ތުރާކުނުގައި ވޯޓަރ ބަންކަރިންގެ ޚިދުމަތް ފަށަނީ

ހއ.ތުރާކުނުގައި ވޯޓަރ ބަންކަރިންގެ ޚިދުމަތް ވަރަށް އަވަހަށް ފަށާނެކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްއިން ހާމަކޮށްފިއެވެ.

އެމްޕީއެލްއިން ބުނީ ހއ.ތުރާކުނުގައި ވޯޓަރ ބަންކަރިންގެ ޚިދުމަތް ފެށުމަށްޓަކައި ވާންޖެހޭ ތައްުޔާރީތައް މިހާރު ކުރިއަށްދާކަމަށެވެ.

ޕީއެސްއެމް ނިއުސްއަށް މަޢުލޫމާތުދެމުން އެމްޕީއެލްއިން ބުނީ ވޯޓަރ ބަންކަރަކީ ތުރާކުނަށް އަންނަ ބޯޓުފަހަރުތަކަށް ބޭނުންވާ ފެން ފޯރުކޮށްދިނުމަށް ޤާއިމްކުރާ ތަނެއްކަމަށެވެ. އަދި ކައުންސިލުން އެދިފައިވާގޮތަށް މިކަން ކުރުމަށް ބޭނުންވާ ފްލޯޓިން ބާޖް ބާއްވާނީ ތުރާކުނުގައިކަމަށްވެސް އެމްޕީއެލްއިން ބުނެއެވެ.

އުތުރުގައި ފެށުމަށް ހަމަޖެހިފައިވާ މެރިޓައިމްގެ ޚިދުމަތްތަށް ގާއިމު ކުރުމާ ގުޅޭގޮތުން މަޝްވަރާކުރުމަށް ސީ.އީ.އޯ މުޙައްމަދު ވަޖީހް އިބްރާހިމް ވަނީ މިއަދު ހއ.ތުރާކުނަށް ޒިޔާރަތްކުރައްވައި، އެ ރަށުގެ ކައުންސިލްއާއެކު ބައްދަލުވުމެއް ބާއްވައިފައެވެ.#portmv #MaldivesPortsLimited #MPL pic.twitter.com/EOIOin5ZW8

— Maldives Ports Limited (@Portmv) August 1, 2024

ހއ.ތުރާކުނުގައި ވޯޓަރ ބަންކަރިންގެ ޚިދުމަތް ފެށުމަށް ތައްޔާރުވަމުންދާއިރު އެމް.ޕީ.އެލްގެ ޗީފް އެގްޒެކުޓިވް އޮފިސަރ މުޙައްމަދު ވަޖީހް އިބްރާހިމް އަދި ކުންފުނީގެ މެނޭޖްމަންޓް ބައެއް ބޭފުޅުން ވަނީ ތުރާކުނަށް ވަޑައިގެން، އެ ރަށު ކައުންސިލާއެކު މަޝްވަރާތައް ބާއްވަވާފައެވެ. މި ބައްދަލުކުރެއްވުމުގައި ކުންފުނީގެ ސީއީއޯ ވިދާޅުވީ، ވޯޓަރ ބަންކަރިންގ ޚިދުމަތް ފެށުމުން އެ ރަށުގެ ރައްޔިތުންނަށް ވަޒީފާގެ އިތުރު ފުރުސަތުތައް ހުޅުވިގެންދާނެކަމަށެވެ.

މީގެއިތުރުން އުތުރުގެ މެރިޓައިމް މަސައްކަތްތައް ތަރައްޤީކުރުމަށް ކުރަމުންދާ މަސައްކަތްތަކުގެ މައުލޫމާތުވެސް މި ބައްދަލުވުމުގައި ހިއްސާކޮށްފައިވެއެވެ. އެގޮތުން އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް އެކުންފުނިން ކުރަންޖެހޭ މަސައްކަތްތައް ކުރަމުންދާކަމަށް އެމްޕީއެލްއިން ބުނެއެވެ.

ތުރާކުނުގައި ވޯޓަރ ބަންކަރިންގެ އިތުރުން، އެމްޕީއެލްއިން ވަނީ އުލިގަމު ޔޮޓް މެރީނާ ތަރައްޤީކޮށް، އެ ރަށުގައި މެރިޓައިމްގެ ބައެއް ޚިދުމަތްތައް ފޯރުކޮށްދިނުމަށް ރަށު ކައުންސިލްއާއެކު ފަހުމުނާމާއެއްގައި ސޮއިކޮށްފައެވެ.

ރާއްޖޭގެ އިޤްތިޞާދު ފުޅާކޮށް، ސިންދަފާތުކުރުމަށް ގިނަ މަސައްކަތްތަކެއް ކުރަމުންދާއިރު، ރާއްޖޭގެ އުތުރަކީ އިޤްތިޞާދީ ބޮޑު ހަބަކަށް ހެދުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.