ރޭންޖަރސް އިތުރުކޮށް ހިމާޔަތްކޮށްފައިވާ ސަރަޙައްދުތައް ބެލެހެއްޓުން ވަރުގަދަކުރަނީ

ހިމާޔަތްކޮށްފައިވާ ތަންތަން ބެލެހެއްޓުމުގައި ހަރަކާތްތެރިވާ "ރޭންޖާރސް" ކުރިއަށް އޮތްތަނުގައި އިތުރުކުރުމަށް މަސައްކަތް ކުރައްވާނެކަމަށް މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ ބައިނަލްއަޤުވާމީގޮތުން ފާހަގަކުރާ ރޭންޖާރސް ދުވަހުގެ މުނާސަބަތުގައެވެ.

ރޭންޖަރސް ދުވަހުގެ މުނާސަބަތުގައި ދެއްވި ޚާއްސަ މެސެޖުގައި މޫސުމީ ބަދަލުތަކާއި ތިމާވެއްޓާ ބެހޭ ވަޒީރު ޠާރިޤް އިބްރާހީމް ވިދާޅުވީ، ރާއްޖޭގައި ހިމާޔަތްކޮށްފައިވާ ގިނަ ސަރަޙައްދުތަކެއް ހުރިނަމަވެސް އެތަންތަން ބެލެހެއްޓުމަށް ހަރަކާތްތެރިވަނީ މަދު ރޭންޖާރސްތަކެއްކަމަށެވެ. އަދި ރާއްޖޭގައި މަސައްކަތްކުރާ ރޭންޖަރސް ޢަދަދުގެ ގޮތުން މަދު ނަމަވެސް ވަރަށް މުހިއްމު އަދި ބުރަ މަސައްކަތެއްކުރާ ބައެއްކަން ވަޒީރު ފާހަގަކުރެއްވިއެވެ.

Happy World Rangers day to our unsung heroes safeguarding and protecting our highly valued natural environment of the Maldives.
This years theme is “30x30” related to the CBD Biodiversity Plan which cannot be achieved without the contribution of our rangers and all the… pic.twitter.com/OEQiw3YVNJ

— Thoriq Ibrahim (@Thoriqibrahim) July 31, 2024

އެގޮތުން އެސަރަޙައްދުތައް ބެލެހެއްޓުމުގައި ގިނަ ގަޑިތަކެއް ހޭދަކުރައްވާކަން ފާހަގަކުރައްވާ ވަޒީރު ވިދާޅުވީ ރާއްޖޭގެ ފަތުރުވެރިކަން ކުރިއެރުވުމުގައި އެފަރާތްތަކުން މުހިއްމު މަސައްކަތެއް ކުރާކަމަށެވެ. އެގޮތުން ހިމާޔަތްކޮށްފައިވާ ރާއްޖޭގެ ގުދުރަތީ ރީތިކަމުގެ އެކި ސަރަޙައްދުތަކަށް ގެއްލުން ނުވާނެހެން އެތަންތަން ފަތުރުވެރިންނަށް ދެއްކުމުގެ މަސައްކަތް ކުރާކަމަށް ވަޒީރު ވިދާޅުވިއެވެ.

އެހެންކަމުން ކުރިއަށް އޮތްތަނުގައި އިތުރު ރޭންޖަރސް ތަމްރީންކޮށް ރާއްޖޭގައި ހިމާޔަތްކޮށްފައިވާ ސަރަޙައްދުތައް ބެލެހެއްޓުމުގެ މަސައްކަތް ހަރުދަނާކުރައްވަން މަސައްކަތްކުރައްވަމުންދާކަން ވަޒީރު ފާހަގަކުރެއްވިއެވެ. އަދި އެއަށްފަހު އިތުރު ސަރަޙައްދުތައް ޙިމާޔަތްކުރުމުގެ މަސައްކަތްވެސް ކުރަމުންދާކަން ވަޒީރު ފާހަގަކުރެއްވިއެވެ.

ރާއްޖޭގައި މިވަގުތުވެސް ހިމާޔަތްކޮށްފައިވާ 90 އަށްވުރެ ގިނަ ސަރަޙައްދު އޮތްއިރު މެނޭޖްމެންޓް ޕްލޭނެއްގެ ދަށުން ބަލަހައްޓަމުންދަނީ 6 ސަރަޙައްދެކެވެ. އެއީ ރ.ވަންދޫއާއި، ބ.އަތޮޅު ބަޔޯސްފިއަރ ރިޒާވާއި، ލ.ގާދޫއާއި، ފުވައްމުލައް ބަޔޯސްފިއަރ ރިޒާވްއާއި އައްޑޫ ބަޔޯސްފިއަރ ރިޒާވްއެވެ. މީގެތެރެއިން ބައެއް ސަރަޙައްދުތަކަކީ ޔުނެސްކޯގެ ބަޔޯސްފިއަރ ރިޒާވްގެ ގޮތުގައި ކަނޑައަޅާފައިވާ ސަރަޙައްދުތަކެވެ.

ދުނިޔޭގެ ރޭންޖަރސް ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެވެސް ޖުލައި މަހުގެ 31 ވަނަ ދުވަހެވެ. މިދުވަހުގެ ޝިޢާރެއްގެ ގޮތުން މިއަހަރު ކަނޑައަޅާފައިވަނީ "30 އިންޓު 30"އެވެ.