ގަރާޖުތައް އެއްވިއުގައަކުން ގުޅާލައި ދެވަނަ ބޭނުމަކަށް އެފަދަ ތަންތަން ރަޖިސްޓްރީކުރުމުގެ މަގު ބަންދުކުރަނީ

މާލެ ސަރަޙައްދުގައި ހުރިހާ ގަރާޖެއް އެއް ވިއުގައަކުން ގުޅާލާ، ކަމާ ގުޅުންހުރި ހުރިހާ ފަރާތަކަށް ފެންނަން ހުންނާނެ ނިޒާމެއް ޤާއިމުކުރުމަށް ސަރުކާރުން ނިންމަވައިފިއެވެ.

ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާގެ ބެލުމުގެ ދަށުން ވަގުތުން ވަގުތަށް ގަރާޖުތަކުގެ މަޢުލޫމާތު ފެންނަން ހުންނާނެ އިންޓަރގްރޭޓަޑް އިންފޮރމޭޝަން ސިސްޓަމެއް ޤާއިމުކުރުމުގެ މަސައްކަތް މިއަހަރުގެ ސެޕްޓެމްބަރު މަހުގެ ފުރަތަމަ ދުވަހު ފެށުމަށް ސަރުކާރުންވަނީ ނިންމަވާފައެވެ.

މާލޭގައި މިވަގުތު ގަރާޖު ރަޖިސްޓްރީ ކުރަމުންދަނީ މާލެ ސިޓީ ކައުންސިލުގައެވެ. މިގޮތުން ސިޓީ ކައުންސިލްގައި ގަރާޖުގެ ބޭނުމަށް ރަޖިސްޓަރކޮށްފައިވާ ތަންތަން، އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ ދަށުން އެއްވެސް ހުރަހެއް ނެތި ވިޔަފާރިކުރުމަށް ނުވަތަ ގުދަނެއްގެ ގޮތުގައި ބޭނުންކުރުމަށް ރަޖިސްޓްރީކުރުމުގެ ފުރުޞަތު އެބައޮތެވެ. އަދި މިގޮތުން ދެވަނަ ބޭނުމެއްގައި ރަޖިސްޓަރކުރާކަން އެނގޭނެ ނުވަތަ ބެލޭނެ އެއްވެސް ނިޒާމެއް ދައުލަތުގެ އިދާރާތަކުގައި މިހާރަކު ޤާއިމުވެފައެއް ނެތެވެ.

އެހެންކަމުން ގަރާޖުގެ ގޮތުގައި ރަޖިސްޓްރީކޮށްފައިވާ ތަންތަނުގެ ނަމުގައި އެކި ފަރާތްތަކުން އުޅަނދުތައް އެތެރެކޮށް އޭގެ ސަބަބުން އެތައް ދަތިތަކެއް ދަނީ ކުރިމަތިވަމުންނެވެ. އެހެންކަމުން މިކަމަށް ޙައްލެއް ގެނައުމަށް މާލެ ސިޓީ އާއި އެޗްޑީސީގެ ދަށުން ގަރާޖެއްގެ ގޮތުގައި ރަޖިސްޓްރީ ކޮށްދޭ ޖާގަތަކާއި، އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާގެ ދަށުން ވިޔަފާރިއާއި ގުދަނުގެ ގޮތުގައި ރަޖިސްޓްރީކޮށްދޭ ތަންތަން އެއްވިއުގައަކުން ގުޅާލުމަށް މިހާރުވަނީ ނިންމަވާފައެވެ. މީގެ ސަބަބުން ދެ ބޭނުމެއްގައި އެއްތަނެއް ރަޖިސްޓްރީކޮށްދެވުން ނިމުމަކަށް އަންނާނެކަމަށް ސަރުކާރުން ވިދާޅުވެއެވެ.

މީގެތެރޭގައި އަމިއްލަ ފަރާތްތަކުގެ ގަރާޖުއާއި، ހުއްދަދެދެވޭ ސަރުކާރުގެ ޕާރކިންގ ބިލްޑިންގ ތަކާއި އަދި ގަރާޖުގެ ގޮތުގައި ހިމެނޭ ހުރިހާ ތަނެއް ހިމެނޭނެކަމަށް ސަރުކާރުން ވިދާޅުވެއެވެ.

މާލެ ސިޓީ ކައުންސިލާއި އެޗް.ޑީ.ސީ އަދި އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ މެދުގައި މި މަޢުލޫމާތު އެއްވިއުގައަކުން ގުޅާލުމަށް އިންޓަރގްރޭޓަޑް އިންފޮރމޭޝަން ސިސްޓަމް ޤާއިމުކުރުމުގެ މަސައްކަތް މިއަހަރުގެ ސެޕްޓެމްބަރު މަހުގެ ފުރަތަމަ ދުވަހު ފައްޓަވާ އެމަސައްކަތް އަހަރެއްގެ ތެރޭގައި ނިންމުމަށްވަނީ ހަމަޖެހިފައެވެ.

މީގެއިތުރުން ގިނަ ގަރާޖުތަކުގެ ވެރިންނަށް ނޭނގި އެތަންތަނުގެ ނަމުގައި ގިނަ ޢަދަދެއްގެ އުޅަނދު ރަޖިސްޓަރކޮށްފައިވާ މައްސަލަތަކާއި ގަރާޖު ނެތް ގިނަ ގެ ތަކުގެ ގޭގެ ވެރިފަރާތަށް އެނގުމަކާއިނުލާ ގަރާޖު ހުރިކަމުގެ ނަމުގައި ގިނަ ޢަދަދެއްގެ ވެހިކަލް ޓްރާންސްޕޯޓުގައި ރަޖިސްޓްރީކޮށްފައިވާ މައްސަލަ އެވުޒާރާއަށް ހުށައަޅަމުންދާތީ އެމައްސަލަތައްވެސް އަހަރެއްގެ ތެރޭގައި ބަލާ ނިންމުމަށް އެވުޒާރާއިން ވަނީ ނިންމަވާފައެވެ.

ހަމައެއާއެކު ޓްރާންސްޕޯޓުގެ ހުއްދަދީގެން ބައެއް ގަރާޖުތަކުން ރޯޑްވާދިނަސްގެ ޚިދުމަތް ފޯރުކޮށް ދެމުން މިހާރު ގެންދާ އުޞޫލު ބަދަލުކޮށް، އެންމެންގެ ރައްކާތެރިކަމަށްޓަކައި، ހަރުދަނާ އުޞޫލުތަކެއް ޤާއިމުކުރަންޖެހޭކަމަށް އެވުޒާރާއިން ވިދާޅުވެއެވެ.

އެގޮތުން އޮޓޯމޮބައިލްސް އިންޖިނިއަރުންނާއި ޓެކްނީޝަނުންގެ ޕޫލެއް އެކުލަވާލައި، ކަނޑައެޅޭ ނިޒާމެއްގެ ދަށުން، އެޕޫލްގައި ހިމެނޭ ފަރާތްތަކުގެ އިރުޝާދުގެ މަތިން ވެހިކަލްތަކުގެ ރޯޑްވާދިނަސް ހެދުމުގެ އިންތިޒާމު ހަމަޖެއްސުމަށްވަނީ ނިންމާފައެވެ. މި މަސައްކަތް އޯގަސްޓްމަހުގެ ފުރަތަމަ ދުވަހު ފެށުމަށްވަނީ ހަމަޖެހިފައެވެ.