ބަންކަރިންގެ ޚިދުމަތް ފެށުމަށް އެމްޕީއެލްގެ ޕައިލެޓް ބޯޓާއި ޓަގް ބޯޓު ކުޅުދުއްފުއްޓަށް

އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ބޭނުންވާ ޕައިލެޓް ބޯޓާއި ޓަގް ބޯޓު ކުޅުދުއްފުށި ސިޓީއަށް ގެންގޮސްފިއެވެ.

އިންޓަނޭޝަނަލް ބަންކަރިންގެ ޚިދުމަތް މި މަހުގެ 20 ވަނަ ދުވަހު ފެށުމަށް ސަރުކާރުން ދަނީ ތައްޔާރުވަމުންނެވެ.

ރާއްޖޭގައި ބަންކަރިންގެ ޚިދުމަތް ދިނުމަށްޓަކައި ވިޓޯލް ބަންކާސްއާއެކު ޓާރމް ޝީޓުގައި ސަރުކާރުން މިހާރު ވަނީ ސޮއިކޮށްފައެވެ. ވިޓޯލް ބަންކާސްއަކީ ދުނިޔޭގެ މަޤުބޫލު މުދާ އުފުލާ އަދި ޝިޕިންގެ މަސައްކަތްތައް ކުރިއަށްދާ އެކި ސަރަޙައްދުތަކުގައި ބޯޓުފަހަރަށް ތެޔޮ ފޯރުކޮށްދިނުމުގެ ޚިދުމަތް ފުޅާ ދާއިރާއެއްގައި ދެމުން އަންނަ ފަރާތެކެވެ. ވިޓޯލް ބަންކާސްގެ މެޕުގައި ދިވެހިރާއްޖެ މިހާރު ވަނީ ހިމަނާފައެވެ.

އުތުރުގައި ފަށާ އިންޓަރނޭޝަނަލް ބަންކަރިންގ ޚިދުމަތުގައި މޯލްޑިވްސް ޕޯޓްސް ލިމިޑެޓު، އެމްޕީއެލުންއިންވެސް މުހިއްމު ދައުރެއް އަދާކުރާނެއެވެ. އެގޮތުން ރާއްޖެއަށް ގާތްކުރާ ބޯޓުފަހަރުތަކަށް މަގުދައްކައިދިނުމަށް ޕައިލެޓު ބޯޓު ބޭނުންކުރެއެވެ. އަދި ޓަގް ބޯޓަކީވެސް މި މަސައްކަތުގައި ބޭނުންކުރާ އުޅަނދެެކެވެ.

ކުޅުދުއްފުށި ޕޯޓަށް ދެ އުޅަނދު ގެންދިއުމުން ވޯޓާ ސެލިއުޓެއް ވަނީ ދީފައެވެ. އަދި ދެ އުޅަނދުގައި ކެޕްޓަނުންނާއި ފަޅުވެރިންނަށް މަރުހަބާ ކިޔާފައިވަނީ ސީއީއޯ މުޙައްމަދު ވަޖީހު އިބްރާހިމް އާއި މެނޭޖްމަންޓުގެ ބައެއް ބޭފުޅުންނެވެ.

އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ބޭނުންވާ ޕައިލެޓް ބޯޓާއި ޓަގް ބޯޓް ވަނީ ކުޅުދުއްފުށި ޕޯޓަށް މިއަދު ގެނެސްފައި. #MaldivesPortsLimited #MPL #portmv pic.twitter.com/vqkHfl29XZ

— Maldives Ports Limited (@Portmv) August 2, 2024

މިކަމާއި ގުޅިގެން އެމްޕީއެލްގެ ސީއީއޯ ވަޖީހް ވިދާޅުވީ ބަންކަރިންގެ ޚިދުމަތް ދިނުމަށް އެމްޕީއެލްއިން އޮތީ ފުރިހަމައަށް ތައްޔާރުވެފައިކަމަށެވެ. އަދި މިއީ ރާއްޖޭގެ އިޤްތިސާދަށް މުހިންމު ޚިދުމަތަކަށްވާތީ އެމްޕީއެލް ބަލަނީ މިއި ޤައުމީކަމެއްގެ ގޮތުގައި ކަމަށް ވަޖީހު ވިދާޅުވިއެވެ.

