ޢީދު މިސްކިތުން ވައްކަންކުރި މީހާގެ ބަންދަށް 15 ދުވަސް
-
މިމައްސަލައިގައި ހިމެނެނީ 41 އަހަރު ދިވެހި ފިރިހެނެއް
-
ޢީދު މިސްކިތުން މިމަހު އެކަނިވެސް 10 ފަންކާ ވަގަށް ނަގާފައިވޭ
-
މިއަހަރުގެ މެދާހަމައަށް މިސްކިތްތަކުން ވައްކަންކޮށްގެން 21 މައްސަލަ ފުލުހަށް ހުށައަޅާފައިވޭ
ޢީދު މިސްކިތުން ވައްކަން ކުރި މީހާގެ ބަންދަށް 15 ދުވަސް ކްރިމިނަލް ކޯޓުން ޖަހާފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުން ވިދާޅުވީ، ޢީދު މިސްކިތުން ވައްކަން ކުރި މައްސަލައިގެ ތުހުމަތުގައި 41 އަހަރުގެ ދިވެހި ފިރިހެނަކު ހައްޔަރުކޮށްފައިވާކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އެކޯޓުން އަމުރުކޮށްފައިވާކަމަށެވެ.
މާލޭ ޢީދު މިސްކިތުގައި ހަރުކޮށްފައިހުރި ފަންކާތަކެއް ވަގަށް ނަގާފައިވަނީ މިމަހުގެ 20 ވަނަ ދުވަހުގެ ރޭގައެވެ. މިމަސްތެރޭ އެކި ދުވަސްތަކުގެ މަތިން އެމިސްކިތުން އެކަނިވެސް 10 ފަންކާ ވަގަށް ނަގާފައިވެއެވެ.
ފުލުހުން ވިދާޅުވީ، މިއަހަރުގެ 6 މަސްތެރޭގައި މާލޭގެ މިސްކިތްތަކުން ވައްކަން ކުރުމުގެ 21 މައްސަލައެއް ފުލުހުންނަށް ހުށައަޅާފައިވާކަމަށެވެ. މީގެތެރެއިން ގެއްލިފައިވާ 6 ފަންކާއާއި 2 ފޯނާއި ފެން މޯޓަރެއް ހޯދާފައިވާކަން ފުލުހުންވަނީ ކުރިން ފާހަގަކުރައްވާފައެވެ.