އަލަށް ގާއިމުކުރާ ވަސީލަތްތަކާއެކު ފެތުމަކީ ދިވެހިން ފަޚުރެވެރިވާ ފަދަ ކުޅިވަރަކަށް ވެގެންދާނެ ކަމަށް ސްވިމިން އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާޢީލް ޢަލީ ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން އިސްމާޢީލް ވިދާޅުވީ އަލަށް ގާއިމުކުރެވިގެންދާ ޕޫލްއާއެކު ދިވެހި ފެތުންތެރިންގެ ފެންވަރު މަތިވެގެންދާނެކަމުގެ އުއްމީދު ބޮޑު ކަމަށެވެ. އެގޮތުން މި ފަހަރުގެ އޮލިމްޕިކް ގޭމްސްއަށް ރާއްޖޭގެ ފެތުންތެރިއަކު ކޮލިފައިނުވި ނަމަވެސް، މިހާރު އެތުލީޓުންގެ ފެންވަރަށް ބަލާއިރު އޮލިމްޕިކްސްއަށް ކޮލިފައިވުމާ ގާތުގައި ބައެއް ފެތުންތެރިން ތިބިކަން އިސްމާޢީލް ވަނީ ފާހަގަކުރައްވާފައެވެ.
މި ފަހުން ދިވެހި ފެތުންތެރިން ބައިނަލްއަގުވާމީ މައިދާނުގައި ގިނަ ކުރިއެރުންތަކެއް ހޯދާފައިވާއިރު، އޮލިމްޕިކްސް ކޮލިފެކޭޝަނާ ހަމައަށް ދިޔުމަށް ފެތުންތެރިން އަންނީ ވަރަށް ބޮޑަށް މަސައްކަތްކުރަމުން ކަމަށް އިސްމާޢީލް ވިދާޅުވިއެވެ. އަދި ކުރިމަގުގައި ދިވެހި ފެތުންތެރިންގެ އެންމެ ބޮޑު އަމާޒަކީ އޭޝިއަން ގޭމްސް އާއި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ވުރެ ބޮޑަށް އޮލިމްޕިކްސްއަށް ކޮލިފައިވުން ކަމަށްވެސް ވިދާޅުވިއެވެ.
"ވަރަށް ރަނގަޅު ކޯޗަކާއެކު ކުލަބުތަކާއި ނެޝަނަލް ޓީމުގެ ޕްރެކްޓިސްތައް އެބަ ކުރިއަށްގެންދެވޭ. އަޅުގަނޑު ރައްޔިތުންނަށް ހަމަ ދަންނަވާލަން ބޭނުންވަނީ އިރާދަކުރެވިއްޔާ ސްވިމިން، މި ކުޅިވަރު ރާއްޖޭގައި ދިވެހިން ފަޚުރުވެރިވާ ކުޅިވަރަށް މި ލިބުނު ވަސީލަތާއެކު އަޅުގަނޑުމެންނަށް ކުރިއަށް ދެވޭނެއޭ.އިސްމާޢީލް ޢަލީ - ސްވިމިން އެސޯސިއޭޝަންގެ ނައިބު ރައީސް
މިހާތަނަށް އައިރު އޮލިމްޕިކްސްއަށް ރާއްޖޭގެ ފެތުންތެރިއަކު ކޮލިފައިނުވި ނަމަވެސް، ޓްރައިޕާޓައިޓް އިންވިޓޭޝަނަލް ފުރުސަތުތަކުގައި ދިވެހި ފެތުންތެރިން ވަނީ އޮލިމްޕިކްސްގައި ވާދަކޮށްފައެވެ. އަދި މި އަހަރުގެ ޖުލައި މަހު ފްރާންސްގެ ވެރިރަށް ޕެރިހުގައި ބާއްވާ އޮލިމްޕިކްސްގައިވެސް އިންވިޓޭޝަނަލް ފުރުސަތެއްގައި ދިވެހި ފެތުންތެރިއަކު ވާދަކުރާނެއެވެ.