ދީނާ ޤައުމު ދެކެ ލޯބިވާ ހަރުދަނާ ޖީލެއް ބިނާކުރުމަށް އަޒުމް ކަނޑައަޅަންޖެހޭ: ނައިބު ރައީސް

އިސްލާމްދީނާއި ޤައުމު ދެކެ ލޯބިވާ ހަރުދަނާ ޖީލެއް ބިނާކުރުމަށް އަޒުމް ކަނޑައަޅަން ޖެހޭކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ކުޑަކުދިންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްގައެވެ.

ނައިބު ރައީސް އަލްއުސްތާޛް ޙުސައިން މުޙައްމަދު ލަޠީފްގެ ޕޯސްޓުގައި ކުޑަކުދިންގެ ދުވަހުގެ ހެޔޮއެދުމާއި ތަހުނިޔާ އެންމެހާ ލޮބުވެތި ކުޑަކުދިންނަށް ވަނީ އަރިސްކުރައްވާފައެވެ. އަދި އަދުގެ ކުޑަކުދިންނަކީ މާދަމާ ޤައުމުގެ ހުންގާނުގައި ހިފާނެ ދަރީންނަށްވީއިރު، މިފަދަ ދުވަހެއްގައި ދީނާ ޤައުމު ދެކެ ލޯބިވާ ހަރުދަނާ ޖީލެއް ބިނާކުރުމަށް އަޅުގަނޑުމެން އަޒުމު ކަނޑައަޅަންޖެހޭކަން އެމަނިކުފާނު ފާހަގަކުރެއްވިއެވެ.

ޤައުމީ ކުޑަކުދިންގެ ދުވަހުގެ ހެޔޮއެދުމާއި ތަހުނިޔާ އެންމެހާ ލޮބުވެތި ކުޑަކުދިންނަށް އަރިސްކުރަން. އަދުގެ ކުޑަކުދިންނަކީ މާދަމާ ޤައުމުގެ ހުންގާނުގައި ހިފާނެ ދަރީންނަށްވީއިރު، މިފަދަ ދުވަހެއްގައި ދީނާ ޤައުމު ދެކެ ލޯބިވާ ހަރުދަނާ ޖީލެއް ބިނާކުރުމަށް އަޅުގަނޑުމެން އަޒުމު އާ ކުރަމާތޯ. pic.twitter.com/dx5nNdEyOd

— Hussain Mohamed Latheef (@HucenSembe) May 10, 2024

ކުޑަކުދިންގެ ޙައްޤުތައް ރައްކާތެރިކޮށް، ކުޑަކުދިންނަށް މުޖުތަމައުގައި ޚާއްޞަ އުސޫލަކުން ޢަމަލުކުރުމަށް ދިވެހިރާއްޖޭގެ ޤާނޫނު އަސާސީން ލާޒިމުކުރެއެވެ. 1991 ވަނަ އަހަރުން ފެށިގެން ކުޑަކުދިންގެ ޙައްޤުތަކާބެހޭ ޤާނޫނެއް ފާސްކޮށް، އެއަށް ރާއްޖޭގައި އަންނަނީ ޢަމަލުކުރަމުންނެވެ.

ކުޑަކުދިންގެ ދުވަސް ފާހަގަކުރުމުގެ މަޤްޞަދަކީ ކުޑަކުދިނަށް އެކުދިންނަށް ޙައްޤު އިޙްތިރާމް އަދާކޮށް، މުޖުތަމަޢުގައި އެކުދިންނަކީވެސް މުހިންމު ބައެއްކަން އަންގައިދިނުމެވެ. އަދި ކުޑަކުދިންގެ ޙައްޤުތައް ރައްކާތެރިކުރުވުމަށް މުޖުތަމަޢު ހޭލުންތެރިކޮށް، ޤައުމީ ފެންވަރުގައި ކުޑަކުދިންނަށް ދިމާވާ މައްސަލަތައް ޙައްލުކުރުމުގައި އެންމެން ގުޅިގެން މަސައްކަތްކުރުމުގެ ރޫޙް އާލާކުރުމެވެ.