އުތުރުގައި ބައިނަލްއަޤްވާމީ ބަންކަރިންގ ޚިދުމަތް ފެށުމަށްޓަކައި މިހާރު ކުރިއަށްދަނީ އެންމެ ފަހުގެ ތައްޔާރީތަަކެވެ. މި ޚިދުމަތް ފެށުމަށް ކުރަންޖެހޭ ގިނަ މަސައްކަތްތައް ކުރިއަށް ގެންދާނީ އެމްޕީއެލްއިންނެވެ.

އެގޮތުން މި ޚިދުމަތް ފެށުމަށް ބޭނުންވާ އޮފީސް ޖާގަތައް ހެދުމުގެ މަސައްކަތްވެސް ދަނީ ވަރަށް ހަލުވި ދުވެއްޔެއްގައި ކުރިއަށް ކަމަށާއި އެ މަސައްކަތް މިމަހުގެ 15ވަނަ ދުވަހުގެ ނިޔަލަށް ނިމޭނެ ކަމަށް އެމްޕީއެލްއިން މައުލޫމާތުދެއެވެ.

ބަންކަރިން ޚިދުމަތަކީ ކަނޑު ބޯޓުތަކާއި އުޅަނދުތަކަށް ތެޔޮ ފޯރުކޮށްދިނުމެވެ. ބޯޓް ފަހަރު އާއްމުކޮށް ދަތުރުކުރާ ސަރަޙައްދުތަކުގައި އެފަދަ ޚިދުމަތެއް ފެށިއްޖެނަމަ ބޯޓް ފަހަރު އެތަންތަނަށް މަޑުކޮށް ތެޔޮ އަޅައިހަދައެވެ. މިގޮތަށް ތެޔޮ ވިއްކުމަކީ ރަނގަޅު ފައިދާއެއް ލިބޭ ޚިދުމަތެއްކަމުން މިއީ ރާއްޖޭގެ އިޤްތިޞާދު ފުޅާކުރުމަށް މުހިންމު ސިނާޢަތަކަށްވާނެކަމަށް ސަރުކާރުން ވިދާޅުވެއެވެ.

ސަރުކާރުން މި މަޝްރޫޢު ކުރިއަށްގެންދަނީ 2 ފިޔަވައްސަކަށް ބަހާލައިގެންނެވެ. ފުރަތަމަ ފިޔަވައްސަކީ އޮފް-ޕޯޓް ބަންކަރިންއެވެ. މި ޚިދުމަތް ދިނުމަށް ފިޒިކަލް އިންފްރާސްޓަރަކްޗަރ ބޭނުންނުވާނެއެވެ. ސަބަބަކީ ރާއްޖެއަކީ ޖަޒީރާ ވަށައިގެން ކަނޑު އޮތް ޤައުމަކަށް ވާތީއެވެ. ފުރަތަމަ ފިޔަވަހީގައި ބޯޓުތަކަށް ތެޔޮ އެޅުމުގެ ޚިދުމަތް ފޯރުކޮށްދޭނީ އަތޮޅުތަކަށް މަޑުކޮށްގެންނެވެ.

2 ވަނަ ފިޔަވަހީގައި ޕޯޓެއް ތަރައްޤީކުރުން ހިމެނެއެވެ. މި ޕޯޓު ތަރައްޤީކުރާނީ ބޭނުންވާނެ އެހެން ހުރިހާ ޚިދުމަތްތަކާއި އެކުގައިކަމަށް ސަރުކާރުން ވިދާޅުވެއެވެ.

ރާއްޖޭގެ އިޤްތިޞާދު ފުޅާކޮށް، ސިންދަފާތުކުރުމަށް ގިނަ މަސައްކަތްތަކެއް ކުރަމުންދާއިރު، ރާއްޖޭގެ އުތުރަކީ އިޤްތިޞާދީ ބޮޑު ހަބަކަށް ހެދުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.