އިނގިރޭސި އެފްއޭ ކަޕުގެ ފައިނަލް މެޗުގައި ވާދަވެރި މެންޗެސްޓާ ސިޓީ ބަލިކޮށް، މެންޗެސްޓާ ޔުނައިޓެޑުން މުބާރާތުގެ ޗެމްޕިއަންކަން ހޯދައިފިއެވެ.
ވެމްބްލީ ސްޓޭޑިއަމްގައި މިރޭ ކުޅުނު ފައިނަލް ޔުނައިޓެޑުން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
މި ކާމިޔާބާއެކު ޔުނައިޓެޑުން ވަނީ މިހާތަނަށް 13 ފަހަރު އެފްއޭ ކަޕް ކާމިޔާބުކޮށްފައެެވެ. މި މުބާރާތް އެންމެ ގިނައިން ކާމިޔާބުކޮށްފައިވާ އާސެނަލުން ވަނީ 14 ފަހަރު ތަށި އުފުލާލާފައެވެ.
ފައިނަލުގައި ޔުނައިޓެޑުން މޮޅު ކުޅުމެއް ދެއްކިއިރު، މި މެޗުގެ 30 ވަނަ މިނެޓުގައި ސިޓީގެ ޑިފެންޑަރު ޖޮސްކޯ ގްވާޑިއޯލް ހެދި ގޯހެއްގެ ފައިދާ ނަގައި، އެލެހެންޑްރޯ ގަނާޗޯ ވަނީ ޔުނައިޓެޑަށް ލީޑު ނަގައިދީފައެވެ.
މި ލަނޑަށްފަހުވެސް ސިޓީއަށް ހަމަނޭވާއެއް ނުލެވުނެވެ. އެގޮތުން ފުލުފުލުގައި ޔުނައިޓެޑުން ވަނީ ކައުންޓަރ އެޓޭކުތަކުގައި ސިޓީއަށް ނުރައްކާކޮށްފައެވެ. ނަތީޖާއެއްގެ ގޮތުން މެޗުގެ 39 ވަނަ މިނެޓުގައި އެ ޓީމުން ވަނީ ދެވަނަ ލަނޑެއް ކާމިޔާބުކޮށްފައެވެ. ބްރޫނޯ ފެނާންޑޭސް ދިން ރީތި ބޯޅައަކުން މި ލަނޑު ކާމިޔާބުކޮށްދިނީ ޒުވާން މިޑްފީލްޑަރު ކޯބީ މައިނޫއެވެ.
މި މެޗުގެ ދެވަނަ ހާފުގައިވެސް ޔުނައިޓެޑުން ވަނީ ސިޓީގެ ގޯލަށް ނުރައްކާކޮށްފައެވެ. އަދި ސިޓީންވެސް ވަނީ މި ހާފުގައި ޔުނައިޓެޑުގެ ގޯލަށް ނުރައްކާތެރި ގިނަ ހަމަލާތަކެއް އުފައްދާފައެވެ. އެގޮތުން ސިޓީގެ އާލިން ހާލަންޑް ފޮނުވާލި ހަމަލާއެއް ގޯލުގެ ދަނޑިއަށް އަމާޒުވިއިރު، ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ހޫލިއަން އަލްވަރޭޒަށްވެސް ވަނީ ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވެފައެވެ.
މި މެޗުގައި ސިޓީން ކާމިޔާބުކުރި ހަމައެކަނި ލަނޑު މެޗު ނިމެން ތިން މިނެޓަށް ވެފައި ވަނިކޮށް ޖަހައިދިނީ ބަދަލަކަށް ކުޅެން އެރި ޖެރެމީ ޑޮކޫއެވެ.
މި ސީޒަނުގެ އެފްއޭ ކަޕް ކާމިޔާބުކުރުމާއެކު ޔުނައިޓެޑަށް ވަނީ އަންނަ ސީޒަނުގެ ޔުއެފާ ޔޫރޮޕާ ލީގުގެ ޖާގައެއް ކަށަވަރުވެފައެވެ.