މިސްކިތްތަކުގެ ޙާލަތު ބެލުމަށް މިސްކިތު ކޮމިޓީ އެކުލަވާލަނީ

މިސްކިތްތަކުގެ ހާލަތު ދުވަހުން ދުވަހަށް ބަލައި މޮނީޓަރކުރުމަށްޓަކައި ކޮންމެ ރަށެއްގައި އަދި ސިޓީތަކުގެ ކޮންމެ އަވަށެއްގައި މިސްކިތު ކޮމިޓީ އެކުލަވާލަން ޖެހޭގޮތަށް، މިސްކިތްތަކާބެހޭ ޤައުމީ މަޖިލީހުގެ ގަވާއިދު ޢާއްމުކޮށްފިއެވެ.

މި ޤަވާއިދު ގެޒެޓުކުރުމާއެކު 1987 ވަނަ އަހަރު ޢަމަލުކުރަން ފެށި މިސްކިތްތަކާބެހޭ ޤައުމީ މަޖިލީހުގެ އަސާސީ ޤަވާއިދު ވަނީ އުވިގެންގޮސްފައެވެ.

މިސްކިތްތަކާބެހޭ ޤައުމީ މަޖިލީހުގެ ގަވާއިދު އެކުލަވާލާފައި ވަނީ ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނުގެ ދަށުންނެވެ. ޤާނޫނުގައި ބަޔާންކޮށްފައިވާ ގޮތުން ރާއްޖޭގެ އެކި ރަށްރަށުގައި ހުރި މިސްކިތްތަކާއި، ދީނީ ޝިޢާރު ފާޅުކުރަން ތިބޭ އިމާމުންނާއި މުދިމުންގެ ކަންކަން ބަލަހައްޓާނީ އިސްލާމީ ކަންތައްތަކާބެހޭ ވުޒާރާގެ ދަށުންނެވެ.

މިގަވާއިދުގެ ދަށުން މިސްކިތްތަކުގެ ހާލަތު ދުވަހުން ދުވަހަށް ބެލުމަށް ކޮންމެ ރަށެއްގައި އަދި ސިޓީތަކުގެ ކޮންމެ އަވަށެއްގައި މިސްކިތު ކޮމިޓީއެއް އެކުލަވާލަންޖެހެއެވެ. އަދި މިކޮމިޓީގެ އެހީތެރިކަމާއެކު މިސްކިތްތަކުގެ ހާލަތު މެދުނުކެނޑި ދެނެގަނެވޭނެ ނިޒާމެއް ޤާއިމުކުރުމުގެ އިތުރުން ހުރިހާ މިސްކިތެއްގެ ކަންކަން ދީނީގޮތުން އެއް މިންގަނޑެއްގައި ހިފަހައްޓަންޖެހެއެވެ.

މިސްކިތްތަކާބެހޭ ޤައުމީ މަޖިލީހުގެ ގަވާއިދުގެ ދަށުން މިސްކިތްތަކާއި އިމާމުންނާއި މުދިމުންގެ ކަންކަމުގައި ވަޒީރަށް ބޭނުންވާ އިސްތިޝާރީ ލަފާދިނުމާއި، އިސްލާޙުކުރަން ޖެހޭކަންކަމުގައިވެސް ވަޒީރަށް ލަފާދެއްވުމަކީ މިމަޖިލީހުގެ ޒިންމާއެކެވެ. އަދި މިސްކިތްތަކުގެ ޙުރުމަތްތެރިކަން ދަމަހައްޓައި، އެތަންތަނުގެ ސާފުތާހިރުކަން ކަށަވަރުކުރުމަށާއި، މިސްކިތްތައް ބިނާކުރުމާއި މަރާމާތުކުރުމުގެ ކަންކަމުގައި ވަޒީރަށް ލަފާދެއްވާނީވެސް މިޖަމިލީހުންނެވެ.

ޤަވާއިދުގައި ބަޔާންކޮށްފައިވާ ގޮތުގައި މިސްކިތްތަކާބެހޭ ޤައުމީ މަޖިލިސް އެކުލަވާލައްވާނީ ވަޒީރެވެ. އެގޮތުން މިސްކިތްތަކާބެހޭ މަޖިލީހުގައި 7 މެމްބަރުން ތިބެންޖެހޭނެކަމަށް ގަވާއިދުގައި ވަނީ ބަޔާންކޮށްފައެވެ. އެއީ މަސްޖިދުއްސުލްޠާން މުޙައްމަދު ތަކުރުފާނުލްއައުޡަމަށް ރައީސުލްޖުމްހޫރިއްޔާ ޢައްޔަންކުރާ އިސް އިމާމާއި، މިނިސްޓްރީގެ މޮސްކް މެނޭޖްމަންޓް ސެކްޝަނުގެ އިސްވެރިޔާއާއި، ކީރިތި ޤުރުއާނާއި ބެހޭ ޤައުމީ މަރުކަޒުގެ އިސްވެރިޔާއާއި، ސިޓީތަކާއި އިދާރީދާއިރާތައް ހިންގުމާއި ޢާއްމު މަސައްކަތްތަކާއި ބެހޭ ވުޒާރާއިން ކަނޑައަޅާ ފަރާތަކާއި، މާލެ ސިޓީ ކައުންސިލުން ކަނޑައަޅާ ފަރާތަކާއި، ދިވެހިބަހާއި ސަގާފަތާއި، ތަރިކައާއި ބެހޭ ވުޒާރާއިން ކަނޑައަޅާ ފަރާތެއްގެ އިތުރުން ޢާއްމުން ރައްޔިތުންގެ ތެރެއިން ވަޒީރު ޢައްޔަންކުރާ ފަރާތެކެވެ.

މިޤަވާއިދު ދިވެހި ސަރުކާރުގެ ގެޒެޓުގައި ޝާއިއުކުރުމާއެކު 1987 ގައި އެކުލަވާލާފައިވާ މިސްކިތްތަކާއި ބެހޭ ޤައުމީ މަޖިލީހުގެ އަސާސީ ގަވާއިދު އުވުނީކަމަށް ވަނީ ބަޔާންކޮށްފައެވެ.