ރާއްޖޭގެ ކްރިކެޓުގައި ކޮންމެ އަހަރަކު މަދުވެގެން ކޯޗުންނާއި އަމްޕަޔަރުންގެ ދެ ކޯހެއް ބާއްވަން ޖެހޭ ކަމަށް ކްރިކެޓް ބޯޑް އޮފް މޯލްޑިވްސް (ސީބީއެމް) ގެ ޑިވެލޮޕްމަންޓް މެނޭޖަރ އިމާދު އިސްމާޢީލް ވިދާޅުވެއްޖެއެވެ.
ރާއްޖެ ކްރިކެޓުގެ ކުރިމަގާ ގުޅޭގޮތުން ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަދައްކަވަމުން އިމާދު ވިދާޅުވީ އޭޝިއާގެ ކްރިކެޓް ކައުންސިލް (އޭސީސީ) އިން ބާއްވާ ކޯޗިން ކޯސްތަކުން ދިވެހިންނަށް ފުރުސަތު ލިބޭ ކަމަށެވެ. އެހެންކަމުން ބޮޑަށް ބަލަނީ އެފަދަ ކޯސްތަކުގައި ދިވެހިން ބައިވެރިކުރަން ކަމަށާއި، އެހެން ނަމަވެސް ބިދޭސީން ބައިވެރިވެގެން ރާއްޖެއަށް ވަރަށް ރަނގަޅު ނަތީޖާތަކެއް ހޯދައިދީފައިވާ ކަމަށްވެސް ވިދާޅުވިއެވެ.
"ބޭރު މީހަކު ފޮނުވާފިއްޔާމުން އެނބުރި އައިސް ވަރަށް ރަނގަޅު މަސައްކަތްތަކެއް އެބަކުރޭ. އެގޮތުން ކޯޗިން ކޯސްތަކުގައި ބައިވެރިވެގެން ރަނގަޅު ނަތީޖާ ހޯދާފައި ކޯޗުންތަކެއް އެބަތިބި، އެކްޓިވްކޮށް މަސައްކަތްކުރާ ކޯޗުން.އިމާދު އިސްމާޢީލް - ކްރިކެޓް ޑިވެލޮޕްމަންޓް މެނޭޖަރ
އިމާދު ވިދާޅުވީ ރަމަޟާން މަހު ކުރިއައްދާ ކްރިކެޓް ކާނިވަލަށްފަހު 50 އޯވަރުގެ ގައުމީ ކްރެކިޓް މުބާރާތް ތާވަލުކުރެވިފައިވާ ކަމަށެވެ. އަދި އަންނަ ޖުލައި މަހު މެލޭޝިއާގައި އޮންނަ 50 އޯވަރުގައި އިންޓަރނޭޝަލް ކްރިކެޓް މުބާރާތަށް ގައުމީ ޓީމު އެކުލަވާލުމަށް ހޮވާ ޕޫލަށް، އެ މުބާރާތުން ކުޅުންތެރިން ހޮވުމަށް ހަމަޖެހިފައިވާ ކަމަށްވެސް ވިދާޅުވިއެވެ.