މާލޭ މަގުތައް ހަދާނީ ގުޅުންހުރި ގިނަ މަސައްކަތްތަކާއެކު، ދިރާސާތައް ދަނީ ކުރިއަށް: ރައީސް

މާލޭގެ މަގު ހެދުމުގެ މަޝްރޫޢު މަސައްކަތް ކުރާއިރު ބިމު އަޑީގައި ހުރި ނެޓްވޯކް ކޭބަލްތައް ތަރުތީބު ކުރެވި، މަގުތައް އަލުން ރޫޅާލަންޖެހޭ ހާލަތްތައް ކުޑަކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މާލެ ސިޓީ ކައުންސިލްގެ 4 ވަނަ ދައުރުގެ 1 ވަނަ ޖަލްސާގައި ބައިވެރިވެވަޑައިގަންނަވާ ވާހަކަފުޅުދައްކަވަމުންނެވެ.

މިބައްދަލުވުމުގައި މާލެ ސިޓީ މޭޔަރ އާދަމް އާޒިމް ވަނީ މާލެ ސިޓީއަށް ކުރިމަތިވެފައިވާ ދަތިތަކާއި އެކަންކަން ހައްލުކުރުމަށް ހުރި ހުރަސްތަކާއި ގުޅޭ މައުލޫމާތު ހިއްސާކުރައްވާފައެވެ. ރައީސުލްޖުމްހޫރިއްޔާ ވިދާޅުވީ މާލެ ސިޓީ ކައުންސިލްގެ ކަންބޮޑުވުންތަކަށް ހައްލު ހޯދާދެއްވުމަށް ގުޅިގެން މަސައްކަތްކުރައްވާނެ ކަމަށެވެ.

މިބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މާލޭގެ މަގުތަކާއި ވިލިމާލޭގެ ހުރިހާ މަގުތައް ހެދުމަކީ ސަރުކާރުން ކުރިއަށްގެންދާނެ މުހިންމު މަޝްރޫޢެއް ކަމަށެވެ. މި މަޝްރޫޢު ކުރިއަށްގެންދަނީ ޗައިނާގެ ހިލޭ އެހީގައި ކަން ފާހަގަކުރައްވާ ރައީސް ވިދާޅުވީ އަމާޒަކީ މިއަހަރުގެ ފަހުކޮޅު ނޫނީ އަންނަ އަހަރު ކުރީކޮޅު މިކަމުގެ އަމަލީ މަސައްކަތްތައް ފެށުން ކަމަށެވެ.

"ވަރަށް އަވަހަށް އެބޭފުޅުންގެ ޓީމެއް އަންނާނެ ދެން އޮތް ސްޓޭޖުގެ ސްޓަޑީ ހަދާނެ، ދެތިން މަރުހަލާއެއް ނިމިގެން އަމަލީ މަސައްކަތް ފެށޭނީ، އުއްމީދަކީ މިއަހަރު ފަހުކޮޅު ނޫނީ އަންނަ އަހަރު ކުރީކޮޅު އަމަލީ މަސައްކަތް ފެށިގެންދާނެ ކަމަށް،" ރައީސް ވިދާޅުވިއެވެ.

މާލޭގެ މަގުތައް ތާރުއަޅައިގެން ތަރައްޤީކުރުމުގެ މަޝްރޫޢުގެ ދަށުން ފެނާއި ނަރުދަމާ ނިޒާމުގެ ނެޓްވޯކް ތަރުތީބުކުރެވޭނެ ކަމަށާއި މިއާއެކު އަލުން އެކި ބޭނުންތަކަށް މަގު ރޫޅަން ޖެހޭ މިންވަރު މަދުވާނެ ކަމަށް ރައީސް ވިދާޅުވިއެވެ.

"ފެނާއި ނަރުދަމާއާއި ކަރަންޓާއި އެކި ކަހަލަ ސަރވިސް ކޭބަލްތައް، ނެޓްވޯކް އައު ކުރެވި ނޫނީ ތަރުތީބުކުރެވިގެން، މަގުތައް ހަދާ ނިމުމުން އަލުން ރޫޅަން ޖެހޭ މިންވަރު މަދުވާނެ ގޮތަކަށް، ޑީވޯޓަރިން ނިޒާމް، ފަޔާ ހައިޑްރަންޓު ނިޒާމް މަގުތައް ހެދިގެންދާނެ ވަރަށް ގިނަ ހައްލުތަކާއެކު،" ރައީސް ވިދާޅުވިއެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢު ކުރިއަށްގެންދިއުމަށް ކުރިން ނިންމާފައި އޮތީ ސަރުކާރުގެ ބަޖެޓުގެތެރެއިން އެންމެ އަވަހަށް ފަށާ މަސައްކަތްތަކުގެ ތެރޭގައި ހިމަނައިގެންނެވެ. ނަމަވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިއަހަރު ޖެނުއަރީ މަހު ޗައިނާއަށް ކުރެއްވި ދަތުރުފުޅުގެ ތެރެއިން، މިމަސައްކަތް ޗައިނާއިން ރާއްޖެއަށް ދޭ ހިލޭ އެހީގެ ގޮތުގައި ކުރިއަށްގެންދިއުމަށް ވަނީ ނިންމަވާފައެވެ.

މާލޭ މަގުތަކުގައި ތާރުއެޅުމުގެ މަސައްކަތް ފުރަތަމަ ފެށީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ހައުސިން މިނިސްޓަރުކަމުގައި ހުންނަވައެވެ. އެގޮތުން މާލޭގެ އިންޑަސްޓްރިއަލް ވިލެޖު ސަރަޙައްދުން ފެށިގެން މާލޭގައި ހުންނަ އެމްޓީސީސީ ފެރީ ޓަރމިނަލްއާއި ހަމައަށް ވަނީ ތާރު އަޅާފައެވެ. ނިމުނު ސަރުކާރުގައި މަގުގެ ބާކީ ބައިގައި ތާރު އަޅަން ޕްލޭންކުރިނަމަވެސް ބޮޑުތަކުރުފާނު މަގުގެ އިތުރު ސަރަޙައްދެއް ޒަމާނީ ފެންވަރަށް ތަރައްޤީކޮށްފައެއް ނުވެއެވެ.