ޓްރިވެންޑްރަމަށް ދަތުރުކުރި މޯލްޑިވިއަންގެ ބޯޓަކަށް ޓެކްނިކަލް މައްސަލައެއް ދިމާވެގެން އެނބުރި ވީއައިއޭއަށް
-
އެ ފްލައިޓުން 99 މީހުން ދަތުރުކުރަމުންދިޔަ
-
އިތުރު ފްލައިޓެއް ހަމަޖެއްސުމުގެ މަސައްކަތް ދަނީ ކުރަމުން
އިންޑިއާގެ ޓްރިވެންޑްރަމަށް ދަތުރުކުރަމުންދިޔަ މޯލްޑިވިއަންގެ މަތިންދާބޯޓަކަށް ޓެކްނިކަލް މައްސަލައެއް ދިމާވެގެން އެނބުރި ވެލާނާ އިންޓަނޭޝަނަލް އެއަރޕޯޓަށް ޖައްސައިފިއެެވެ.
ޕީއެސްއެމް ނިއުސްއަށް މައުލޫމާތުދެމުން މޯލްޑިވިއަންއިން ބުނީ 99 މީހުންނާއެކު ދަތުރުކުރަމުންދިޔަ އެ އެއަރލައިންގެ ފްލައިޓު Q2700 ވެލާނާ އިންޓަރނޭޝަނަލް އެއަރޕޯޓަށް އަނބުރާ ޖެއްސީ ފުރިތާ މާގިނަ އިރުތަކެއް ނުވަނީސް، ދިމާވި ޓެކްނިކަލް މައްސަލައަކާއި ގުޅިގެންކަމަށެވެ. އަދި މަތިންދާބޯޓަށް ދިމާވި މައްސަލަ ދެނެގަތުމަށް އެ އެއަރލައިންގެ އިންޖިނިއަރުން މިހާރު މަސައްކަތްކުރަމުންދާކަމަށްވެސް މޯލްޑިވިއަންއިން ބުނެއެވެ.
އެ ފްލައިޓު ކެންސަލް ކުރިނަމަވެސް އިތުރު ފްލައިޓެއް ހަމަޖެއްސުމުގެ މަސައްކަތް މިހާރު ކުރަމުންދާކަމަށްވެސް މޯލްޑިވިއަނުން ބުންޏެވެ.
މޯލްޑިވިއަނުން ވަނީ ފްލައިޓް ކެންސަލްކުރުމުގެ ސަބަބުން ދިމާވާނެ ދަތިތަކަކަށްޓަކައި ފަސިންޖަރުންގެ ކިބައިންގެ މައާފަށް އެދިފައެވެ.