ޔޫރޯ ފުޓްބޯޅަ މުބާރާތުގެ ގްރޫޕް އޭ ގައި މިރޭ ހަންގޭރީއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން އިއްޔެ ބޭއްވި ޕްރެސް ކޮންފަރެންސްގައި ޖަރުމަނުގެ ކޯޗު، ހޫލިއަން ނާގަލްސްމަން ބުނީ، ފުރަތަމަ މެޗުގައި ކަންތައް ދިމާވިގޮތުން ހުރިހާ ޕްރެޝަރެއް އޮތީ ހަންގޭރީ އަށް ކަމަށެވެ. އެމީހުންނަށް މޮޅުވުން ނޫން ގޮތެއް ނެތް ކަމަށް ނާގަލްސްމަން ބުންޏެވެ.
ނާގަލްސްމަން ވަނީ، ޒުވާން ކުޅުންތެރިންނާއި ތަޖުރިބާކާރު ކުޅުންތެރިން އެކުލެވިގެންވާ 'މިކްސް' އެއް އޭނާގެ ޓީމުގައި އޮތުމަކީ ވަރަށް ބޮޑު އުފަލެއް ކަމަށް ބުނެފައެވެ. އޭނާ ބުނީ، އެކަމުގެ ސަބަބުން ތަޖުރިބާކާރު ކުޅުންތެރިންގެ ފަރާތުން ނުހަނު ގިނަ ކަންތައްތަކެއް ޒުވާން ކުޅުންތެރިންނަށް ދަސްވެ، ޕްރެޝަރުގައި މެޗެއް ކުޅެލަން ވެސް ފަސޭހަވެގެންދާނެ ކަމަށެވެ.
ނާގަލްސްމަން ބުނީ، ސްވިޓްޒަލޭންޑާ ދެކޮޅަށް ފަހު ހާފުގައި ހަންގޭރީން ރަނގަޅު ކުޅުމެއް ދެއްކި ކަމަށެވެ. އަދި މެޗުގައި މޮޅަށް ކުޅުނު ހަންގޭރީ ކަމަށާއި، އެމީހުންނަށް އެ މެޗުން ޕޮއިންޓެއް ހައްގުކަމަށް އޭނާގެ ވާހަކައިގައި ފާހަގަކުރިއެވެ.
ހަންގޭރީގެ ކުޅުމަށް ތައުރީފުކުރަމުން ނާގަލްސްމަން ބުނީ، ސެޓްޕީސްތަކުގައި ވެސް އެ ޓީމުގެ ރެކޯޑް ރަނގަޅު ކަމަށެވެ. ހާއްސަކޮށް އެ ޓީމުގެ ކެޕްޓަން، ޑޮމިނިކް ސޮބޯޒްލާއީގެ ހުނަރުވެރިކަން ފާހަގަކުރިއެވެ.
ޖަރުމަނުގެ ޑިފެންޑަރު، މެކްސްމިލިއަން މިޓްއުލްޝްޓެޓް ބުނީ، ހަންގޭރީން ނެރެފައިވާ ނަތީޖާތަކަށް ބަލާއިރު، އެ ޓީމުން ބޮޑެތި ޓީމުތަކާ ދެކޮޅަށް ރަނގަޅު ކުޅުމެއް ދައްކާފައިވާކަން ފާހަގަވާ ކަމަށެވެ. އެހެންކަމުން، ހަންގޭރީއާ ދެކޮޅަށް ޖަރުމަނުން ސަތޭކަ ޕަސެންޓް ދޭން ޖެހޭނެ ކަމަށް އޭނާ ބުންޏެވެ. އަދި އޭނާ ބުނީ، ސްކޮޓްލެންޑާ ދެކޮޅަށް ދެއްކި ފަދަ ކުޅުމެއް ހަންގޭރީއާ ދެކޮޅަށް ކުޅެންޖެހޭނެ ކަމަށެވެ.
މުބާރާތުގެ ގްރޫޕް ސްޓޭޖުގައި ހަންގޭރީއާ ޖަރުމަނު ބައްދަލުކުރާ މެޗު ފެށުމަށް ހަމަޖެހިފައިވަނީ ރާއްޖެގަޑިން މިރޭ 9 ޖަހާއިރު އެވެ.