ތައިލެންޑުގެ ސޮންގްލާގައި ބާއްވާ 23 ވަނަ ސޮންގްލާ ބީޗް ޓުއާގައި ވާދަކުރުމަށް ރާއްޖޭގެ ގައުމީ ބީޗް ވޮލީބޯޅަ ޓީމު ފުރައިފިއެވެ.
މި މުބާރާތުގައި ރާއްޖެއިން ދެ ޓީމެއް ވާދަކުރެއެވެ. ޓީމު އޭގައި ހިމެނެނީ އާދަމް ނަސީމް (އެޑަމް) އާއި އިސްމާޢީލް ސާޖިދު (ކުޑަކާއްޓޭ) އެވެ. އަދި ޓީމު ބީގައި ހިމެނެނީ މުޙައްމަދު އަލީ (ޑެންޒޯ) އާއި އަޙްމަދު މުޙައްމަދު (ކޯކޭ) އެވެ. ޓީމުގެ ހެޑް ކޯޗަކީ އަބްދުﷲ ނަޝީދެވެ. އަދު އެސިސްޓެންޓް ކޯޗަކީ ރިޝްވާން މުޙައްމަދެވެ.
މި މުބާރާތުގައި ރާއްޖެއިން ރެފުރީއެއްގެ ގޮތުގައި އިސްމާޢީލް އަބްދުﷲ ހަރަކާތްތެރިވާނެއެވެ. އަދި ޓީމާއެކު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފުވެސް ވަނީ ތައިލެންޑަށް ވަޑައިގެންފައެވެ.
މި މުބާރާތް ކުރިއަށްދާނީ މި މަހުގެ 13 އިން 14 ވަނަ ދުވަހުގެ ނިޔަލަށެވެ. 17 ގައުމަކުން 29 ޓީމު ވާދަކުރާ މި މުބާރާތަކީ މީގެ ކުރިންވެސް ރާއްޖެއިން ވާދަކޮށްފައިވާ މުބާރާތެކެވެ.
މުބާރާތާ ބެހޭގޮތުން ލަތީފް ވިދާޅުވީ މި މުބާރާތަކީ ދިވެހި ކުޅުންތެރިންގެ ކުރިއެރުމަށް ވަރަށް މުހިންމު މުބާރާތެއް ކަމަށެވެ. އަދި މި އަހަރުގެ ޑިސެމްބަރު މަހު އޮންނަ ކާވާ ބީޗް ވޮލީ މުބާރާތަށް ދާއިރު، މި މުބާރާތުގެ ސަބަބުން ގިނަ ކުރިއެރުންތަކެއް ލިބިގެންދާނެ ކަމަށްވެސް ވިދާޅުވިއެވެ.
ކާވާ ބީޗް ވޮލީބޯޅަ މުބާރާތުން ރާއްޖެ ވަނީ 2022 ވަނަ އަހަރު ރަން މެޑަލް ހޯދާފައެވެ. އެހެންނަމަވެސް މިދިޔަ އަހަރު ރާއްޖެއަށް ލިބުނީ ރިހި މެޑެއްޔެވެ. އެހެންކަމުން ދިވެހި ޓީމުގެ އަމާޒަކީ މި އަހަރު އަނެއްކާވެސް ރަން މެޑަލް ހޯދުން ކަމަށް ލަތީފް ވިދާޅުވިއެވެ.