ބޯހިޔާވަހިކަމުގެ މައްސަލަ ހައްލުކުރާނީ މާލެ ސިޓީ ކައުންސިލްގެ ބައިވެރިވުމާއެކު: ރައީސް

ބޯހިޔާވަހިކަމުގެ މައްސަލަ ހައްލުކުރެވޭނީ މާލެ ސިޓީ ކައުންސިލްގެ ބައިވެރިވުމާއެކު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މާލެ ސިޓީ ކައުންސިލްގެ މެމްބަރުންނާއެކު މިއަދު ބޭއްވި ބައްދަލުވުމުގައެވެ.

ރައީސް ވިދާޅުވީ ބޯހިޔާވަހިކަމުގެ މައްސަލަ އެންމެ ބޮޑަށް އޮތީ މާލެ ސިޓީގައި ކަމަށެވެ. އަދި މި މައްސަލަ ހައްލުކުރުމަށް ސަރުކާރުން ޚާއްސަ އިސްކަމެއް ދެއްވާ ކަމަށެވެ. އަދި މިމަައްސަލައަށް ހައްލު ގެނެވޭނީ ކައުންސިލްގެ ބައިވެރިވުމާއެކު ކަމަށް ރައީސް ޑރ. މުޢިއްޒު ވިދާޅުވިއެވެ.

"މާލޭގެ މިމައްސަލަ ހައްލުކުރެވޭނީ މާލޭގެ ރައްޔިތުން ހޮވާފައިވާ ކައުންސިލްގެ ބައިވެރިވުމާއެކުގައި، އެއީ އަޅުގަނޑު ބޭނުންވާ ގޮތަކީވެސް،" ރައީސް ވިދާޅުވިއެވެ.

ރައީސް ވިދާޅުވީ މިހާރު ފްލެޓު ދިނުމަށް ކަނޑައަޅާފައިވާ ލިސްޓު އިވެލުއޭޓުކުރުމުގައިވެސް ކައުންސިލްގެ ކޮމިޓީއެއް ހިމެނުމަށްވެސް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއަށް އަންގަވާފައިވާކަމަށެވެެ. އަދި އެ މަސައްކަތް ކުރިއަށްދަނީ އެގޮތަށް ކަންވެސް ރައީސް ފާހަގަކުރެއްވިއެވެ.

އެމަނިކުފާނުގެ ކެމްޕޭންގެ ތެރެއިން ވަޢުދުވެވަޑައިގަތް ފަދައިން މި 5 އަހަރުތެރޭ މާލޭގައި ދިރިއުޅޭ ހުރިހާ ރައްޔިތުންނަށް ބޯހިޔާވަހިކަން ކަށަވަރުކޮށްދެއްވާނެކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ.

އެގޮތުން ހުޅުމާލޭ ފަޅުން ހިއްކާ ބިމާއި، ގުޅީފަޅާއި ގިރާވަރުފަޅުން ހިއްކާ ބިންތަކުގެ މަސައްކަތް ނިމުމާއެކު އެތަންތަނުން ގޯތި ލިބުނު މީހުންނަށް ގޯތިވެސް ދޭނެކަމަށާއި، ގޯއްޗާއި ފްލެޓް ލިބޭނެކަމަށް ކަނޑައަޅާފައިވާ ލިސްޓުގައިވާ އެއްވެސް މީހެއްގެ ނަން އުނިވާން ބޭނުންނުވާކަމަށްވެސް ރައީސުލްޖުމްހޫރިއްޔާވަނީ ވިދާޅުވެފައެވެ.