ސޫރިއާ-ތުރުކީ ބޯޑަރުން ގެނައި ދިވެހި އާއިލާތަކުގެ ފަރުވާގެ ކަންކަން ދަނީ ރަނގަޅަށް: ވަޒީރު

ސޫރިއާއާއި ތުރުކީ ގުޅޭ ބޯޑަރުގައި ތިއްބާ ހާލުގައި ޖެހިގެން ރާއްޖެ ގެނައި ދިވެހި އާއިލާތަކުގެ ފަރުވާގެ ހުރިހާ ކަމެއްވެސް ރަނގަޅަށް ކުރިއަށްދާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން މިހެން ވިދާޅުވީ ޕީއެސްއެމް ނިއުސްއަށް ދެއްވި ހާއްސަ އިންޓަވިއުއެއްގައެވެ.

ސަރުކާރުން ވަނީ ސޫރިޔާ-ތުރުކީ ބޯޑަރުގައި ހާލުގައި ޖެހިފައިވާ ފަސް އާއިލާއެއްގެ 21 މީހުން މިއަހަރުގެ ޖެނުއަރީމަހު ރާއްޖެއަށް ގެނެސްފައެވެ. މީގެ ތެރޭގައި 15 ކުޑަކުދިންނާއި 5 އަންހެނުންނާއި ފިރިހެނަކު ހިމެނެއެވެ.

ސޫރިޔާ-ތުރުކީ ބޯޑަރުގައި ހާލުގައި ޖެހިފައިތިއްބާ ރާއްޖެ ގެނައީ މީހުންނަށް ފަރުވާދެމުން ދަނީ ނޭޝަނަލް ރީ-އިންޓަގްރޭޝަން ސެންޓަރުގައެވެ. މިއީ އެ ފަރާތްތައް މުޖުތަމައަށް ނެރުމުގެ ކުރިން ދޭންޖެހޭ ފަރުވާ ދިނުމަށެވެ.

ޕީއެސްއެމް ނިއުސްއާ ވާހަކަދައްކަވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވީ ހަނގުރާމަވެރި ސަރަހައްދުތަކުގައި ހާލުގައި ޖެހިފައިވާ ދިވެހިންގެ ތެރޭގައި ގިނައީ ކުށެއް ނެތް ކުޑަކުދިން ކަމަށެވެ. އެ ކުދިންނަށް ޤާނޫނުން ލިބިދޭންޖެހޭ ހުރިހާ ރައްކާތެރިކަމަކާއި ޙައްގުތައް ހޯދައިދިނުމަށް މަސައްކަތް ކުރައްވާނެ ކަމަށްވެސް އިޙްސާން ވިދާޅުވިއެވެ.

އިޙްސާން ވިދާޅުވީ މިހާރުވެސް ރާއްޖެއަށް ނުގެނެވި 100 އަށްވުރެ ގިނަ މީހުން ތިބިކަމުގެ މައުލޫމާތު ލިބެމުންދާކަމަށެވެ. އޭގެ ތެރޭގައިވެސް ގިނައީ ކުޑަކުދިން ކަމަށާއި އެންމެ ބޮޑަށް ދިމާވާ ދަތިކަމަކީ އެކުދިންނަކީ ދިވެހިންކަން ކަށަވަރުކުރުން ކަމަށް ވަޒީރު ވިދާޅުވިއެވެ.

"ބަޔޯމެޓްރިކަލީ މި ކުޑަކުދިންނަކީ ދިވެއްސެއްގެ ކުދިންތޯ ކަށަވަރު ކުރުމުގެ މަސައްކަތް، އެއީ ވަރަށް ޗެލެންޖިން ޓާސްކެއް. އަޅުގަނޑުމެން މީގެ ފޭސްތަކަކަށް ބަހާލާފަ މިއިންނަނީ، ފުރަތަމަ ކަމަކީ އެ ހިސާބަށް އެކްސެސް ހޯދުން އަޅުގަނޑުމެންގެ ޓީމުތަކުން. އެއީ ޑިޕްލޮމެޓިކް މަސައްކަތްތަކެއް. މިހާރު އެދަނީ އެމަސައްކަތް ކުރަމުން މިނިސްޓްރީ އޮފް ފޮރިން އެފެއާޒުން" އިޙްސާން ވިދާޅުވިއެވެ.

އިޙްސާން ވިދާޅުވީ ނޭޝަނަލް ރީ-އިންޓަގްރޭޝަން ސެންޓަރުގެ މަސައްކަތްތައް ވަރަށް ކާމިޔާބުކަމަށެވެ. އެގޮތުން، އެންމެ ފަހުން އެ ސެންޓަރުގައި ފަރުވާ ދިނުމަށްފަހު މުޖުތަމައަށް ނެރެފައިވާ އާއިލާވެސް މުޖުތަމަޢުގައި އުޅެނީ ރަނގަޅަށް ކަމަށް ވަޒީރު ވިދާޅުވިއެވެ. އަދި ފަރުވާ ދެމުންދާ ފަރާތްތަކުގެ ފަރުވާގެ ކަންކަންވެސް ރަނގަޅަށް ކުރިއަށްދާކަމަށް އިހްސާން ވިދާޅުވިއެވެ.

ހަނގުރާމަވެރި ސަރަހައްދުތަކުގައި ހާލުގައި ޖެހިފަތިބި ދިވެހިން ރާއްޖެ ގެނެސް އާއިލާތައް ބައިތިއްބާ އެންއާރުސީގައި ހަތަރު ބްލޮކެއް ވަނީ ހަދައިފައެވެ. މީގެ ތެރެއިން އެއް ބްލޮކް އަންހެނުންނަށް ހާއްސަކޮށްފައިވާއިރު އެއް ބްލޮކް 18 އަހަރު ނުފުރޭ ފިރިހެން ކުދިންނަށް، އެއް ބްލޮކް 18 އަހަރުން މަތީގެ ފިރިހެނުންނަށް އަދި އެއް ބްލޮކް އާއިލާތަކަށް ވަނީ ޚާއްސަކޮށްފައެވެ. މި ސެންޓަރުން އެއް ފަހަރާ 72 މީހުންނަށް އަދި 5 އާއިލާއަށް ފަރުވާފޯރުކޮށްދެވޭނެއެވެ.