ރާއްޖޭގެ ރިސޯޓުތަކުގެ މެދުގައި ބާއްވަމުން އަންނަ އެންމެ ފޯރިގަދަ ފުޓްސަލް މުބާރާތް ކަމަށްވާ ރިސޯޓް ލީގު 2024 ގެ ނޯތު މާލޭ ޒޯނުގެ ޕްލޭއޮފް މެޗުތައް ކާމިޔާބުކޮށް، ކުއާޓާ ފައިނަލުގެ ފަހު ދެ ޖާގަ ދަ ރިޓްޒް ކާލްޓަން މޯލްޑިވްސް އާއި ބަރޮސް މޯލްޑިވްސްއިން ހޯދައިފިއެވެ.
ކުއާޓާގެ ފަހު ޖާގަތައް ހޯދުމަށް ޕްލޭއޮފް ކުޅެން ޖެހުނީ ގުރޫޕް ސީ އާއި ގުރޫޕް ޑީގެ ދެވަނަ ޓީމާއި ތިންވަނަ ޓީމުތަކުންނެވެ. މި ކޮންމެ ގްރޫޕަކުން އެއްވަ ހޯދި ޓީމުތައް މީގެ ކުރިން ވަނީ ކުއާޓާއަށް ދަތުރުކޮށްފައެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގައި މިއަދު ކުޅުނު ފުރަތަމަ މެޗުން ރިޓްޒް މޮޅުވީ ކޮކޯ ބޮޑު ހިތި އަތުން 4-0 ގެ ނަތީޖާއަކުންނެވެ. މި މެޗުގައި ރިޓްޒްގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އައިސަން ޖަމްޝީދާއި، ސިމްހާދު އިބްރާހީމް އަދި ސުފިޔާން ހަކީމެވެ. މި މެޗުގެ މޮޅު ކުޅުންތެރިޔަކަށް ހޮވުނީ ރިޓްޒްގެ ގޯލްކީޕަރު އަޙްމަދު ޝައްފާޒެވެ.
މީގެ އިތުރުން މިއަދު ކުޅުނު ދެވަނަ މެޗުން ބަރޮސް މޮޅުވީ ކުރުނބާ މޯލްޑިވްސް އަތުން 4-0 ގެ ނަތީޖާއަކުންނެވެ. މި މެޗުގައި ބަރޮހުގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އަލީ ޒިޔާން އަޙްމަދާއި، އަޙްމަދު އަނީސް އަދި ހުސައިން ވިފާގެވެ. މި މެޗުގެ މޮޅު ކުޅުންތެރިޔަކަށް ހޮވުނީ ބަރޮހުގެ ޒަޔާންއެވެ.
މި ނަތީޖާތަކާއެކު ކުއާޓާގައި ރިޓްޒް ވާދަކުރަން ޖެހޭނީ ގުރޫޕް ޑީގެ އެއްވަނަ ހޯދި އޮބްލޫ ސެލެކްޓް ސަންގެއްޔާއެވެ. އަދި ބަރޮސް ނުކުންނާނީ ގުރޫޕް ސީގެ އެއްވަނަ ހޯދި އޯގާ އަރޓް ރިސޯޓް މޯލްޑިވްސްއާއެވެ.