ރައީސް ރަށްރަށަށް ކުރައްވާ ދަތުރުފުޅުތަކާއި މާލޭ ރައްޔިތުންނާ ބައްދަލުކުރެއްވުން 2 މަސްފަހުން ފަށްޓަވަނީ

ރައްޔިތުންނާ ބައްދަލުކުރެއްވުމަށް އަތޮޅުތަކަށް ފެށްޓެވި ދަތުރުތައް މަޑުޖައްސާލާފައިވަނީ ރާއްޖޭގެ މާލީ ޙާލަތު ރަނގަޅުކުރުމަށް މިވަގުތު ގިނަ މަސައްކަތްތަކެއް ސަރުކާރުން ކުރަމުންދާތީ ކަމަށާއި، 2 މަހެއްހާ ދުވަސް ފަހުން ދަތުރުތައް އަލުން ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައްޔިތުންނާ ގާތުން ބައްދަލުކުރުމުގެ މަސައްކަތްތައް އަނެއްކާވެސް ވަރަށް އަވަހަށް ފައްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ޕީއެންސީ ހައުސްގެ ހަރުގެ ޖަލްސާގައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ވަނީ މިއަހަރު ނިމުމުގެ ކުރިން ރާއްޖޭގެ ހުރިހާ ރަށަކަށް ޒިޔާރަތްކުރެއްވާނެކަމަށް މީގެކުރިން ވިދާޅުވެފައެވެ. އަދި ސަރުކާރާ ހަވާލުވެވަޑައިގެން ފުރަތަމަ 6 މަސްތެރޭގައި އެމަނިކުފާނު ވަނީ ހަތްދިހައެއްހާ ރަށަށް ވަޑައިގެން 150އަށްވުރެ ގިނަ ކައުންސިލާ ބައްދަލުކުރައްވާފައެވެ.

އެމަނިކުވާނުވަނީ މިއަހަރު ނިމުމުގެ ކުރިން ރާއްޖޭގެ ހުރިހާ ރަށަކަށް ވަޑައިގަންނަވާނެކަމަށް ވިދާޅުވިއިރު، ދަޢުރު ނިމުމުގެ ކުރިން ކޮންމެ ރަށަކަށް ދެ ފަހަރު ވަޑައިގަންނަވާނެކަމަށް ވިދާޅުވިއެވެ.

ޕީއެންސީ ޖަލްސާގައި ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ މި ވަޢުދުގެ މަތިން ހަނދުމަފުޅު އެބަހުރިކަމަށާއި ނަމަވެސް މިވަގުތަށް ދަތުރުތައް މަޑުޖައްސާލާފައިވަނީ، ރާއްޖޭގެ އިޤްތިޞާދީ ޙާލަތު އޮތް ގޮތުން، މި ޙާލަތުން އަރައިގަތުމަށް ގިނަ މަސައްކަތްތަކެއް ކުރެވެމުންދާ ދަނޑިވަޅަކަށްވާތީކަމަށެވެ.

ރައީސް ވިދާޅުވީ އަތޮޅުތަކަށް ދަތުރުކޮށް ރައްޔިތުންނާ ބައްދަލުކުރުމުގެ މަސައްކަތްތައް 2 މަސް ފަހުން ފައްޓަވާނެކަމަށެވެ. އަދި ޢަމާޒު ހިފާފައިވާގޮތަށް، މިހާރު ނުދެވި އޮތް 130އެއްހާ ރަށަށް މިއަހަރު ވަޑައިގަންނަވާނެކަމަށް ވިދާޅުވިއެވެ.

"ސަލާމް ކޮށްލާފައި ޖަލްސާ ބާއްވާކަށް އެކަންޏެއް ނޫން ދަނީ. ރައްޔިތުންގެ ގާތަށް ގޮސް ރައްޔިތުންނާ ބައްދަލުކޮށް ކައިރީގައި ތިބެގެން އެ ވާހަކަތަށް އަޑުއަހާނަން. ގޭގެއަށް ގޮސްވެސް ރައްޔިތުންނާ ބައްދަލުކުރާނަން" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރަށްރަށުގެ ދަތުރުތަކުގެ އިތުރުން މާލޭގެ ގޭބިސީތަކަށް ޒިޔާރަތްކޮށް ރައްޔިތުންނާ ބައްދަލުކުރުމުގެ މަސައްކަތްތައްވެސް ވަރަށް އަވަހަށް ފައްޓަވާނެކަމަށް ރައީސް ވިދާޅުވިއެވެ. އެގޮތުން ކޮންމެ ހަފްތާއަކުވެސް ކަނޑައަޅާ ވަކި ތާވަލެއްގެ މަތިން، ހުރިހާ ދާއިރާތަކުގެ ގޭގެއަށް ޒިޔާރަތްކޮށް ރައްޔިތުންނާ ބައްދަލުކުރައްވާނެކަމަށް އެމަނިކުފާނު ވިދާޅުވިއެވެ.

"ރަސްމީ މަސައްކަތުގެ ތެރެއިން ހަފްތާއަކު ގޭގެއަށް ދާން ކަނޑައަޅާނަން. ރައްޔިތުން ގާތަށް ގޮސް، އަޑުއަހާ، ބޭނުންވާ ކަންކަން ކޮށްދޭނަން. ވަރަށް އަވަހަށް ތާވަލެއްހަދާ، ގޭގެއަށް ދާން ފަށާނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ ވަނީ އެމަނިކުފާނުގެ ސަރުކާރުން އެއްވެސް ރައްޔިތަކު ބާކީ ނުކުރައްވާނެކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ.

އަދުގެ ސަރުކާރުން މަސައްކަތްކުރަނީ، ރަށްރަށުގެ ކަންކަން ނިންމުމާއި ޕްރޮޖެކްޓްތައް ހިންގުމުގައި އެ ރަށަކަށް އެންމެ ފައިދާބޮޑުވާނެގޮތަށް، ރައްޔިތުންނާ ކައުންސިލްތަކުގެ މަޝްވަރާއާއެކު މަސައްކަތްތައް ކުރިއަށްގެންދެވުމަށެވެ. ކައުންސިލްތަކުގެ މަސައްކަތްތައް ބެލެހެއްޓުމަށް ސިޓީތަކާ އިދާރީ ދާއިރާތައް ހިންގުމާ އާއްމު މަސައްކަތްތަކާ ބެހޭ ޚާއްސަ ވުޒާރާވެސް އެކުލަވާލާ އަންނަނީ މުހިންމު މަސައްކަތްތައް ކުރިއަށްގެންދަމުންނެވެ.