ޖެހިޖެހިގެން ދެވަނަ އޮލިމްޕިކް ގޭމްސްއިން ޖާގަ ހޯދި ރާއްޖޭގެ ބެޑްމިންޓަން ތަރި ފާތިމަތު ނަބާހާ އަބްދުލްރައްޒާގު (ނަބާ) އަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު މަރުހަބާ ދަންނަވައިފިއެވެ.
ޓްރައިޕާޓައިޓް އިންވިޓޭޝަނަލް ފުރުސަތެއްގައި ނަބާއަށް ވަނީ ފްރާންސްގެ ވެރިރަށް ޕެރިހުގައި އަންނަ ޖުލައި މަހު ބާއްވާ އޮލިމްޕިކްސްގައި ވާދަކުރުމުގެ ފުރުސަތު ލިބިފައެވެ. ނަބާއަށް މި ފުރުސަތު ލިބުނުއިރު، އޭނާ ވަނީ އެންމެ ފަހުން 2020 ވަނަ އަހަރު ޖަޕާނުގެ ވެރިރަށް ޓޯކިއޯގައި ބޭއްވި އޮލިމްޕިކްސްގައިވެސް ވާދަކޮށްފައެވެ. އަދި އެ ފަހަރުގެ އޮލިމްޕިކްސް ހުޅުވުމުގެ ރަސްމިއްޔާތުގައި ދިވެހި ދިދަ އުފުލާލުމުގެ ޝަރަފުވެސް ނަބާއަށް ވަނީ ލިބިފައެވެ.
ޖެހިޖެހިގެން ދެވަނަ އޮލިމްޕިކްސްގައި ވާދަކުރާ ނަބާއަށް، ރާފިޢު މަރުހަބާ ދެންްނެވީ މިއަދު އެ ވުޒާރާގައި އޮތް ބައްދަލުވުމެއްގައެވެ. މި ބައްދަލުވުމުގައި ވަޒީރު ވަނީ ނަބާ ހޯދީ ކާމިޔާބީ ފާހަގަކުރައްވައި، އޮލިމްޕިކްސްއަށް ނަބާގެ ތައްޔާރީތަކާ ގުޅޭ ކަންކަން އޮޅުންފިލުއްވާފައެވެ.
އޮލިމްޕިކްސްގައި ވާދަކުރުމުގެ ފުރުސަތު ނަބާއަށް ލިބިގެންދިޔައީ މިދިޔަ ހަތަރު އަހަރެއްހާ ދުވަހު، ބައިނަލްއަގުވާމީ މުބާރާތްތަކުގައި އޭނާ ދެއްކި ޕާފޯމަންސަށް ބެލުމަށްފަހުއެވެ. އެގޮތުން ބައިނަލްއަގުވާމީ މައިދާނުގައި ނަބާއަށް ރަނގަޅު ތަޖުރިބާތަކެއް ލިބިގެންދިޔައިރު، އޭނާ ވަނީ މިދިޔަ އަހަރު ޗައިނާގެ ހަންގްޖޯގައި ކުރިއަށްދިޔަ 19 ވަނަ އޭޝިއަން ގޭމްސްގެ ބެޑްމިންޓަން އަންހެން ސިންގަލްސްގެ ގަދަ 16 ބުރުގައިވެސް ވާދަކޮށްފައެވެ.
ޖެހިޖެހިގެން ދެ އޮލިމްޕިކްސްގައި ނަބާ ވާދަކުރާއިރު، މީގެ ކުރިން ތިން އޮލިމްޕިކްސްއެއްގައި ރާއްޖޭގެ ދުވުންތެރިތާ އަޙްމަދު ޝަގީފް (ރިވަރިން) ވަނީ ވާދަކޮށްފައެވެ. އަދި ދެ އޮލިމްޕިކްސްއެއްގައި ވާދަކުރި ދުވުންތެރިންގެ ތެރޭގައި ހުސެއިން ހަލީމް (ކުޑަ ހުސެން) އާއި، ނަސީރު އިސްމާޢީލާއި، މުޙައްމަދު އާމިރާއި، ހުސެއިން ރިޔާޒް އަދި ހަސަން ސާއިދު ހިމެނެއެވެ. އަދި ސްވިމިންއިން ހަސަން މުބާހު އާއި، އައިމިނަތު ރޫޔާ ހުސެއިން އަދި އައިމިނަތު ސަަޖަންވެސް ވަނީ ދެ އޮލިމްޕިކްސްއެއްގައި ވާދަކޮށްފައެވެ. އެހެންކަމުން ނަބާއަށް މި ވަނީ ދެ އޮލިމްޕިކްސްއެއްގައި ވާދަކުރާ ރާއްޖޭގެ ފުރަތަމަ ބެޑްމިންޓަން ކުޅުންތެރިޔާގެ ޝަރަފު ލިބިފައެވެ.
މި ފަހަރުގެ އޮލިމްޕިކްސްގައި ރާއްޖޭން ފުރަަތަަމަ ފަހަރަށް ހަތަރު ކުޅިވަރެއްގައި ވާދަކުރާނެއެވެ. އެގޮތުން އިންވިޓޭޝަނަލް ފުރުސަތުތަކުގައި ބެޑްމިންޓަނުގެ އިތުރުން ސްވިމިން އަދި އެތުލެޓިކްސްގައިވެސް ވާދަކުރާނެވެ. އެގޮތުން އެތުލެޓިކްސްއިން ރާއްޖެ ތަމްސީލުކުރާނީ އިބާދުﷲ އާދަމެވެ. އަދި ދެކުނު އޭޝިއާ ކޮލިފައިން ކާމިޔާބުކޮށް ޓޭބަލް ޓެނިސް ތަރި ފާތިމަތު ދީމާ އަލީއަށްވެސް ވަނީ ފުރުސަތު ލިބިފައެވެ. އެއާއެކު ދީމާ ވެފައިވަނީ ދުނިޔޭގެ އެންމެ ޝަރަފުވެރި ކުޅިވަރު މުބާރާތް ކަމަށްވާ އޮލިމްޕިކްސްއަށް ކޮލިފައިވި ރާއްޖޭގެ ފުރަތަމަ އެތުލީޓަށެވެ.