ގިނައިން ވާރޭވެހޭ ދުވަސްވަރު މަދިރި އާލާވާގޮތަށް ހުންނަ ތަންތަން ނައްތާލަން ސަމާލުވޭ!
-
ވިއްސާރަ ނިމުމަށްފަހު ގައިންގަޔަށް އަރާ ބަލިތައް ރިޕޯޓުކުރާ މިންވަރު އިތުރުވޭ
-
ފެންހަރުލާ ގޮތަށް ހުންނަ ތަންތަން ބަލައި ސާފުކުރުން މުހިއްމު
-
ޑެންގީ އަދި ޗިކުންގުންޏާ ޖައްސާ އީޑިޒް މަދިރި އާލާވަނީ ރީތި ފެނުގައި
ރާއްޖޭގައި މޫސުމީ ވިއްސާރަ ހަފްތާއަކަށްވުރެ ގިނަ ދުވަހު ނަމަވެސް ދިގުލައިގެންދާނަމަ އެވިއްސާރަ ރަނގަޅުވާން ފެށުމުން އެމުއަދަތުގެ ތެރޭގައި ގައިންގަޔަށް އަރާ ބަލިތައް ރާއްޖޭގައި އިތުރުވެގެންދެއެވެ.
ވަކިން ޚާއްސަކޮށް މަދިރީގެ ޒަރީގެ ޒަރިއްޔާއިން ފެތުރޭ ބަލިތައް އިތުރުވެގެންދާކަން ތަފާސް ހިސާބުތަކުން ދައްކައެވެ.
ރާއްޖެ ސަރަޙައްދުގައި ހުޅަނގު މޫސުމުގެ ބާރުގަދަވެ، ބޮޑު ބަޔަކަށް މިދުވަސްވަރުދަނީ ވިއްސާރަކުރަމުންނެވެ. ވިއްސާރަ މޫސުމަކީ މަދިރީގެ ޒަރިއްޔާއިން ޖެހޭ ގިނަ ބަލިތައް ރާއްޖޭގައި އިތުރުވާ ދުވަސްވަރަކަށްވުމުން މިއީވެސް ޚާއްސަ ސަމާލުކަމެއްދޭން ޖެހޭ ކަމެކެވެ. އެހެންކަމަށްވުމާއެކު މިދުވަސްވަރު މޫސުމީ ގެއްލުމުން ރައްކާތެރިވުމަށް ފިޔަވަޅުތައް އަޅާ އުސޫލުން މަދިރިން ރައްކާތެރިވުމަށްވެސް ފިޔަވަޅު އެޅުމަކީ މުހިއްމުކަމެކެވެ. ވިއްސާރަ ވުމުގެ ސަބަބުން ފެން ހެދޭގޮތަށް ގެއާއި ގޯތިތެރޭގައި ހުންނަ ތަންތަން ސާފުކޮށް ފެން ހަރުނުލާގޮތަށް އެތަންތަން ހުރިކަން ޔަގީންކުރުމަކީ ނުހަނު މުހިއްމުކަމެކެވެ.
Monthly Communicable Disease Report - July 2024 pic.twitter.com/f0xOPVQtJs
— Health Protection Agency (@HPA_MV) August 12, 2024
ހަމައެއާއެކު މަދިރިން ރައްކާތެރިވުމަށް އިތުރު ކަންތައްތަކެއްވެސް ކުރެވިދާނެއެވެ. އެގޮތުން މަދިރި އެންމެ ގިނައިން ހަރަކާތެރިވާ ފަތިސް ވަގުތާއި، އިރުއޮއްސޭ ވަގުތު ގޭގެ ދޮރުތައް ލައްޕާފައި ބެހެއްޓުމާއި، އެގަޑިތަކުގައި ބޭރުގައި އުޅޭނަމަ ވީހާވެސް ބޮޑަށް ނިވާވާ ޒާތުގެ ހެދުންތައް އަޅައިގެން އުޅުމަކީ މުހިއްމުކަމެކެވެ. ޚާއްސަކޮށް ތުއްތު ކުދިން މަދިރިން ސަލާމަތްކުރުމަކީ މުހިއްމުކަމެކެވެ.
މަދިރީގެ ޒަރިއްޔާއިން ރާއްޖޭގައި ޢާއްމުކޮށްޖެހޭ ޑެންގީއާއި، ޗިކުންގުންޔާ ޖައްސަނީ އީޑީސް މަދިރިންނެވެ. އެމަދިރިއަކީ ރީތި ފެނުގައި އުފެދޭ ބާވަތަކަށްވުމުން ވާރޭވެހޭއިރު ފެން ހަރުލާގޮތަށް ހުންނަ ތަންތަނާއި ތަކެތި، ފެން ނުހެދޭގޮތަށް ބެހެއްޓުމަކީ މުހިއްމުކަމެކެވެ. އެހެންކަމުން މިދުވަސްވަރު ވާރޭވެހި ފެން ހެދިފައި ހުންނަ ތަންތަން ސާފުކުރުމަށް ޚާއްސަ އިސްކަމެއް ދޭންޖެހެއެވެ.
ހެލްތު ޕްރޮޓެކްޝަން އޭޖެންސީ، އެޗްޕީއޭގެ ތަފާސްހިސާބުތަކަށް ބަލާއިރު ޖޫންމަހާއި އަޅާ ބަލާއިރު ގައިންގަޔަށް އަރާ ބަލިތައް މިދިޔަ ޖުލައި މަހު ވަނީ މަދުވެފައިވާކަމަށެވެ. މިގޮތުން ޑެންގީއާއި އަރިދަފުސް ރޯގާތަކާއި، އިންފުލެންޒާއާއި ބޭރަށް ހިނގުންވެސް މިދިޔަ މަހު ރިޕޯޓުކޮށްފައިވާ މިންވަރު މަދުކަން އެޗްޕީއޭއިން ފާހަގަކުރައްވައެވެ.