ޒުވާން ޚަޠީބުން ތަމްރީންކުރުމުގެ ޕްރޮގްރާމްގެ ދަށުން 8 މަސްދުވަހުން 300 ޚަޠީބުން

ޒުވާން ޚަޠީބުން ތަމްރީންކުރުމުގެ ޕްރޮގްރާމްގެ ދަށުން މިމަހުގެ ނިއަލަށް އިތުރު 200 ޚަޠީބުން ތަމްރީންކޮށް ނިމޭނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ.މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ސަރުކާރުގެ އަމާޒަކީ މިދައުރުގެ ތެރޭގައި 1000 ޒުވާން ޚަޠީބުން ތަމްރީންކުރުމެވެ.

ރާއްޖޭގެ ގިނަ ރަށްރަށުގެ މިސްކިތްތަކުގައި މަސައްކަތްކުރާނެ އިމާމުން ނެތުމުގެ މައްސަލަވަނީ ބޮޑުވެފައެވެ. މީގެ ސަބަބުން ބައެއް ރަށްރަށުގައި ބިދޭސީ އިމާމުން ތިބުމުގެ އިތުރުން ރަމަޟާން މަހާއި ދިމާކޮށް ބޭރުން އިމާމުން ގެންނަންވެސްޖެހެއެވެ. މިކަމަށް ހައްލެއް ގެނެސް، ރާއްޖޭގެ ހުރިހާ ސަރަޙައްދެއްގައި އިސްލާމީ ކަންތައްތަކާއި ބެހޭ ވުޒާރާއިން ބޭނުންވާ ފެންވަރަށް ތަމްރީންވެފައިވާ އިމާމުން އުފެއްދުމުގެ މަސައްކަތް ސަރުކާރުންވަނީ ފައްޓަވާފައެވެ.

އެގޮތުން ޒުވާން އިމާމުން ތަމްރީންކުރުމުގެ ޕްރޮގްރާމްގެ ދަށުން ފުރަތަމަ ބުރުގައި 100 އިމާމުން ތަމްރީންކޮށް ނިމިފައިވާއިރު އިތުރު 200 އިމާމުން ތަމްރީންކުރުމުގެ މަސައްކަތް މިހާރުދަނީ ކުރަމުންނެވެ. މިކުދިންގެ ތަމްރީންތައް ނިންމާ ސަނަދު ދިނުމުގެ ޙަފްލާ މިމަހު ބާއްވާނެކަމަށްވެސް ވަޒީރުވަނީ ވިދާޅުވެފައެވެ. މިއާއެކު މި 8 މަސް ދުވަހުގެ ތެރޭގައި 300 އިމާމުން ތަމްރީންކޮށް ނިމޭނެކަމަށް ވަޒީރު ޝަހީމް ވިދާޅުވިއެވެ.

ޒުވާން ޚަތީބުން ތަމްރީން ކުރުމާ ގުޅޭގޮތުން އެކްސްގައި ކުރެއްވި ޕޯސްޓެއްގައި އިސްލާމީ ކަންތައްތަކާ ބެހޭ ވަޒީރު ޑރ.މުހައްމަދު ޝަހީމް ޢަލީ ސަޢީދު ވިދާޅުވީ، ރީތިކޮށް ޤުރުއާން ކިޔަވާ ޚުޠުބާ ކިޔާ ބަންގި ގޮވާ ޒުވާން ޖީލެއް ނެރުމަކީ ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ފުރިހަމަ އިރުޝާދުގެ ދަށުން ކުރިއަށް ގެންދަވާ ޚާއްސަ ޕްރޮގްރާމެއް ކަމަށެވެ. ވަޒީރު ވިދާޅުވީ މިދައުރުގެ ތެރޭގައި 1000 އެފަދަ ޚަޠީބުން ތަމްރީންކުރުމުގެ މަސައްކަތް ކުރައްވަމުންދަކަމަށެވެ. މިޕްރޮގްރާމަށް ލިބޭ ތަރުހީބަށްޓަކައި އުފާކުރައްވާކަމަށް ވަޒީރު ޑރ.މުހައްމަދު ޝަހީމް އަލީ ސަޢީދު ވިދާޅުވިއެވެ.

ޒުވާން ޚަޠީބުން ތަމްރީންކުރުމުގެ ޕްރޮގްރާމްގެ ދެވަނަ ބެޗުގެ ތަމްރީން މިހާރު ކުރިއަށްދާއިރު މިބެޗްގެ އިމްތިޙާންތައް ރާއްޖޭގެ 3 ސަރަޙައްދެއްގައި ބޭއްވުމަށް ހަމަޖެހިފައިވާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ. އެގޮތުން މާލެއާއި އައްޑޫ ސިޓީއާއި މ.އަތޮޅުގައިވެސް އިންތިޙާނު ކުރިއަށްގެންދާނެކަމަށް އެވުޒާރާއިން ވިދާޅުވެއެވެ.

ދެވަނަ ބުރުގައި ތަމްރީންވާ އިމާމުންވެސް ޚުޠުބާ ކިޔުމާއި، އިމާމުވެ ނަމާދުކުރުމާއި، ދީނާއި ގުޅުންހުރި އެހެނިހެން ޚާއްސަ ތަމްރީނުތައް ދިނުމަށްވަނީ ހަމަޖެހިފައެވެ. މިޕްރޮގްރާމަކީ ގްރޭޑު 10 އަދި 11 އާއި 12 ގައި އުޅޭ ދަރިވަރުންނާއި ސްކޫލް ނިންމާފައިވާ ދަރިވަރުންނަށް ހުކުރު ކުރުމުގެ ހުއްދަ ދިނުމަށް ކުރިއަށްގެންދާ ޕްރޮގްރާމެކެވެ. މިގޮތުން މިޕްރޮގްރާމްގެ ފުރަތަމަ ބެޗުގައި ބައިވެރި ކުދިން މިހާރު ރާއްޖޭގެ އެކި ރަށްރަށުގައި އިމާމުވެ ހުކުރު އަދި ރަމަޟާން މަހުގައި ތަރާވީޙް ނަމާދު އަދި ބަންގި ގޮވުމުގައި މިހާރު ޙަރަކާތްތެރިވަމުންދާކަން ފާހަގަކޮށްލެވެއެވެ.

ޒުވާން ޚަޠީބުން ތަމްރީންކުރުމުގެ ޕްރޮގްރާމަކީ ދީނަށް ލޯބިޖެހިފައިވާ ޒުވާނުންތަކެއް ބިނާކޮށް ދީނީ ކަންކަމަށް އިސްކަންދޭ މުޖުތަމަޢެއް ބިނާކުރުމުގެ މަސައްކަތް ކުރެއްވުމަށް ސީދާ ރައީސުލްޖުމްހޫރިއްޔާގެ އިރުޝާދުގެ ދަށުން ކުރިއަށްގެންދާ ޕްރޮގްރާމެކެވެ.