އޭދަފުށި ފުޓްސަލް ކަޕް: ޗެމްޕިއަން އަފްރޯ، މުރިންގް އަދި ނަލަ ބްރަދާސްއަށް ރަނގަޅު ފެށުމެއް

ބ. އޭދަފުށީ ކައުންސިލުން އިންތިޒާމުކޮށްގެން އެ ރަށުގައި ބާއްވާ "އުރީދޫ އޭދަފުށި ފުޓްސަލް ކަޕް 2024" ގެ ފެށުން އެންމެ ފަހުގެ ޗެމްޕިއަން އަފްރޯ ސްޕޯޓްސް ކުލަބާއި، މުރިންގް އެފްސީ އަދި ނަލަ ބްރަދާސްއިން ރަނގަޅުކޮށްފިއެވެ.

މި ފަހަރުގެ މުބާރާތުގައި 16 ޓީމެއް ބައިވެރިވެފައިވާއިރު، މުބާރާތް ކުރިއަށްދާނީ ހަތަރު ގްރޫޕަކަށް ބަހާލައިގެންނެވެ. އަދި ކޮންމެ ގްރޫޕަކުންވެސް އެއްވަނަ އާއި ދެވަނަ ޓީމު ކުއާޓާ ފައިނަލަށް ދަތުރުކުރާނެއެވެ. މުބާރާތުގެ ކުޅުން މިރޭ ފެށިއިރު، ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 17 ވަނަ ދުވަހެވެ.

އޭދަފުށީ ފުޓްސަލް ދަނޑުގައި ކުރިއަށްދާ މި މުބާރާތުގައި މިރޭ ކުޅުނު ފުރަތަމަ މެޗުން ގްރޫޕް އޭގައި ހިމެނޭ ނަލަ ބްރަދާސް މޮޅުވީ ކީވަން އެފްސީއާ ވާދަކޮށް 6-0 ގެ ތަފާތު ބޮޑު ނަތީޖާއަކުންނެވެ. މި މެޗުގެ މޮޅު ކުޅުންތެރިއަކަށް ހޮވުނު ނަލަ ބްރަދާސްގެ ހުޒައިފަތު ރަޝީދު (ހުޒޭ) ވަނީ ހެޓްރިކެއް ހަދާފައެވެ. ދެން މި މެޗުގައި ނަލަ ބްރަދާސްއިން ކާމިޔާބުކުރި ލަނޑުތައް ޖަހައިދިނީ ޓީމުގެ ކެޕްޓަން އިބްރާހީމް ނާއިޝް އާއި، އަޙްމަދު އަފްނާން އަދި އަލީ ނަސީރެވެ.

މުބާރާތުގެ ގްރޫޕް ބީގައި ކުޅުނު ފުރަތަމަ މެޗުން އެންމެ ފަހުގެ ޗެމްޕިއަން އަފްރޯ މޮޅުވީ އެފްސީ ސަޑަންލީ އަތުން ފަސޭހަކަމާއެކު 4-0 ގެ ނަތީޖާއަކުންނެވެ. މި މެޗުގައި އަފްރޯގެ ތަޖުރިބާކާރު ކުޅުންތެރިޔާ އަލީ މާއިސް (މައްޓު) ވަނީ ދެ ލަނޑު ޖަހާފައެވެ. އަދި އެ ޓީމުގެ އަނެއް ދެ ލަނޑު ޖަހައިދިނީ ހައިޝަމް ހަސަނާއި، މުޙައްމަދު ފާސިރު (ފާއްޓެ) އެވެ.

މީގެ އިތުރުން މިރޭ ކުޅުނު ފަހު މެޗުން ގްރޫޕް ސީގައި ހިމެނޭ މުރިންގް އެފްސީ މޮޅުވީ 18 އަހަރުން ދަށުގެ ގިނަ ކުޅުންތެރިންތަކެއް ހިމެނޭ ވީ ވެލާ އަތުން 3-0 ގެ ނަތީޖާއަކުންނެވެ. މި މެޗުގައި މުރިންގް އެފްސީގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި ޝާރިފް އަބްދުލް މަޖީދާއި، އިބްރާހީމް ސިމާހެވެ.

އޭދަފުށި ފުޓްސަލް ކަޕުގެ ކުޅުން މިރޭ ފެށިއިރު، މި މުބާރާތުގައި މާދަމާރޭވެސް ތިން މެޗެއް ކުޅުމަށް ވަނީ ހަމަޖެހިފައެވެ. އެގޮތުން ފުރަތަމަ މެޗުގައި ގްރޫޕް ޑީގައި ހިމެނޭ އޯލް ވުލްވްސް ނުކުންނާނީ އެފްސީ ދުންތަރިއާ ދެކޮޅަށެވެ. އަދި ދެވަނަ މެޗުގައި ގްރޫޕް އޭއިން ބީކޭ ސްޕޯޓްސް ކުލަބާއި ޔުނައިޓެޑް ވީ ބައްދަލުކުރާއިރު، ތިންވަނަ މެޗުގައި ގްރޫޕް ބީގައި ހިމެނޭ ސީސީ ސްޕޯޓްސް ކުލަބު ނުކުންނާނީ އެފްސީ މާލިންސްއާ ދެކޮޅަށެވެ.