ ނަމަ، މީގެ 10 – 15 ވަރަކަށް އަހަރު ފަހުން ދިވެހި ރާއްޖޭގައި ހުންނަ ވަން އައިލެންޑް ވަން ރިސޯޓު ކޮންސެޕްޓުގެ ރަށްތަށް ނަގައިގެން ހަދާނެ، މިއަދު މިއޮތް ހާލަތު ބަދަލު ކުރެވޭނެ، މިއަދު ދިވެހި ފަތުރުވެރިކަމުގެ ސިނާއަތް ޑޮމިނޭޓުކުރަނީ ފޮރިން އިންވެސްޓަރުން،" ވަޒީރު ފައިސަލް ވިދާޅުވިއެވެ.

އައްޑޫގައި ފަތުރުވެރިކަން ފުޅާކުރުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން ވަޒީރު ފައިސަލް ވިދާޅުވީ އައްޑޫއަށް ދުނިޔޭގެ އެކި ހިސާބުތަކުން ސީދާ ދަތުރުތައް ފެށުމަށް އެއަރލައިންތަކާއެކު މަޝްވަރާކުރަމުންދާ ކަމަށެވެ.

އައްޑޫއަކީ މުއްސަނދި ތާރީޙެއް އޮތް މަންޒިލެއްކަން ފާހަގަކުރައްވާ ވަޒީރު ވިދާޅުވީ އައްޑޫގައި ހުރި އާސާރީ ތަންތަނުގެ އާބާތުރަ ފިލުވައި އެތަންތަން ފަތުރުވެރިކަމުގައި ޕްރޮމޯޓުކޮށް އިޝްތިހާރުކުރަން ބޭނުންވާ ކަމަށެވެ. އަދި އެ މަސައްކަތުގެ ދަށުން މިއަހަރުގެ ޑަބްލިއުޓީއެމް ފެއަރގައި އައްޑޫ ސިޓީ ކައުންސިލުން ބައިވެރިވާނެ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ އައްޑޫގައި ފަތުރުވެރިކަން ފުޅާކުރުމަށް ސަރުކާރުން ހާއްސަ އިސްކަމެއް ދެއްވާ ކަމަށާއި، އެކަމާއި ގުޅޭ ކަރުދާހެއް އިކޮނޮމިކް ކައުންސިލަށް ހުށަހެޅުމަށް ތައްޔާރުވަމުންދާ ކަމަށެވެ.

"މިހާރު މިދަނީ ޕޭޕަރެއް އެކުލަވާލަމުން އައްޑޫ ޓޫރިޒަމް ޑިވެލޮޕްމަންޓާއި ބެހޭ ގޮތުން، މި ޕޭޕަރު ފުރަތަމަ ރައީސްއާއި ކުރާނަން، އެއަށްފަހު އިކޮނޮމިކް ކައުންސިލްއަށް ހުށަހަޅައިގެން އެމަސައްކަތްވެސް" ވަޒީރު ވިދާޅުވިއެވެ.

ވަޒީރު ވިދާޅުވީ ރަށެއްގައި ފަތުރުވެރިކަން ފުޅާކުރުމަށް ބީޗެއް މުހިއްމެއް ނޫން ކަމަށެވެ. އެގޮތުން މިހާރު ރާއްޖެ މިސްރާބް ޖަހާފައި މިވަނީ ފަތުރުވެރިކަން ސިންދަފާތުކުރުމަށްކަމަށާއި އެ މަސައްކަތުގެ ދަށުން އެކި ބާވަތުގެ ފަތުރުވެރިކަން ރާއްޖެއަށް ތައާރަފްކުރުމަށް ރާވަމުންދާކަމަށެވެ. އަދި ސަރުކާރުން ބޭނުން ވަނީ ފަތުރުވެރިކަމުގެ ނަފާ އަތޮޅުތަކުގައި ދިރިއުޅޭ ރައްޔިތުންނަށް ހަމަހަމައަށް ލިބޭނެ ފަދަ ގޮތަކަށް މަސައްކަތްކުރުމަށްކަމަށް ވަޒީރު ވިދާޅުވިއެވެ.

އައްޑޫ އިކުއެޓޯރިލް ވިލެޖުގައި ކުރިއަށްދާ "ޑެސްޓިނޭޝަން އައްޑޫ ސަމިޓް"އަކީ އައްޑޫގެ ފަތުރުވެރިކަން ޕްރޮމޯޓްކުރުމާއި އައްޑޫގައި ފަތުރުވެރިކަމަށް މިހާރު ހުރި ގޮންޖެހުންތަކާއި އެ ދާއިރާ ކުރިއަރުވައި ފުޅާކުރުމަށް ކުރެވެން ހުރި ކަންތައްތަކާ ގުޅޭގޮތުން ފުޅާ ދާއިރާގައި ކަމާއިގުޅުން ހުރި ފަރާތްތަތާއި އެކު މަޝްވަރާކުރުމަށް އައްޑޫ ސިޓީ ކައުންސިލްގެ ފަރާތުން އިންތިޒާމްކޮށްގެން ބާއްވާ ސަމިޓެކެވެ.