ތުރުކީން ލިބެންހުރި ސްކޮލަރޝިޕްގެ ފުރުސަތުތަކާއި ގުޅޭގޮތުން މަޝްވަރާކޮށްފި
-
މަތީ ތައުލީމާބެހޭ ވަޒީރު ތުރުކީއަށް ވަޑައިގަތީ ތުރުކީ ސަރުކާރުގެ ދަޢުވަތަކަށް
-
އެ ޤައުމުގެ ޔުނިވަރސިޓީތަކާއި ސަރުކާރުގެ އިސްވެރިންނާއި ބައްދަލުކުރައްވާނެ
ތުރުކީން ލިބެން ހުރި މަތީ ތައުލީމުުގެ ފުރުސަތުތަކާއި ސްކޮލަޝިޕްތަކާއި ގުޅޭގޮތުން އެ ޤައުމުގެ ކަމާބެހޭ ފަރާތްތަކާއެކު މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ.މަރްޔަމް މާރިޔާ މަޝްވަރާކުރައްވައިފިއެވެ.
މި މަޝްވަރާތައް ބާއްވާފައިވަނީ މަތީ ތައުލީމާބެހޭ ވަޒީރު ޑރ.މަރްޔަމް މާރިޔާ މިހާރު ތުރުކީއަށް ކުރައްވަމުންދާ ދަތުރުފުޅުގެ ތެރެއިންނެވެ.
މަތީ ތައުލީމާބެހޭ ވަޒީރު ތުރުކީއަށް މިހާރު ކުރައްވަމުން ގެންދަވާ ދަތުރުފުޅަކީ ތުރުކީ ސަރުކާރުގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ. މި ދަތުރުފުޅުގެ ތެރެއިން އެޤައުމުގެ ޓޫރިޒަމް އަދި ކަލްޗަރ މިނިސްޓަރ މަހްމަދު ނޫރީ އެސްއޯއައިއާއެކު އެކަމަނާ ވަނީ މަޝްވަރާ ބައްދަލުވުމެއް ބާއްވަވާފައެވެ.
ތުރުކީގެ އޮސްޓިމް ޓެކްނިކަލް ޔުނިވަރސިޓީގެ ދަޢުވަތަކަށް ބޭއްވި މި ބައްދަލުވުމުގައި ދިވެހިންނަށް އެޤައުމުން ލިބެންހުރި ކިޔެވުމުގެ ފުރުސަތުތަކާއި ގުޅޭގޮތުން މަޝްވަރާކުރެއްވިއެވެ. ޚާއްސަކޮށް ސްކޮލަރޝިޕް ފުރުސަތުތަކާއި ގުޅޭގޮތުން މަޝްވަރާކުރެއްވިކަމަށް މަތީ ތައުލީމާބެހޭ ވުޒާރާއިން ވިދާޅުވެއެވެ.
މަތީ ތައުލީމާބެހޭ ވަޒީރު ތުރުކީ ކުރައްވަމުން ގެންދަވާ ދަތުރުފުޅުގައި އެކަމަނާގެ އަރިހުގައި ޑެޕިއުޓީ މިނިސްޓަރ، އައިމިނަތު ޝަޝީ އަދި ޕާމަނަންޓް ސެކެޓްރީ އައިމިނަތު ހިކްމާ ބައިވެރިވެވަޑައިގަންނަވައެވެ.
މި ދަތުރުފުޅުގައި ވަޒީރު މާރިޔާ ތުރުކީގެ މަޝްހޫރު ޔުނިވާސިޓީތަކާއި އޯއެސްއައިޓީއެމް އަދި އަންކާރާ ޔުނިވާސިޓީގެ އިސްބޭފުޅުންގެ އިތުރުން ތުރުކީ ސަރުކާރުގެ ބައެއް އިސްބޭފުޅުންނާވެސް ބައްދަލުކުރައްވާނެއެވެ.
މީގެ އިތުރުން ތުރުކީގެ މިނިސްޓްރީ އޮފް އިންޑަސްޓްރީ އެންޑް ޓެކްނޮލޮޖީގެ ދަށުން މަސައްކަތްކުރާ ކޭއޯއެސްޖީއީބީ، ކައުންސިލް އޮފް ހަޔަރ އެޑިއުކޭޝަން، އޯއެސްއާއިޓީއެމް އަދި އަންކާރާ ޔުނިވާސިޓީގެ އިސްބޭފުޅުންނާވެސް ވަޒީރު ބައްދަލުކުރެއްވުމަށް ވަނީ ހަމަޖެހިފައެވެ.
މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން އަންނަނީ ރާއްޖޭގެ މަތީ ތައުލީމުގެ ދާއިރާ އެހެން ހަރުފަތަކަށް ގެންދިޔުމަށާއި ހުނަރުވެރި ޖީލެއް ބިނާކުރުމަށް ބޭރުގެ ގިނަ ޔުނިވާސިޓީތަކާއެކު މަޝްވަރާކުރަމުންނެވެ. އަދި މި ފަދަ މަޝްވަރާތަކަށްފަހު އެކި ގައުމުތަކުން ދިވެހިންނަށް ކިޔެވުމުގެ ފުރުސަތުތައްވެސް އަންނަނީ ފަހިވަމުންކަން ފާހަގަކޮށްލެވެއެވެ.