ޕެރިހުގައި މިހާރު ކުރިއަށްދާ އޮލިމްޕިކްސްގެ އަންހެނުންގެ ފުޓްބޯޅައިގައި ދުނިޔޭގެ ޗެމްޕިއަނުން ކަމަށްވާ، ސްޕެއިން ބަލިކޮށް ޖަރުމަނުން ބްރޯންޒް މެޑެލް ހާސިލްކޮށްފިއެވެ.
ޖަރުމަނުން މި މެޗު ކާމިޔާބުކުރީ 1-0 އިންނެވެ.
މިއީ އޮލިމްޕިކްސްގެ އަންހެނުންގެ ފުޓްބޯޅައިގައި ޖަރުމަނުގެ ހަތަރުވަނަ ބްރޯންޒް މެޑެއްޔެވެ. މީގެކުރީން، ޖަރުމަނުން ވަނީ 2000، 2004 އަދި 2008 ވަނަ އަހަރުގެ ގޭމްސްގައި ބްރޯންޒް މެޑެލް ހާސިލްކޮށްފައެވެ.
ލިޔޯންގައި ހުންނަ ގްރޫޕާމާ ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު، 65 ވަނަ މިނެޓުގައި ޖަރުމަނަށް ކާމިޔާބުކޮށްދިނީ ލިބުނު ޕެނަލްޓީއަކުން ޖިއުލިއާ ގްވިން އެވެ. މިއީ ޕެނަލްޓީއޭރިޔާ ތެރެއިން ގްވިން އަށް ސްޕެއިނުގެ ގޯލްކީޕަރު، ކާޓާ ކޮލް ކުރި ފައުލަކަށް ރެފްރީ ދިން ޕެނަލްޓީއެކެވެ.
އޭގެކުރީން، ފުރަތަމަ ހާފުގައި ސްޕެއިނަށް ލީޑްނަގައިދޭން އެ ޓީމުގެ ހުނަރުވެރި މިޑްފީލްޑަރު، އައިޓާނާ ބޮންމާޓީ އަށް ލިބުނު ފުރުޞަތުގައި ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ. އޭގެފަހުން ވެސް ސްޕެއިނަށް ވަނީ ލަނޑުޖަހަން ރަނގަޅު ފުރުޞަތުތަކެއްލިބި ބޭނުންހިފޭގޮތްނުވެފައެވެ.
މެޗުގެ ފުރިހަމަވަގުތު ހަމަވާން ހަތް ސިކުންތަށްވެފައިވަނިކޮށް، ސްޕެއިނަށް ނަތީޖާ އެއްވަރުކޮށްދޭން ރަނުގެ ފުރުޞަތެއްލިބި ވަނީ ބޭކާރުވެފައެވެ. އެގޮތުން، ސްޕެއިނަށް ލިބުނު ޕެނަލްޓީއެއް ވަނީ ނާކާމިޔާބުވެފައެވެ. ބާސެލޯނާގެ ކެޕްޓަންކަން ކުރަމުން އަންނަ ސްޕެއިނުގެ މިޑްފީލްޑަރު، އަލެކްސިއާ ޕުޓެޔާސް ފޮނުވާލި މި ޕެނަލްޓީ ޖަރުމަނުގެ ކީޕަރު، އާން-ކެޓްރިން ބާގާރ ވަނީ ހުއްޓުވައިފައެވެ.
މި ފަހަރުގެ ގޭމްސްގެ ރަން މެޑެލް ހޯދުމަށް ބްރެޒިލާއި އެމެރިކާ ބައްދަލުކުރާ މެޗު ކުޅުމަށް ހަމަޖެހިފައިވަނީ ހޮނިހިރު ދުވަހު ޕާކް ޑެ ޕްރިންސެސްގައެވެ. މި މެޗު ފަށާނީ ރާއްޖޭގަޑިން ރޭގަނޑު 8 ޖަހާއިރު އެވެ.